Аляксандр ЛУКАШЭНКА: “Гатовы прадаставіць швейцарскаму бізнесу самыя выгадныя ўмовы для інвесціравання”

Беларусь гатова прадаставіць швейцарскаму бізнесу самыя выгадныя ўмовы для інвесціравання. Аб гэтым Прэзідэнт Беларусі Аляксандр Лукашэнка заявіў на сустрэчы з кіраўніком Федэральнага дэпартамента замежных спраў Швейцарыі Іньяцыа Касісам.

Вітаючы замежнага госця, кіраўнік дзяржавы адзначыў, што Беларусь часта называюць усходняй Швейцарыяй. “Я абсалютна не супраць такога азначэння. Таму што Швейцарыя такі станоўчы статус у свеце заслужыла дзякуючы сваёй палітыцы, пастаяннаму нейтралітэту і вельмі вялікай прыстойнасці ва ўзаемаадносінах з іншымі дзяржавамі, — сказаў Аляксандр Лукашэнка. — Праўда, ёсць невялікія адрозненні. Усё ж такі мы краіна лясная, раўнінная, з вялікай колькасцю водных рэсурсаў. У вас, што прываблівае заўсёды людзей, — шмат добрых даступных гарналыжных курортаў. Горы вельмі ўпрыгожваюць вашу краіну. На жаль, у нас такога няма”.

Прэзідэнт адзначыў, што ў Беларусі са Швейцарыяй заўсёды былі добрыя адносіны. “Але я думаю, што нам ёсць куды расці, асабліва ў сферы гандлёва-эканамічных адносін. Эканоміка — галоўнае. Мы гатовы прадаставіць швейцарскаму бізнесу самыя выгадныя ўмовы для інвесціравання”, — падкрэсліў ён.

У якасці пазітыўнага прыкладу ўзаемадзеяння дзвюх краін Аляксандр Лукашэнка назваў рашэнні аб назначэнні пасла Швейцарыі ў Беларусі і аб адкрыцці ў Мінску пасольства гэтай краіны. “Гэта будзе добры крок у напрамку паглыблення нашага супрацоўніцтва, — сказаў кіраўнік дзяржавы. — Ваш візіт вельмі важны, ён своечасовы. І ўпэўнены, што ён дасць штуршок паглыбленню нашага супрацоўніцтва”.

Паміж дзвюма краінамі адзначаецца ўстойлівая актывізацыя палітычных кантактаў. У 2017 годзе ў Федэральным сходзе Швейцарыі ўпершыню створана парламенцкая група дружбы з Беларуссю. У 2018 годзе адбыўся афіцыйны візіт у Швейцарыю старшыні Палаты прадстаўнікоў Нацыянальнага сходу Уладзіміра Андрэйчанкі, у 2019 годзе — візіты першага намесніка прэм’ер-міністра і старшыні праўлення Нацбанка.

У маі 2019 года Федэральны савет Швейцарыі прыняў рашэнне аб павышэнні ўзроўню дыпламатычнага прадстаўніцтва ў Беларусі. А ўжо ў верасні Надзвычайны і Паўнамоцны Пасол Швейцарыі ў Беларусі Клод Альтэрмат уручыў даверчыя граматы кіраўніку беларускай дзяржавы. Днямі ў Мінску адкрылася Пасольства Швейцарыі.

Што тычыцца гандлёва-эканамічнага супрацоўніцтва, то ў апошнія гады дасягнуты рэкордныя паказчыкі ў част­цы росту беларускага экспарту тавараў і паслуг, прыцягнення інвестыцый.

За мінулы год тавараабарот Беларусі са Швейцарыяй склаў $258,2 млн, што больш як на 38 працэнтаў перавышае ўзровень 2018 года, экспарт дасягнуў $40 млн (плюс 34,7 працэнта), імпарт перасягнуў $218 млн (амаль на 40 працэнтаў больш). Беларусь пастаўляла ў Швейцарыю ў асноўным спецыфічныя тавары, кузавы для аўтамабіляў, вырабы з каменю або іншых мінеральных рэчываў, агародніну. Імпартаваліся электрычныя трансфарматары, часткі рухомага саставу, лекавыя сродкі і медыцынскае абсталяванне, вырабы з некаштоўных металаў. Значную долю імпарту складае абсталяванне для мадэрнізацыі беларускай прамысловасці.

Швейцарыя ўваходзіць у дзясятку краін — ключавых спажыўцоў беларускіх паслуг, у асноўным транспартных, камп’ютарных, тэлекамунікацыйных і інфармацыйных. Паказальна, што абарот паслуг з гэтай краінай перасягае тавараабарот. Са студзеня па лістапад 2019 года экспарт паслуг у Швейцарыю павялічыўся на 30,5 працэнта і склаў $180 млн.

Гэтая краіна таксама ўваходзіць у лік пяці найбуйнейшых інвестараў у Беларусь па паказчыку прамых замежных інвестыцый на чыстай аснове ($41 млн за студзень — верасень 2019 года). У Беларусі зарэгістраваны 103 арганізацыі са швейцарскімі інвестыцыямі, у тым ліку 37 сумесных і 66 замежных, а таксама 39 прадстаўніцтваў.