Прапановы Савета па развіцці прадпрымальніцтва будуць абавязковыя для разгляду ўрадам. Гэтую прапанову падтрымаў Прэзідэнт Беларусі Аляксандр Лукашэнка, прымаючы з дакладам міністра эканомікі Уладзіміра Зіноўскага па пытаннях удасканалення рамеснай дзейнасці і аграэкатурызму, павышэння ролі Савета па развіцці прадпрымальніцтва.
“Вы прапаноўваеце прыняць рашэнні па Савеце па развіцці прадпрымальніцтва пры прэзідэнце, каб ён быў больш уключаны ў працэсы, якія адбываюцца ў асяроддзі прадпрымальнікаў. Асабліва калі мы змяняем нейкія правілы або з’яўляюцца новыя, каб савет мог уносіць прапановы, абмяркоўваць гэтыя прапановы ва ўрадзе, міністэрствах, ведамствах. Добрая норма, я з ёй згодны: калі савет уносіць прапанову ва ўрад, яна абавязкова павінна быць разгледжана. Я згодны з павышэннем ролі савета. Мы павінны яшчэ раз паглядзець на склад гэтага савета і зрабіць яго дзейсным інструментам”, — сказаў Аляксандр Лукашэнка.
Згодна з прадстаўленым дакументам, да кампетэнцыі савета будзе адносіцца разгляд і ўзгадненне праектаў нарматыўных прававых актаў, у тым ліку тэхнічнага характару, якія аказваюць уплыў на парадак і ўмовы ажыццяўлення прадпрымальніцкай дзейнасці. Таксама савет зможа ўносіць прапановы па ўдасканаленні заканадаўства непасрэдна ў Міністэрства эканомікі і савет Міністраў.
Члены савета змогуць удзельнічаць у рабоце грамадска-кансультатыўных саветаў па развіцці прадпрымальніцтва, створаных пры рэспубліканскіх органах дзяржкіравання і іншых арганізацыях, падпарадкаваных ураду, мясцовых органах улады.
Прэзідэнт падкрэсліў, што зняцце адміністрацыйных бар’ераў павінна прывесці да ўзмацнення адказнасці бізнесу. “Мы здымаем практычна ўсе бар’еры. З іншага боку, я патрабаваў вельмі жорсткую адказнасць бізнесменаў, кіраўнікоў кампаній за вынік, за тое, што адбываецца ў іх у фірмах. Дапусціў нейкія пралікі, не дай бог загінулі людзі — збірайся і ідзі ў турму. А як інакш: вось вам свабода і ніякай адказнасці? Не”, — адзначыў кіраўнік дзяржавы.
Пры гэтым Аляксандр Лукашэнка дадаў, што сустракаўся з бізнесменамі, і яны згодны з патрабаваннямі па ўзмацненні адказнасці. “І мяне ўжо многія папярэджваюць: не адыдзіце ад кантролю за намі. Калі вы не хочаце страціць кіруемасць у эканоміцы і, даслоўна гавару, парадзіць у краіне бардак, кантроль павінен быць. Я супраць празмернага кантролю, але трэба пакінуць тыя кантрольныя функцыі, якія патрэбны дзяржаве”, — заявіў беларускі лідар.
Прэзідэнт Беларусі Аляксандр Лукашэнка ў ходзе рабочай сустрэчы з міністрам эканомікі падтрымаў праект указа, накіраваны на далейшае развіццё рамесніцтва.
Праект указа прадугледжвае пашырэнне пераліку матэрыялаў, якія выкарыстоўваюцца для вырабу рамеснай прадукцыі, месцаў і спосабаў яе рэалізацыі. Сёння рамеснікі маюць права ажыццяўляць продаж сваіх вырабаў на рынках, кірмашах і іншых месцах, вызначаных мясцовымі органамі ўлады. У адпаведнасці з праектам указа яны змогуць прадаваць іх непасрэдна ў майстэрнях, дастаўляць і перасылаць пакупнікам па пазначаным адрасе. Рамеснікі таксама змогуць рэкламаваць сваю прадукцыю, у тым ліку ў інтэрнэце.
Асобна на сустрэчы абмяркоўвалася прапанова ўстанавіць магчымасць перадачы нерухомай маёмасці, якая выкарыстоўваецца або неэфектыўна выкарыстоўваецца і знаходзіцца ў рэспубліканскай або камунальнай уласнасці, у бязвыплатнае карыстанне, а пасля заканчэння трох гадоў — ва ўласнасць рамеснікам па цане, роўнай адной базавай велічыні. Аляксандр Лукашэнка адзначыў, што да гэтага пытання неабходна падыходзіць узважана, не дапускаючы разбазарвання дзяржаўнай уласнасці. “Трэба вельмі акуратна ставіцца да прыватызацыі, а фактычна гэта прыватызацыя дзяржаўнай уласнасці, — сказаў кіраўнік дзяржавы. — Гэта створана народам, і тут нам трэба быць вельмі акуратнымі і асцярожнымі. Тым не менш я хацеў бы, каб вы мне далажылі па гэтым праекце ўказа, спыніліся больш на гэтым пытанні”.
