Кантракт на правядзенне II Еўрапейскіх гульняў у Мінску будзе заключаны ў другой палове чэрвеня. Аб гэтым паведаміў у Нацыянальным алімпійскім камітэце кіраўнік дырэкцыі па правядзенні спартыўнага форуму ў 2019 годзе Георгій Катулін.
Беларуская дэлегацыя вярнулася са Скоп’я, дзе адбылося пасяджэнне выканкама Еўрапейскіх алімпійскіх камітэтаў (ЕАК). “На гэты час ЕАК вядзе актыўную работу па заключэнні кантрактаў з міжнароднымі федэрацыямі па відах спорту на ўдзел у Еўрапейскіх гульнях 2019 года. Больш за ўсё пытанняў цяпер па лёгкай атлетыцы. Плануецца, што гэта будуць камандныя спаборніцтвы, пройдуць яны на мінскім стадыёне “Дынама” ў некалькі этапаў: папярэднія, паўфінальныя і фінал. ЕАК гарантаваў, што ў Мінск прыедуць 750 удзельнікаў у гэтым відзе спорту. Што датычыцца кантракта на правядзенне Еўрагульняў-2019, то плануецца, што на працягу месяца, у чэрвені, гэты дакумент будзе падпісаны”, — расказаў Георгій Катулін.
Ён пацвердзіў, што ў праграму II Еўрапейскіх гульняў увойдуць 16 відаў спорту. У 11 з іх будзе праводзіцца кваліфікацыя да летніх Алімпійскіх гульняў у Токіа 2020 года. У найбліжэйшы час пачнецца распрацоўка лагатыпа Еўрагульняў у Мінску. “Адзінае пажаданне прадстаўнікоў ЕАК пры распрацоўцы эмблемы і нанясенні яе на атрыбутыку — уключэнне лагатыпа Еўрапейскіх алімпійскіх камітэтаў”, — падкрэсліў кіраўнік дырэкцыі.
У ходзе пасяджэння выканкама ЕАК у Скоп’і абмеркавалі з беларускім бокам пытанні гарантавання бяспекі ў Мінску ў 2019 годзе, а таксама гатоўнасці аб’ектаў. “Перад беларускай дэлегацыяй выступалі прадстаўнікі Рэспублікі Карэя, дзе ў 2018 годзе пройдуць зімовыя Алімпійскія гульні, і да іх па гатоўнасці аб’ектаў пытанняў было больш, чым да беларускага боку”, — адзначыў Георгій Катулін.
Старшынёй аргкамітэта Еўрагульняў-2019 назначаны Прэм’ер-міністр Беларусі Андрэй Кабякоў. Георгій Катулін узначаліў дырэкцыю Еўрагульняў. Генеральны сакратар НАК Беларусі Анатоль Котаў стане яго намеснікам. Першы віцэ-прэзідэнт НАК Андрэй Асташэвіч уключаны ў склад выканаўчага камітэта ЕАК у якасці прадстаўніка арганізатараў II Еўрагульняў. Сяргей Шаблыка зацверджаны спартыўным дырэктарам форуму, які мае адбыцца.
На пасяджэнні выканкама ЕАК у Скоп’і былі зацверджаны таксама тэрміны правядзення II Еўрапейскіх гульняў: адкрыццё адбудзецца на мінскім стадыёне “Дынама” 20 чэрвеня, спаборніцкая частка пройдзе з 21 па 30 чэрвеня 2019 года. Афіцыйным дэвізам Еўрагульняў будзе выказванне Bright you (“Яркі ты”).
