Дырэктар Цэнтра карэкцыйна-развіццёвага навучання і рэабілітацыі ў Мастах Святлана Бярозава працуе тут з дня адкрыцця. Больш за 20 гадоў яна штодзень мае зносіны з асаблівымі дзецьмі і ўпэўнена, што ў гэтай сферы немагчыма сустрэць выпадковага чалавека. Падрабязнасці — у матэрыяле карэспандэнта “Настаўніцкай газеты”.
— За плячыма многіх нашых спецыялістаў багаты вопыт работы, і, канечне, яны адчуваюць велізарную любоў да дзяцей. Некаторыя працуюць у цэнтры больш за 20 гадоў, — гаворыць Святлана Бярозава.
Яе жыццёвы шлях ужо 23 гады цесна звязаны з установай спецыяльнай адукацыі. Спачатку быў настаўніцкі вопыт, потым працавала намеснікам дырэктара і ўжо больш як 5 гадоў узначальвае калектыў.
— Памятаю, калі толькі пачынала тут працаваць, у большай ступені работа тычылася зносін з дзецьмі па месцы жыхарства. Сёння наша ўстанова працуе з навучэнцамі непасрэдна ў цэнтры. Для гэтага створаны ўсе ўмовы. Да таго ж такі падыход спрыяе такому неабходнаму адпачынку бацькоў: мамы і таты разумеюць, што іх асаблівыя дзеткі ў надзейных руках, — расказвае Святлана Антонаўна.
Ва ўстанове спецыяльнай адукацыі працуе дашкольная група для чатырох выхаванцаў і два класы для 13 навучэнцаў з цяжкімі, множнымі парушэннямі ў фізічным і псіхічным развіцці.
Па сутнасці, цэнтр — гэта і дзіцячы сад, і школа, а калі размова ідзе менавіта пра рэабілітацыю, то і медустанова для сваіх падапечных. Кожны з іх мае патрэбу ў комплекснай дапамозе. Асаблівая роля адводзіцца сацыяльнай адаптацыі. Акрамя іншага, дзяцей тут вучаць на першы погляд элементарным рэчам: трымаць лыжку і кубак, есці і апранацца. Аднак нават гэтыя простыя для кожнага здаровага чалавека дзеянні далёка не заўсёды даюцца навучэнцам з лёгкасцю.
С.Бярозава: Усімі сіламі імкнёмся працаваць так, каб абмежаваныя магчымасці не сталі для нашых навучэнцаў перашкодай для бязмежнага жадання жыць, вучыцца, тварыць і ісці наперад.
Развіваюцца навучэнцы ў тым ліку творча. Пры дапамозе і падтрымцы дарослых яны з задавальненнем малююць, спяваюць і танцуюць. У 2022 годзе вынікам творчага супрацоўніцтва дзяцей і педагогаў стала 2-е месца ў абласным этапе рэспубліканскага фестывалю творчасці “Вясёлкавы карагод”. З задавальненнем яны прымяраюць на сябе і ролі казачных герояў у тэатры цэнтра “Добрыя казкі”.
— Не пакідаем без увагі ў тым ліку бацькоў нашых навучэнцаў. Сумесна з раённай грамадскай арганізацыяй Беларускага таварыства Чырвонага Крыжа рэалізавана гуманітарная ініцыятыва “Рука дапамогі”, распрацаваны ўласныя, — адзначае суразмоўніца.
Акрамя штодзённай работы з навучэнцамі і іх бацькамі, установа спецыяльнай адукацыі арыентавана на прафесійны дыялог з калегамі з усяго раёна. Цэнтр з’яўляецца каардынатарам работы з дзецьмі ў класах інтэграванага навучання і выхавання. Тут праходзяць вучэбныя семінары для настаўнікаў, аказваецца метадычная дапамога.
Гэты год для Цэнтра карэкцыйна-развіццёвага навучання і рэабілітацыі ў Мастах праходзіць пад знакам лідарства. Ён прызнаны лепшым у вобласці сярод устаноў спецыяльнай адукацыі. Такая ацэнка матывуе на далейшую плённую дзейнасць на карысць асаблівых дзяцей.
— Да таго ж забяспечваем вучэбнымі дапаможнікамі дзяцей, якія вучацца па праграмах спецыяльнай адукацыі ў класах і групах інтэграванага навучання і выхавання ўсяго раёна. Таксама на базе нашага цэнтра ажыццяўляецца першаснае абследаванне дзяцей на выяўленне патрэбы ў карэкцыйнай дапамозе або спецыяльнай адукацыі, — дадае Святлана Бярозава.
Вялікая ўвага ва ўстанове спецыяльнай адукацыі ўдзяляецца стварэнню прадметна-развіццёвага асяроддзя. Вучэбныя памяшканні абсталяваны па апошнім слове тэхнікі. Са слоў суразмоўніцы, вялікая заслуга ў гэтым Мастоўскага райвыканкама і непасрэдна ўпраўлення адукацыі райвыканкама. Дзякуючы іх дапамозе і падтрымцы, толькі за апошнія тры гады на паляпшэнне матэрыяльна-тэхнічнай базы цэнтрам асвоена больш за 300 тысяч рублёў.
У 2021 годзе тут завершаны работы па стварэнні даступнага асяроддзя. Падвоз дзяцей да месца вучобы ажыццяўляецца спецыялізаваным транспартам.
Кацярына МАЦЕВІЧ
Фота аўтара
