Прэзідэнт Беларусі Аляксандр Лукашэнка запатрабаваў павысіць кадравую і выканальніцкую дысцыпліну на месцах. Адпаведныя задачы кіраўнік дзяржавы паставіў у час рабочай паездкі ў Маларыцкі раён Брэсцкай вобласці, паведамілі ў прэс-службе беларускага лідара.
У праграме рабочай паездкі прэзідэнта першапачаткова значылася нарада аб сацыяльна-эканамічным развіцці Брэсцкай вобласці, аднак Аляксандр Лукашэнка ўнёс у яе нечаканыя карэктывы, прысвяціўшы першую палову дня наведванню прадпрыемстваў, вырашэнню канкрэтных праблем на месцах і размове з жыхарамі раённага цэнтра.
У першую чаргу кіраўнік дзяржавы прыехаў у ААТ “Маларыцкая райаграпрамтэхніка”. Дэталёва вывучыўшы стан спраў, прэзідэнт даручыў аднавіць сістэму райаграсэрвісаў ва ўсіх раёнах краіны. “Ні ў якім разе нельга разбурыць тую інфраструктуру, якая некалі была створана. Мы райаграсэрвісы павінны адрадзіць ва ўсіх раёнах. Трэба пашыраць сферу паслуг”, — сказаў ён.
Аляксандр Лукашэнка падкрэсліў, што такія абслуговыя арганізацыі арыентаваны не толькі на сельгаспрадпрыемствы, але і на ўвесь раён у цэлым, у тым ліку фермераў, асобных грамадзян. Перш за ўсё ў райаграсэрвісах неабходна дакладна вызначыцца з коштам тых ці іншых паслуг, каб цана была канкурэнтаздольнай і прывабнай для патэнцыяльных заказчыкаў. Акрамя таго, важна пашыраць іх пералік.
У час наведвання ААТ “Маларыцкая райаграпрамтэхніка” Аляксандр Лукашэнка выказаў немалую долю крытыкі наконт знешняга выгляду і ўтрымання вытворчых памяшканняў. Прыбыўшы на прадпрыемства, кіраўнік дзяржавы ўбачыў у многім безгаспадарчы падыход да справы. “Да 1 студзеня тут павінен быць наведзены парадак!” — даручыў прэзідэнт.
Аляксандр Лукашэнка таксама звярнуў увагу, што некаторыя вытворчыя памяшканні, якія не выкарыстоўваюцца, выстаўляюцца на аўкцыён у пошуках прыватнага інвестара. Аднак пры гэтым не прыкладаюцца ніякія намаганні, каб самастойна задзейнічаць гэтыя плошчы пад нейкія новыя віды работ ці паслуг.
У Маларыцкім раёне прэзідэнт таксама наведаў дзве фермы сельгаспрадпрыемства “Савушкіна”, дзе назіраецца абсалютна іншая карціна з пункту гледжання гаспадарлівага падыходу да арганізацыі вытворчага працэсу. Прадпрыемства працуе з прыбыткам і ўстойліва развіваецца. “Тут няма нічога таго, чаго няма ў краіне, толькі ідэальны парадак і адказнасць. Тэхналагічная і кадравая дысцыпліна — гэта галоўнае”, — падкрэсліў Аляксандр Лукашэнка.
Тут размова ішла не толькі аб рабоце гэтага паспяховага прадпрыемства, але і аб праблемных сельгасарганізацыях раёна, шляхах павышэння эфектыўнасці іх работы. Прэзідэнт падрабязна цікавіўся рознымі тэхналагічнымі працэсамі, па сутнасці, правёўшы на ферме выязную міні-нараду.
Падрабязнасці новага фармату рабочых паездак Аляксандр Лукашэнка раскрыў ужо на нарадзе ў Маларыцкім райвыканкаме: “Калі гаварыць аб нейкім маштабе, задуме маіх паездак за апошнія дні, то, шчыра кажучы, я хацеў бы больш пільна вывучыць сітуацыю на месцах”, — сказаў прэзідэнт.
Кіраўнік дзяржавы адзначыў, што падставай для правядзення нарад з выездам у рэгіёны служаць не нейкія надзвычайныя абставіны. “На кожным месцы мяне цікавіла тая ці іншая праблема, — сказаў прэзідэнт. — Кантраляваць выкананне ключавых паказчыкаў эфектыўнасці работы, якія прапісаны ў “Матрыцы задач для вертыкалі ўлады”, я буду пастаянна. Хачу проста папярэдзіць, нікога ні ў якім разе не запалохваючы: усе рашэнні, якія я прымаю тут, на месцы, павінны няўхільна выконвацца, чаго б гэта ні каштавала — і ўраду, і губернатару, і кіраўнікам прадпрыемстваў”.
Не менш важная падстава быць на месцах — кантроль за ходам работ, якія праводзяцца. Пры гэтым пытанне не толькі ва ўборачнай кампаніі, нягледзячы на яе важнасць. “Мы ўжо навучыліся ўбіраць. Усё, што трэба было ад дзяржавы, і нават больш, зроблена. Трэба глядзець глыбей, на тэхналогіі, — упэўнены кіраўнік дзяржавы. — Я цудоўна разумею: усе ўсё адначасова не зробяць. Але да чаго імкнуцца, мы паказалі ўжо”.
Прэзідэнт звярнуў увагу, што стыль і тактыка яго рабочых паездак мяняецца. “Я разумею, што кожны губернатар і старшыня райвыканкама знойдуць, што паказаць. Але калі я буду глядзець толькі на прыгожае, то ўсё, што застанецца за кадрам, можа не атрымаць свайго развіцця”, — заўважыў кіраўнік дзяржавы.
