Палескі дзяржаўны ўніверсітэт прымаў сёлета 113 удзельнікаў заключнага этапу Рэспубліканскай алімпіяды па біялогіі, паведамляе карэспандэнт «Настаўніцкай газеты».
Ва ўніверсітэце прайшлі тэарэтычныя і практычныя туры інтэлектуальных спаборніцтваў.
Старшыня журы – дацэнт кафедры заалогіі біялагічнага факультэта БДУ кандыдат біялагічных навук Фёдар Сауткін – расказаў:
– Маладыя людзі вельмі добра справіліся з заданнямі. Адрыў па балах ва ўладальнікаў дыпломаў рознай ступені быў мінімальны.
У тэарэтычным туры, на які адводзілася 4 гадзіны, дзевяцікласнікам прапаноўваліся тры традыцыйныя блокі пытанняў: па анатоміі, батаніцы і заалогіі (20 пытанняў у кожным). У 10 класе былі яшчэ пытанні па экалогіі (усяго было 70 заданняў). Адзінаццацікласнікі разбіралі 105 пытанняў па батаніцы, анатоміі, заалогіі, экалогіі, фізіялогіі і біяхіміі раслін, цыталогіі, генетыцы, малекулярнай біялогіі.
Падчас практычнага тура вучні 9 і 10 класаў выконвалі ідэнтычныя заданні па батаніцы, заалогіі і анатоміі. Яны патрабавалі ад удзельнікаў дэманстрацыі фактычных ведаў, а таксама шырокага кругагляду, назіральнасці, логікі. Так, для выканання аднаго з заданняў, якое фігуравала ва ўсіх класах, неабходна разумець зоагеаграфію і ўмець супастаўляць геаграфічныя карты. Батаніка прысутнічала ў заданнях для 9 і 10 класаў і падразумявала наяўнасць ведаў у галіне як вышэйшых, так і ніжэйшых раслін, асабліва ў ліхеналогіі – навуцы аб лішайніках. У адзінаццацікласнікаў быў прадстаўлены набор кабінетаў па заалогіі і батаніцы, фізіялогіі і біяхіміі раслін, а таксама па цыталогіі і генетыцы – удзельнікі распазнавалі па фота розныя структуры жывёльных, раслінных, бактэрыяльных і іншых клетак. Прапаноўваліся і класічныя задачы на спадчыннасць, якія падразумявалі аналітычны падыход да іх рашэння з пункту гледжання аналізу філаграм і інш.
Некаторыя навучэнцы праявілі нестандартны погляд на тую ці іншую праблему, і ў выніку журы прымала рашэнне аб тым, каб залічыць адказ як правільны або часткова правільны.
Па выніках спаборніцтваў быў вызначаны 51 пераможца. Прыз міністра адукацыі быў уручаны Кірылу Чачанцу, вучню 9 класа Іванскай сярэдняй школы Чашніцкага раёна, які паказаў высокі вынік, але не атрымаў дыплом пераможцы.
Адразу дзве вучаніцы настаўніцы біялогіі настаўніка-метадыста Ушацкай сярэдняй школы Віцебскай вобласці Вольгі Жыткай атрымалі абсалютныя 1-я месцы. Гэта Кацярына Мартынюк у 11 класе і Ксенія Барысёнак – у 9-м. У 10 класе лепшай стала Аляксандра Канцавая з сярэдняй школы № 45 Магілёва (настаўніца Н.А. Ляцко).
– Кацярына Мартынюк і Ксенія Барысёнак атрымалі дыпломы І ступені на ўзроўні рэспублікі ўжо другі раз, – расказала В. Жыткая. – Дарэчы, у 2019-м яшчэ адна мая вучаніца, Ліза Літвінава, мела дыплом ІІІ ступені на рэспубліцы. На вобласці пераможцы ёсць штогод, сёлета тры дыпломы. Гэта вынік карпатлівай і працяглай працы вучаніц, а таксама іх фенаменальнай памяці. Каця і Ксенія з 7 класа пачалі пагружацца ў біялогію. У 8-м дзяўчынкі ўжо ездзілі на абласныя алімпіяды выступаць за 9 клас, дзе па выніках іх уключалі ў зборную рэспублікі.
Каця марыць стаць урачом-стаматолагам, думае і аб навуцы. Дарэчы, яна яшчэ да асноўнай алімпіяды выйграла алімпіяду Віцебскага медуніверсітэта (першая ў рэйтынгу).
Умовы для падрыхтоўкі алімпіяднікаў высокага ўзроўню ў школе ёсць. Калі ў раёне закрываліся сельскія школы, то па ўзгадненні з аддзелам адукацыі да нас у кабінет біялогіі з гэтых школ былі адпраўлены мікраскопы, прадметнае і покрыўнае шкло, іголкі прэпаравальныя, мікрапрэпараты і іншае абсталяванне.
Дзякуючы перамозе навучэнцаў на рэспубліцы, некалькі гадоў назад у школе абсталявалі сучасны кабінет біялогіі, мы забяспечылі сябе неабходнай літаратурай, інтэрактыўнай дошкай, ноўтбукам, аргтэхнікай. З’явілася магчымасць для анлайн-супрацоўніцтва з выкладчыкамі біяфака БДУ.
Надзея ЦЕРАХАВА
