Прэзідэнт Беларусі Аляксандр Лукашэнка патрабуе, каб працэдура падаткаабкладання была максімальна камфортнай для бізнесу, але пры гэтым гарантавала рэалізацыю законных інтарэсаў дзяржавы. Гэтае пытанне абмяркоўвалася ў час рабочай сустрэчы Прэзідэнта Беларусі Аляксандра Лукашэнкі з міністрам па падатках і зборах Сяргеем Налівайкам.
“Хацелі б ад вас пачуць аб праблемах. Што нам трэба зрабіць, каб было і прадпрымальнікам зручна, і работнікам вытворчасці — тым, хто плаціць падаткі, і каб дзяржава пры гэтым залішне не націскала на іх, але нічога не страчвала ў гэтым плане, а атрымлівала тое, што павінна атрымліваць, што існуе ва ўсіх дзяржавах?” — сказаў прэзідэнт.
Кіраўнік дзяржавы звярнуў увагу, што падатковыя органы ў сваім развіцці перажываюць своеасаблівы пераломны этап у пытаннях удасканалення сістэмы падаткаабкладання і адміністравання. “Што ў гэтым плане зроблена, асабліва калі браць пад увагу інфарматызацыю? Мы дамаўляліся, што ў гэтым плане будзе зроблена нямала ў вашым ведамстве”, — пацікавіўся кіраўнік дзяржавы.
Як расказаў журналістам міністр па выніках сустрэчы, асноўнай тэмай яго даклада прэзідэнту была эфектыўнасць укаранёных электронных сістэм кантролю, а таксама рэалізацыя з 1 ліпеня механізма электронных рахункаў-фактур для плацельшчыкаў ПДВ. “Было даложана аб эфектыўнасці ўкаранёных сістэм, павышэнні збору плацяжоў, зніжэнні колькасці праверак дзякуючы ўкараненню такіх сістэм. Гэты трэнд будзе прадоўжаны. Наша асноўная задача — забяспечыць добрасумленным суб’ектам гаспадарання бескантактнае ўзаемадзеянне з падатковай службай пры мінімуме праверак. Калі аналітычныя сістэмы не паказваюць ніякіх рызык, праверак можа не быць у прынцыпе”, — сказаў Сяргей Налівайка.
Паводле слоў міністра, у пытаннях аблягчэння працэдуры падаткаабкладання для сферы бізнесу за апошнія пяць гадоў Беларусь шмат чаго дасягнула, пра што сведчаць міжнародныя рэйтынгі, у прыватнасці Сусветнага банка. Створаны такія сістэмы, як спрошчаная сістэма падаткаабкладання, адзіны падатак, якія даюць магчымасць на даволі простым узроўні вылічваць і выплачваць неабходную суму, прывёў прыклад міністр.
Сяргей Налівайка таксама адзначыў важнасць стабільнасці ў падатковай сферы. “Гэты напрамак быў абазначаны кіраўніком дзяржавы яшчэ ў пачатку мінулага года. Гэтая ўстаноўка нязменная, — заявіў ён. — Прынята рашэнне аб тым, што на працягу каляндарнага года стаўкі падаткаў і іх колькасць не будуць мяняцца. Думаю, па меры стабілізацыі эканамічнай сітуацыі і на больш доўгія перыяды будзе аб’яўляцца своеасаблівы мараторый на змяненне падаткаў і падатковых ставак”.
