Трэці раз адзін з гарадоў Брэстчыны атрымаў ганаровы статус маладзёжнай сталіцы Беларусі: пасля Баранавіч і Пінска ёй сёлета стаў горад над Бугам. Падрабязнасці — у матэрыяле карэспандэнта “Настаўніцкай газеты”.
Урачыстай цырымоніі перадачы эстафеты папярэднічалі два вельмі насычаныя дні, падчас якіх каля 400 юнакоў і дзяўчат з ліку студэнтаў, валанцёраў, маладых навукоўцаў, лідараў і актывістаў грамадскіх аб’яднанняў прынялі ўдзел у шматлікіх мерапрыемствах і бліжэй азнаёміліся з гісторыяй старажытнага Брэста. На працягу бягучага года ён прэзентуе лепшыя практыкі па развіцці сацыяльнай, эканамічнай і палітычнай актыўнасці моладзі.
У першы дзень удзельнікі сабраліся ў мемарыяльным комплексе “Брэсцкая крэпасць-герой”, дзе прайшліся дружнай калонай з Дзяржаўным сцягам Рэспублікі Беларусь агульнай плошчай 2000 м2 да Вечнага агню, аддаўшы даніну памяці гераічным продкам, якім абавязаны мірным небам над галавой. Шмат незабыўных уражанняў пакінулі ў гасцей экскурсія па цытадэлі над Бугам і музейныя экспазіцыі, прысвечаныя яе гісторыі і абароне ў чэрвені 1941 года. А музычна-забаўляльная праграма “У любімым Брэсце толькі разам”, зладжаная вечарам, дазволіла ўдзельнікам пазнаёміцца адно з адным і наладзіць кантакты.
Даволі цікавым і пазнавальным атрымаўся другі дзень праграмы. У Брэсцкім навукова-тэхналагічным парку члены савета маладых вучоных пры Міністэрстве адукацыі Беларусі абмеркавалі актуальныя праблемы і кірункі развіцця айчыннай навукі.
Арганізацыі валанцёрскай дзейнасці была прысвечана дыялогавая пляцоўка “Добраахвотніцтва без меж” у БрДУ імя А.С.Пушкіна. На практычным семінары, які прайшоў у мемарыяльным комплексе “Брэсцкая крэпасць-герой”, вялі зацікаўленую гутарку пра новыя формы работы з моладдзю. Пытанні патрыятычнага выхавання і не толькі былі ў цэнтры ўвагі ўдзельнікаў дыялогавых пляцовак “Адзінства моладзі — сіла Беларусі” і “Моладзь і выбары”, арганізаваных на базе прадпрыемства “Савушкін прадукт” і Цэнтра дадатковай адукацыі дзяцей і моладзі Брэста. Вэбінар “Сучасны лідар” аб’яднаў маладых актывістаў, якія падзяліліся вопытам эфектыўнай грамадскай дзейнасці. Члены савета прарэктараў па выхаваўчай рабоце УВА сабраліся ў БрДТУ, каб абмеркаваць надзённыя пытанні, звязаныя з ідэалагічным выхаваннем маладога пакалення з улікам сучасных выклікаў. А завяршыўся другі дзень працоўнай акцыяй на тэрыторыі будучага Рэспубліканскага цэнтра патрыятычнага выхавання моладзі.
Адкрываючы рэспубліканскае свята “Брэст — маладзёжная сталіца Беларусі — 2024”, міністр адукацыі Андрэй Іванец адзначыў, што летась Наваполацк праявіў сябе па-сапраўднаму маладзёжна, крэатыўна і ініцыятыўна, стаўшы пляцоўкай для шматлікіх яркіх мерапрыемстваў, у тым ліку міжнародных.
— Мы чакаем, што ў Год якасці Брэст прыкладзе асаблівыя намаганні, каб з гонарам апраўдаць высокі давер і выканаць адказную місію. Для гэтага ёсць усе неабходныя ўмовы, — заўважыў міністр.
