Прэзідэнт Беларусі Аляксандр Лукашэнка і кіраўнік расійскага ўрада Дзмітрый Мядзведзеў правялі 12 мая нефармальную сустрэчу ў аграгарадку Александрыя.
Сустрэча працягвалася больш за тры гадзіны. За гэты час Аляксандр Лукашэнка і Дзмітрый Мядзведзеў абмеркавалі ўсе найбольш актуальныя пытанні: двухбаковыя адносіны, эканамічнае супрацоўніцтва, рэгіянальную праблематыку, міжнародны парадак дня.
Дамоўленасць аб правядзенні гэтай сустрэчы была дасягнута яшчэ ў Сочы ў студзені. Кіраўнік беларускай дзяржавы паказаў расійскаму госцю свае родныя мясціны. Аляксандр Лукашэнка і Дзмітрый Мядзведзеў пачаставаліся натуральным бярозавым сокам, сфатаграфаваліся на памяць каля роднага дома беларускага лідара, а таксама пабывалі на Трафімавай крыніцы, адноўленай па даручэнні прэзідэнта каля трох гадоў назад. Вада ў ёй асвячоная і ўнікальна чыстая па сваіх уласцівасцях. За ёй едуць людзі з усіх навакольных раёнаў, нярэдка тут можна ўбачыць і расіян.
Нефармальная сустрэча Аляксандра Лукашэнкі і Дзмітрыя Мядзведзева адбылася пасля завяршэння афіцыйных мерапрыемстваў у Магілёве, дзе 12 мая прайшло пасяджэнне Савета Міністраў Саюзнай дзяржавы.
