Адзіны ў Мінскай вобласці профільны грамадзянска-патрыятычны лагер «Міласэрнасць», у межах якога праводзіцца медыцынская практыка для навучэнцаў 10-х класаў (дзяўчынак), працуе ў Дзяржынскім раённым цэнтры турызму і краязнаўства, паведамляе карэспандэнт «Настаўніцкай газеты».
Сёння тут праходзяць практыку па медыцынскай падрыхтоўцы і адпачываюць 100 дзяўчат.
— У нас арганізавана супрацоўніцтва з многімі структурамі, — расказала дырэктар лагера Алена Курыліна. — Але акцэнт робім на медыцыне.
Заняткі ў гэтым кірунку з навучэнкамі праводзяць медыцынскія работнікі. Аказанне першай медыцынскай дапамогі, правядзенне рэанімацыйных мерапрыемстваў, накладанне павязак, аказанне дапамогі падчас пераломаў — толькі частка таго, чаму вучацца ў профільным лагеры.
— Традыцыйная акцыя ў «Міласэрнасці» — «Чытаем разам», у межах якой рэалізуецца праект «Пра вайну помнім, пра вайну чытаем», — адзначыла суразмоўніца. — Яшчэ адна прыгожая традыцыя — «Ліст маме». Раз у тыдзень мы збіраемся і пішам лісты мамам. Нягледзячы на тое, што яны атрымаюць іх не адразу, пачытаць, што пішуць дзеці, будзе вельмі прыемна.
— У горадзе і раёне рэалізуецца прафарыентацыйны праект «Адзін дзень у прафесіі», — нагадала начальнік раённага ўпраўлення па адукацыі, спорце і турызме Дзяржынскага райвыканкама Галіна Гапанькова. — Дзякуючы яму навучэнцы, якія цікавяцца медыцынай, могуць сябе паспрабаваць у прафесіі.
Наталля САХНО
Фота аўтара