Андрэй Іванец падкрэсліў, што самарэалізацыі моладзі ўдзяляецца вялікая ўвага ў краіне, паколькі менавіта ў яе руках знаходзіцца будучыня дзяржавы. І толькі самаадданай працай, розумам, жаданнем і ідэямі можна пабудаваць і захаваць моцную, квітнеючую і незалежную Беларусь.
Маладзёжную сталіцу выбіраюць на конкурснай аснове. Пры выбары пераможцы ўлічваецца шмат фактараў, у тым ліку план прапанаваных мерапрыемстваў, знакавыя падзеі і інш. Перавага гораду над Бугам была аддадзена невыпадкова: сёлета Брэстчына адзначае 85-годдзе з моманту свайго ўтварэння, а Брэсту спаўняцца 1005 гадоў. Важную ролю адыграла і 80-я гадавіна вызвалення Беларусі ад нямецка-фашысцкіх захопнікаў, бо легендарная цытадэль першай прыняла ўдар ворага і паказала прыклад узорнай мужнасці і няскоранага духу.
— Калі хтосьці хоча забыць ці сцерці старонкі нашай гераічнай гісторыі, мы не дапусцім гэтага, — запэўніў Андрэй Іванец. — Будаўніцтва Рэспубліканскага цэнтра патрыятычнага выхавання моладзі на тэрыторыі Брэсцкай крэпасці нездарма абвешчана Усебеларускай маладзёжнай будоўляй. Сучасныя юнакі і дзяўчаты з гонарам нясуць сцяг пераможцаў і вызваліцеляў Радзімы. Упэўнены, што 2024 год пройдзе ў Брэсце на самым высокім узроўні і моладзь дастойна праявіць сябе ва ўсіх сферах.
Ва ўрачыстай атмасферы пераходны сімвал маладзёжнай сталіцы ў выглядзе ключа быў перададзены старшыні Брэсцкага гарвыканкама Сяргею Лабадзінскаму.
— Вялікі гонар — прыняць гэтую эстафету, — сказаў ён. — Мы не падвядзём! Будзем працаваць пад новым слоганам “У любімым Брэсце толькі разам”, каб паказаць, што мы адзіныя і моцныя. У рамках праекта маладзёжнай сталіцы ў горадзе будзе рэалізаваны вялікі план цікавых і разнапланавых мерапрыемстваў, якія аб’яднаюць юнакоў і дзяўчат Саюзнай дзяржавы.
Удзельнікі свята заслухалі віншавальныя адрасы, накіраваныя Старшынёй Савета Рэспублікі Нацыянальнага сходу Беларусі Наталляй Качанавай, а таксама кіраўніцтвам Прыморскага краю і Масквы (Уладзівасток і Масква абвешчаны сёлетнімі маладзёжнымі сталіцамі ў Расіі).
— Сацыяльна значныя праекты моцна згуртоўваюць моладзь, якая годна пераймае эстафету гістарычнай памяці ў папярэднікаў, — адзначыў першы сакратар ЦК БРСМ Аляксандр Лук’янаў, які перадаў дырэктару Брэсцкага дзяржаўнага абласнога цэнтра маладзёжнай творчасці Віктару Іванову сертыфікат на 500 тысяч рублёў, сабраных на будаўніцтва Рэспубліканскага цэнтра патрыятычнага выхавання моладзі.
Удзельнікі святочнага канцэрта, арганізаванага з нагоды ўрачыстасці, адправіліся ў захапляльнае гістарычнае падарожжа па старажытным Брэсце. Арганізатары падрыхтавалі для гледачоў шмат адметных музычных, вакальных і танцавальных нумароў, у якіх адлюстраваліся важныя падзеі мінулага, звязаныя з горадам, і прагучалі пранікнёныя словы любові да яго.
Сяргей ГРЫШКЕВІЧ
Фота аўтара
