Нягледзячы на тое, што большасць навучэнцаў адправілася на канікулы, ва ўстановах прафесійнай адукацыі не пануюць цішыня і спакой. Напрыклад, у Слуцкім дзяржаўным сельскагаспадарчым прафесійным ліцэі кіпіць работа. Некаторыя навучэнцы змянілі інтэлектуальную працу на фізічную і засталіся ў ліцэі, каб папрацаваць. Ужо 10 гадоў тут дзейнічаюць брыгады другаснай занятасці.
Другасная занятасць навучэнцаў у вольны час арганізоўваецца ў Слуцкім дзяржаўным сельскагаспадарчым прафесійным ліцэі з 2011 года. Для гэтага ўстанова цесна супрацоўнічае з упраўленнем па працы, занятасці і сацыяльнай абароне насельніцтва Слуцкага райвыканкама.
Папярэдне навучэнцаў праінфармавалі аб магчымасці папрацаваць летам. Агітаваць і ўгаворваць нікога не даводзіцца — ад старэйшых таварышаў навучэнцы ведаюць, што гэта добрая магчымасць, якую нельга прапускаць. Калі заявы сабраны, фарміруюцца працоўныя брыгады. Кожны ўдзельнік брыгады афіцыйна прымаецца на работу, праходзіць медыцынскую камісію, інструктаж па ахове працы.
У склад брыгад другаснай занятасці ўваходзяць навучэнцы 1—3 курсаў. Як правіла, усяго за лета паспяваюць папрацаваць каля 100 навучэнцаў. У гэтым годзе плануецца, што ўдзельнікамі брыгад стануць 110 юнакоў і дзяўчат. Кожная брыгада працуе 10 дзён, пасля чаго работнікі атрымліваюць грошы. Некаторыя выказваюць жаданне і адпрацоўваюць не адну рабочую дзесяцідзёнку.
За кожнай брыгадай замацоўваецца майстар вытворчага навучання, усе работы выконваюцца пад яго наглядам. У залежнасці ад узросту навучэнцы працуюць на працягу дзвюх з паловай, трох з паловай або чатырох з паловай гадзін. Від работы таксама падбіраецца з улікам узросту, паколькі ў склад брыгад уваходзяць як паўналетнія, так і непаўналетнія юнакі і дзяўчаты. Яны могуць займацца рамонтам у інтэрнаце ці вучэбных кабінетах і майстэрнях: клеіць шпалеры, фарбаваць падлогу, аднаўляць мэблю. Прапануюцца работы па пашыве розных вырабаў, напрыклад, пасцельнай бялізны і ручнікоў для інтэрната. Юныя працаўнікі займаюцца і добраўпарадкаваннем тэрыторыі ліцэя — пасадкай і доглядам клумб.
— Кожны год навучэнцы з ахвотай застаюцца ў ліцэі працаваць. Для іх другасная занятасць — гэта выдатная магчымасць правесці вольны час з карысцю, паспрабаваць сябе ў розных відах працоўнай дзейнасці, атрымаць сваю першую заработную плату, — расказвае майстар вытворчага навучання Наталля Рыгораўна Маткіна. — Нам прыемна заўважаць, што працуюць яны адказна і старанна.
У такой дзейнасці многа плюсоў. Работа ідзе на карысць навучэнцам: яны могуць не толькі зарабіць грошы, але і атрымаць першыя працоўныя навыкі, правесці час у дружнай кампаніі. Іх праца мае і сацыяльную значнасць: у ліцэі ў першую чаргу імкнуцца далучаць да летняй занятасці навучэнцаў, якія знаходзяцца на дзяржаўным забеспячэнні, якія стаяць на розных відах уліку, асоб з асаблівасцямі псіхафізічнага развіцця. Для такіх навучэнцаў гэта магчымасць сацыялізацыі. Адначасова іх дзейнасць ідзе на карысць установы адукацыі: у ліцэі праводзіцца рамонт і добраўпарадкаванне. Пры гэтым не прыцягваюцца пабочныя працаўнікі, а навучэнцы, усведамляючы, што выконваюць работу для сябе і сваіх сяброў, працуюць сумленна. А паколькі сярод спецыяльнасцей, па якіх вядзецца падрыхтоўка ў ліцэі, ёсць і будаўнічыя, работы выконваюцца на высокім узроўні. Так што можна разлічваць, што да новага навучальнага года ліцэй значна пахарашэе.
Дар’я РЭВА.
