Аляксандр Лукашэнка падзякаваў польскаму боку за тое, што ў Польшчы бачаць Беларусь суверэннай і незалежнай

Беларусь гатова на самае цеснае супрацоўніцтва з Польшчай. Аб гэтым заявіў Прэзідэнт Беларусі Аляксандр Лукашэнка на сустрэчы з міністрам замежных спраў Польшчы Вітольдам Вашчыкоўскім.

Кіраўнік беларускай дзяржавы выказаў надзею, што пасля візіту міністра ў Беларусь краіны будуць больш інтэнсіўна развіваць двухбаковыя адносіны. “Нядобра нам глядзець адно на аднаго праз агароджу, — сказаў Аляксандр Лукашэнка. — Мы заўсёды знаходзілі агульную мову. Хацелася б, каб так было і цяпер”.
Аляксандр Лукашэнка звярнуў увагу, што краіны маюць агульную гісторыю, шмат этнічных беларусаў жыве ў Польшчы, як і палякаў у Беларусі. Кіраўнік дзяржавы адзначыў, што людзі ўсіх нацыянальнасцей у Беларусі карыстаюцца роўнымі правамі і ён асабіста ўдзяляе гэтаму шмат увагі. “Я павінен усё зрабіць для таго, каб яны нармальна жылі. Гэтая пазіцыя непахісная, мяне ніхто не пераканае ў адваротным”, — падкрэсліў прэзідэнт. Што тычыцца рэлігійных пытанняў, то Аляксандр Лукашэнка адзначыў, што і тут беларускую ўладу няма ў чым папракнуць, паколькі ніхто не перашкаджае наведваць чалавеку той храм, які ён лічыць патрэбным. “Я вельмі роўна да ўсіх стаўлюся. Так будзе і ў далейшым”, — падкрэсліў беларускі лідар.
Калі Польшча вітае такія падыходы, то бакі хутка вырашаць пытанні, якія сёння ёсць на парадку дня або з’явяцца ў будучыні, адзначыў Аляксандр Лукашэнка.
Беларусь і Польшча могуць адыграць значную ролю ў Еўропе і паўплываць на многія працэсы, адзначыў у час сустрэчы Прэзідэнт Беларусі Аляксандр Лукашэнка.
“Жывём побач, гісторыя, здаецца, адна і тая ж, часта перажываем адны і тыя ж праблемы, у кагосьці іх больш, у кагосьці менш, а шлях міністра з Варшавы ў Мінск аказаўся такім доўгім”, — заўважыў Аляксандр Лукашэнка. Паводле яго слоў, бакам ёсць аб чым пагаварыць. “Не скажу, што ёсць праблемы, якія нам цяжка ацаніць. Нават не скажу, што гэтыя праблемы або пытанні цяжкавырашальныя. Пры наяўнасці волі ў двух бакоў мы іх можам вырашыць. Галоўнае — дамовіцца аб крытэрыях. І тут, я думаю, праблем не будзе”, — сказаў кіраўнік беларускай дзяржавы. Ён падкрэсліў, што беларускі бок будзе зыходзіць з тых крытэрыяў выбудоўвання адносін, на якіх грунтуецца польская знешняя палітыка. “Як вы абараняеце свой суверэнітэт і незалежнасць, так і мы будзем абараняць. Тут у нас абсалютна няма разыходжанняў. Нават часам падглядаем у вас, як гэта рабіць. Як вы ажыццяўляеце сацыяльна-эканамічную палітыку ўнутры краіны, так і мы будзем рабіць. Пры гэтым будзем старацца рабіць так, каб ніхто нас ніколі не папракнуў у малой дэмакратыі, у яе адсутнасці. Мы будзем так рабіць, каб яе было не менш, чым у Польшчы”, — сказаў прэзідэнт.
“Калі вас такі фармат задавальняе, то мы вельмі хутка дамовімся. Адхіліць такі фармат, думаю, вам будзе складана, таму што мы дзейнічаем менавіта па вашых правілах”, — дадаў беларускі лідар.
Аляксандр Лукашэнка падзякаваў польскаму боку за тое, што ў Польшчы бачаць Беларусь суверэннай і незалежнай.
“Калі партнёры, з якімі мы вядзём дыялог, будуць ставіць нас перад выбарам: з Усходам вы ці з Захадам, гэта значыць з Расіяй вы ці з Еўрасаюзам, то нам такая пазіцыя не падыходзіць. Я абсалютна ўпэўнены, што і вам яна сёння не патрэбна. Думаю, што Польшча больш, чым хто-небудзь, зацікаўлена, каб Беларусь была не толькі незалежнай дзяржавай, але і стабільнай. Думаю, вам яшчэ адна нестабільная дзяржава на Захадзе пасля Украіны не патрэбна. Гэта будзе не на карысць Польшчы”, — адзначыў кіраўнік беларускай дзяржавы. Пры гэтым ён заўважыў, што Польшча ніколі не ставіла так пытанне.
“А вось разам з вамі мы можам адыграць значную ролю, знаходзячыся ў эпіцэнтры еўрапейскага кантынента. І разам мы можам значна паўплываць на многія працэсы, якія тут адбываюцца. У нашых інтарэсах, у інтарэсах Польшчы і Беларусі, але ні ў якім разе не на шкоду нашым суседзям”, — падкрэсліў прэзідэнт. “Але і свайго мы не аддадзім. Гэта ваша пазіцыя, гэта і наша пазіцыя”, — дадаў беларускі лідар.
У сваю чаргу Вітольд Вашчыкоўскі падкрэсліў, што новы польскі ўрад лічыць ненармальнай сітуацыю, калі на працягу многіх гадоў суседнія краіны не размаўлялі. “Таму мы вырашылі без усякіх папярэдніх умоў пачаць дыялог і ўрэгуляваць усе суседскія адносіны, якія можна будзе вырашыць у найбліжэйшы час”, — сказаў ён.
На сустрэчы быў абмеркаваны шырокі спектр пытанняў двухбаковых адносін, міжнароднага парадку дня, у тым ліку рэгіянальнай бяспекі. Шмат увагі бакі ўдзялілі разгляду пытанняў эканамічнага супрацоўніцтва, адзначыўшы вялікі патэнцыял у рэалізацыі інтэграцыйных праектаў з улікам транзітнага становішча Беларусі і Польшчы.

Пакінуць каментарый

Ваш электронны адрас не будзе апублікаваны. Абавязковыя палі пазначаны *