У Год міру і стварэння на тэрыторыі Цяцерынскай сярэдняй школы быў сімвалічна закладзены сад Перамогі. У аснове саду — яблыні беларускай селекцыі.
У пасадцы маладых дрэў удзельнічалі педагогі, вучні, работнікі школы. Абыякавых да гэтай карыснай справы не было. Найбольшую актыўнасць праявілі члены школьнага клуба “Абаронца” Раман Марозаў, Андрэй Навіцкі, Аляксандр Лазаковіч на чале з кіраўніком па ваенна-патрыятычным выхаванні палкоўнікам Сяргеем Аўксенцьевічам Літвінюком.
Усяго агульнымі намаганнямі было пасаджана 70 фруктовых дрэў. Пройдзе пэўны час, пачне пладаносіць наш сад. Хочацца верыць у тое, што вырасце не адно пакаленне ўдзячных землякоў. Сад Перамогі стане сапраўдным упрыгажэннем прышкольнай тэрыторыі, сімвалам Памяці.
Сёння абавязак кожнага — захоўваць памяць аб гераічным мінулым Беларусі, быць удзячным пакаленню пераможцаў за заваяванае імі для нас права жыць у вольнай і мірнай краіне. Значна, што пасля заканчэння працы ўдзельнікі дзяліліся светлымі думкамі. Гаварылі аб неабходнасці і далей павялічваць скарбонку добрых акцый, аб’ядноўвацца, жыць у міры і згодзе.
Таццяна ЖУКОЎСКАЯ,
намеснік дырэктара па вучэбнай рабоце
Цяцерынскай сярэдняй школы Круглянскага раёна
