“Адчуваеш гордасць за родную краіну”, — гавораць наведвальнікі пра маштабную выставу “Мая Беларусь”. Падрабязнасці — у матэрыяле карэспандэнта “Настаўніцкай газеты”.
Чаго толькі няма!
На выставе, што займае плошчу больш за 30 тысяч квадратных метраў, як у павільёне, так і на адкрытай пляцоўцы здзіўляцца сапраўды ёсць чаму. Мноства цікавых праектаў і яркіх экспанатаў, прадстаўленых тут, расказваюць нам пра асноўныя дасягненні нашай краіны за апошні час, абуджаюць гордасць за родную Беларусь. Пра вялікую цікавасць да выставы сведчыць колькасць яе наведвальнікаў: сюды прыходзяць цэлымі сем’ямі, каля стэндаў шмат моладзі, школьнікаў, ёсць і замежныя госці. Дарэчы, адна з галоўных мэт гэтага праекта — навукова-асветніцкая, прафарыентацыйная.
Усяго тут 11 тэматычных лакацый: “Знак якасці”, “Культурная спадчына”, “Мы — будучыня”, “Разумны горад”, “Прыгожая краіна”, “Навука і інтэлект”, “Клопат і здароўе”, “Спартыўная краіна”, “На варце”, “Атамная энергія”, “Сельская гаспадарка”.
Каб агледзець іх усе, вядома, аднаго дня не хопіць. Таму арганізатары раяць наведацца сюды двойчы, а то і тройчы. Тым больш што час дазваляе: “Мая Беларусь” бясплатна запрашае гасцей да 16 лютага.
Выбіраем будучыню
Сям’я Акуліч з Жодзіна ў святочны дзень спецыяльна прыехала ў сталіцу на выставу. Сямікласнік Дзіма з жодзінскай сярэдняй школы № 4 расказаў, што больш за ўсё яму спадабалася лакацыя “Атамная энергія”, а таксама разнастайная ваенная тэхніка, якая размешчана на пляцоўцы перад павільёнам.
Многім наведвальнікам цяжка было адказаць на пытанне, што ім найбольш спадабалася, але абсалютна ўсе адзначалі: першае, што здзіўляе, — гэта маштаб выставы.
На спартыўнай лакацыі з рознымі трэнажорамі шмат дашкольнікаў і малодшых школьнікаў, а вось страшакласнікі і моладзь збіраюцца ў секцыях “Разумны горад” , “Мы — будучыня”, “Навука і інтэлект”. Тут можна ўбачыць, напрыклад, “Разумны прыпынак”, дзе ёсць Wi-Fi, інтэрактыўная карта, расклад руху транспарту, зарадка для тэлефона. Каля яго якраз затрымаўся дзевяцікласнік Уладзіслаў Дыдышка са сталічнай гімназіі № 61, які плануе звязаць сваю прафесійную будучыню з сучаснымі тэхналогіямі. Хлопец адзначае, што на выставе для яго шмат матыватараў. Тут ёсць распрацоўка, якую прадстаўляе Беларускі нацыянальны тэхнічны ўніверсітэт, — устаноўка для супертонкага магнітна-абразіўнага паліравання высокадакладных паверхняў. Дарэчы, на кожны экспанат можна паглядзець у дзеянні, акрамя таго, пра яго падрабязна расказваюць.
— Падыходзяць, пытаюцца — і дарослыя, і дзеці: адкуль бярэцца папера, кардон, для чаго і як яны выкарыстоўваюцца, — гаворыць інжынер-тэхнолаг Светлагорскага цэлюлозна-кардоннага камбіната Ала Клешчанка. — На сучасным макеце мы пастараліся прадставіць увесь тэхналагічны цыкл, як з дрэва атрымліваецца матэрыял для сшытка. Спецыяльна для дзетак, без складаных паняццяў. У гэтым вялізным вытворчым працэсе задзейнічаны каля 800 чалавек! Наша прадпрыемства цалкам камп’ютарызаванае. І мы рады, што школьнікі, моладзь усё гэта ўбачаць і, магчыма, у будучыні захочуць у нас працаваць.
Асаблівай папулярнасцю ў дзяцей карыстаецца экспазіцыя, прысвечаная космасу. Тут і сапраўдная касмічная капсула, у якой прызямліліся пасля палёту Марына Васілеўская і Алег Навіцкі, і скафандр касманаўта. А таксама мадэль спадарожніка, распрацаваная студэнтамі і педагогамі факультэта радыёфізікі і камп’ютарных тэхналогій Беларускага дзяржаўнага ўніверсітэта. Сам гэты спадарожнік ужо паўгода як у космасе, дасылае важныя даныя на Зямлю. Напрыклад, фатаграфуе прыродныя з’явы, лясныя пажары.
— Гэта гордасць нашага факультэта, — адзначае студэнт Вадзім Дубавец. — Дзякуючы спадарожніку, ужо напісана каля 30 курсавых і дыпломных работ.
Нікога не пакіне абыякавым і электрамабіль у разрэзе, які можна разгледзець у дэталях, а таксама першы айчынны электрычны аўтамабіль ВELGEE ЕX50, цалкам створаны з беларускіх камплектуючых.
Мора інтэрактыву
І ўсё ж галоўнае, чым захапляе выстава, — інтэрактыў.
На адкрытай пляцоўцы можна адчуць сябе вадзіцелем рознай тэхнікі, у тым ліку вялізнага БелАЗа.
На спартыўнай лакацыі бацькі і дзеці гуляюць у валейбол, вучацца катацца на лыжах на спецыяльным трэнажоры. Папулярная таксама і лакацыя “Клопат і здароўе” Міністэрства аховы здароўя, дзе перад уваходам у сапраўдныя аўтамабілі хуткай дапамогі і рухомы медыцынскі комплекс доўгая чарга жадаючых зазірнуць, што там унутры. Побач — крэсла стаматолага, дзе маленькіх дзяцей сустракае ўрач і вучыць іх правільна чысціць зубы, а потым самых уважлівых катае на крэсле, якое рухаецца ў розныя бакі. На медыцынскіх манекенах малых вучаць правілам аказання першай дапамогі, выканання масажу сэрца. У секцыі “Медыцына і фармацэўтыка” расказваюць, што такое генетычны пашпарт чалавека.
Тут жа можна паглядзець, як працуе робат-фармацэўт.
А самыя маленькія маюць магчымасць паспрабаваць з парашку зрабіць уласныя лекі.
Вялікая чарга назіраецца і ля трэнажора-трактара на лакацыі “Сельская гаспадарка”, дзе можна адчуць сябе вадзіцелем гэтай машыны.
Аншлаг — на лакацыі “На варце”, дзе свае экспазіцыі прадстаўляюць Міністэрства абароны, МУС і МНС.
Тут можна паглядзець на беспілотны авіяцыйны комплекс блізкага радыуса дзеяння “Камар”, уніформу і ўзбраенне ваеннаслужачых унутраных войскаў МУС, баявое адзенне пажарнага.
Пералічыць усё, што прапаноўвае выстава, немагчыма — гэта трэба ўбачыць.
Арганізатары падкрэсліваюць: тут сабрана далёка не ўсё, чым ганарыцца наша краіна, але і гэта вельмі шмат! І раяць абавязкова прыходзіць з дзецьмі, каб разам з імі паглядзець на сучаснасць Беларусі і зазірнуць у будучыню.
Лізавета МІЦКЕВІЧ
Фота Алега ІГНАТОВІЧА
