Прэзідэнт Беларусі Аляксандр Лукашэнка падпісаў Указ “Аб задачах сацыяльна-эканамічнага развіцця Рэспублікі Беларусь на 2018 год”.
Пастаўленыя кіраўніком дзяржавы задачы грунтуюцца на прыярытэтах праграмы сацыяльна-эканамічнага развіцця Беларусі на 2016—2020 гады. Асноўнымі мэтамі 2018 года з’яўляюцца павышэнне канкурэнтаздольнасці эканомікі, забеспячэнне ўстойлівага эканамічнага росту і стварэнне дадатковых умоў для яго паскарэння ў наступныя гады.
Указам устанаўліваецца пералік найважнейшых параметраў, якія з’яўляюцца ключавымі паказчыкамі эфектыўнасці работы ўрада і Нацыянальнага банка.
Прагназуецца, што валавы ўнутраны прадукт у 2018 годзе вырасце на 3,5 працэнта, экспарт тавараў і паслуг — на 5,7 працэнта. Практычна нулявы знешнегандлёвы баланс гарантуе стабільнасць рэсурснага забеспячэння эканомікі ва ўмовах чаканых выплат па знешнім доўгу і фарміраванне золатавалютных рэзерваў дзяржавы.
Нацыянальнаму банку і ўраду Прэзідэнтам Беларусі даручана прыняць неабходныя меры па абмежаванні ў 2018 годзе росту цэн не больш як на 6 працэнтаў.
Пры падпісанні ўказа кіраўніком дзяржавы пастаўлены ключавыя задачы сацыяльна-эканамічнага развіцця, у тым ліку аб збалансаванасці плацежнага балансу, далейшай краінавай і таварнай дыверсіфікацыі. Ураду даручана забяспечыць далейшы эканамічна абгрунтаваны рост зарплат у рэспубліцы на аснове стварэння перш за ўсё высокапрадукцыйных рабочых месцаў.
У 2018 годзе павінна быць скарочана міжрэгіянальная дыферэнцыяцыя ва ўзроўні і якасці жыцця насельніцтва. Паскорыцца работа па паляпшэнні эканамічнай сістэмы краіны ў мэтах забеспячэння доўгатэрміновых крыніц эканамічнага росту, стварэння новых прадпрыемстваў і вытворчасцей, нарошчвання экспартнага патэнцыялу. Як прадаўжэнне работы па стымуляванні дзелавой і інвестыцыйнай актыўнасці будзе фарміравацца сістэма гарантый для інвестараў.