Як расказаў па выніках сустрэчы міністр эканомікі Уладзімір Зіноўскі, прынята рашэнне ў праекце ўказа, накіраваным на далейшае развіццё рамеснай дзейнасці, гэтую норму не прапісваць. “Кіраўнік дзяржавы звярнуў увагу, што такая норма ў заканадаўстве існуе, толькі трэба больш сур’ёзна ёй карыстацца і губернатарам, і міністрам. І сёння можна ў бязвыплатнае карыстанне аддаваць плошчы і можна прадаваць плошчы — тыя, якія знаходзяцца (у арэндзе. — Заўвага БелТА.) тры і больш гадоў. Пытанне: за якую велічыню?”, — расказаў міністр.
У цэлым, паводле слоў Уладзіміра Зіноўскага, прэзідэнт падтрымаў праект указа. “Мы лічым, што пасля прыняцця ўказа колькасць рамеснікаў можа падвоіцца”, — сказаў міністр. Цяпер у Беларусі зарэгістравана амаль 23,5 тысячы рамеснікаў.
“Павінны быць дзейсныя нормы, якія ўжо сёння наспелі для прыняцця, і нормы, якія здымаюць існуючыя бар’еры. Дакументы павінны быць жывымі і дзейснымі”, — сказаў Аляксандр Лукашэнка, каменціруючы прадстаўленыя на яго разгляд дакументы па лібералізацыі ўмоў вядзення бізнесу.
Прэзідэнт падкрэсліў, што міністры, якія прадстаўляюць дакументы, нясуць персанальную адказнасць за іх рэалізацыю. “Не дай бог мы нагарадзілі нейкіх норм, якія не дадуць выніку. Гэтага быць не павінна. Пыл у вочы пускаць нікому не трэба”, — заявіў ён.
Таксама Аляксандр Лукашэнка адзначыў, што ўсе новаўвядзенні павінны быць прадстаўлены грамадскасці ў выглядзе асобных паўнацэнных дакументаў, а не ў форме ўнясення змяненняў і дапаўненняў ва ўжо існуючыя нарматыўныя прававыя акты.
***
У Беларусі прадаставяць большую свабоду бізнесу, але павінен быць захаваны баланс у плане адказнасці за парушэнні. На гэта звярнуў увагу Прэзідэнт Беларусі Аляксандр Лукашэнка, прымаючы з дакладам дырэктара Нацыянальнага цэнтра заканадаўства і прававых даследаванняў Вадзіма Іпатава па законапраекце аб унясенні змяненняў і дапаўненняў у Кодэкс аб адміністрацыйных правапарушэннях і Працэсуальна-выканаўчы кодэкс аб адміністрацыйных правапарушэннях.
Праект дакумента накіраваны на лібералізацыю заканадаўства аб адміністрацыйнай адказнасці ў частцы прадпрымальніцкай дзейнасці. Аляксандр Лукашэнка заўважыў, што Беларусь у гэтай сферы будзе сярод вядучых дзяржаў.
“Мы даём большую свабоду нашаму бізнесу, беспрэцэдэнтную свабоду і льготы — ідзіце працуйце. З іншага боку, самая жорсткая адказнасць — за парушэнні. Каб не атрымалася, што мы прадэкларавалі адказнасць суб’ектаў гаспадарання, юрыдычных асоб, рамеснікаў і іншых за парушэнні, а на самай справе іншым нарматыўным прававым актам — законам — перакрэслілі ўсё гэта: свабода поўная — адказнасці мала або яе няма. Каб гэты баланс быў захаваны”, — папярэдзіў прэзідэнт.
Кіраўнік дзяржавы расказаў, што пры выпрацоўцы нарматыўных прававых актаў па развіцці прадпрымальніцтва прадстаўнікі бізнес-супольнасці скардзіліся на празмерна цяжкія штрафы і іншыя адміністрацыйныя пакаранні. “Вы прапаноўваеце гэтыя штрафы істотна зменшыць па пэўных артыкулах, скараціць сферу прымянення практыкі канфіскацыі маёмасці”, — адзначыў Аляксандр Лукашэнка.
Замацоўваюцца ўмовы прыцягнення суб’ектаў гаспадарання да адміністрацыйнай адказнасці. Таксама будзе пашыраны пералік падстаў для вызвалення ад адміністрацыйнай адказнасці пры ўмове ўстаранення парушэнняў і будуць выключаны з заканадаўства незапатрабаваныя на практыцы склады парушэнняў. “Давайце абмяркуем гэты праект закона, які павінен быць разгледжаны ў парламенце. Да 1 кастрычніка, як абяцалі, мы павінны ўвесці гэтыя нормы ў дзеянне. Укладзёмся ці не?” — пацікавіўся прэзідэнт.
Вадзім Іпатаў далажыў, што асноўная задача законапраекта — забяспечыць разумны і справядлівы баланс. Спагнанні, што накладаюцца, павінны быць суразмерныя нанесенай шкодзе, пры гэтым выплата штрафаў не павінна прыводзіць да ліквідацыі прадпрыемстваў і стрымлівання дзелавой ініцыятывы. У той жа час адміністрацыйныя санкцыі павінны забяспечваць эканамічную бяспеку і парадак у сферы прадпрымальніцтва.