Губернатар, кіраўнікі раёна і канкрэтных прадпрыемстваў на нарадзе далажылі аб выніках і перспектывах сацыяльна-эканамічнага развіцця па даручаных ім напрамках. Аб недахопах і хібах у рабоце праінфармаваў старшыня Камітэта дзяржкантролю Леанід Анфімаў.
“Усё залежыць ад людзей і ад кіраўніка. Калі кіраўнік не кіруе калектывам, толку не будзе, — падкрэсліў прэзідэнт. — Галоўнае — гэта эканоміка. Усе павінны на яе працаваць”.
“Хачу папярэдзіць і міністра, і адказных урадавых чыноўнікаў: так, трэба часам прымаць нейкія рашучыя меры, але гэта не значыць, што мы не павінны раіцца на месцах са спецыялістамі. Трэба супастаўляць, узважваць, раіцца і з лепшымі, і з сярэднімі гаспадаркамі. І іх трэба бачыць. Таму вельмі акуратна. Ні ў якім разе нельга ламаць праз калена”, — папярэдзіў Аляксандр Лукашэнка.
У час нарады не раз звярталася ўвага на важнасць руплівага расходавання бюджэтных сродкаў, падтрымання высокай кадравай і выканальніцкай дысцыпліны. Паводле слоў кіраўніка дзяржавы, важна “перадаць напружанне ўніз” па ўсёй вертыкалі, пачынаючы ад губернатара да канкрэтных выканаўцаў і кіраўнікоў на месцах. “Любое невыкананне — гэта бардак, развал не толькі ўлады, але і дзяржавы. І мы роўненька скоцімся на ўкраінскі варыянт”, — падкрэсліў беларускі лідар.
У плане папярэджвання і рэагавання на магчымыя злоўжыванні або бяздзейнасць на месцах на дапамогу кіраўнікам павінны своечасова прыходзіць прадстаўнікі сілавых структур. “Міліцыя, КДБ, пракуроры — яны ўсе павінны вярцецца вакол кіраўніка і яму дапамагаць. Я хачу, каб гэта ўся краіна пачула, — заявіў прэзідэнт. — Каб больш не было скаргаў, што на кагосьці “наехаў” міліцыянер, КДБ, на кагосьці пракурор “накаціў”. Усе яны цудоўна разумеюць, што мы жывём ад таго ж калгаса і прамысловага прадпрыемства”.
Завяршаючы нараду, Аляксандр Лукашэнка адзначыў, што ўзнятыя пытанні тычацца не толькі Маларыцкага раёна, але і ўсёй краіны ў цэлым. Задачы пастаўлены ў розных сферах і ўспрыняты кіруючай вертыкаллю. “Наколькі гэта магчыма, мабілізуйце свае калектывы, збярыцеся самі — і наперад. Іншага нам не дадзена. Дзейнічайце!” — заклікаў прэзідэнт.
Знаходзячыся ў Маларыце, кіраўнік дзяржавы не раз спыняўся для размовы з мясцовымі жыхарамі. Пытанні ўзнімаліся самыя розныя — ад развіцця масавага спорту да цэнаўтварэння і сацыяльнай падтрымкі.
Акрамя таго, каля мясцовага спартыўнага комплексу, дзе прызямліўся прэзідэнцкі верталёт, зайшла размова аб развіцці спорту, у тым ліку дзіцяча-юнацкага. Аляксандр Лукашэнка даў шэраг канкрэтных даручэнняў у гэтай галіне.
“Будзе вынік — атрымлівай дадаткова. Трэба даць магчымасць гуляць тым, хто хоча гуляць, а потым ужо плаціць грошы. А то прыйдуць да губернатара або прэзідэнта: дай грошай. А вынік дзе?” — адзначыў кіраўнік дзяржавы, гаворачы аб зарплатах спартсменаў.
Аналагічны падыход неабходны і адносна зарплат адміністрацыйнага складу ў шэрагу клубаў, якія трэба прывязаць выключна да фінансавага выніку.
Прэзідэнт выказаў і крытычную заўвагу наконт выступлення асобных беларускіх атлетаў на Алімпіядзе ў Рыа-дэ-Жанэйра. “Некаторыя паказваюць вынікі горшыя, чым да Алімпіяды пры адборы. Паўстае пытанне: чаго паехалі?” — заўважыў кіраўнік дзяржавы.
Аляксандр Лукашэнка таксама адзначыў, што ў Беларусі створаны ўсе ўмовы для таго, каб кожны меў магчымасць дастойнага заработку, аднак для гэтага неабходна прыкладаць намаганні. “У Беларусі толькі лянівы можа не зарабіць. Мы што, ваюем, вайна ў нас ідзе або яшчэ штосьці?.. Трэба проста крыху варушыцца”, — сказаў прэзідэнт, размаўляючы з жыхарамі райцэнтра.
Пры гэтым дзяржава заўсёды акажа падтрымку тым, каму яна сапраўды неабходна. “Дапамагаць мы будзем. Калі вы зробіце крок, мы зробім насустрач крок (я маю на ўвазе ўсю краіну). А калі вы будзеце склаўшы рукі сядзець і глядзець, што нехта вам штосьці прынясе, то, ведаеце, дапамагаюць таму, хто сам гэтага хоча”, — заявіў беларускі лідар.
Паводле слоў прэзідэнта, вытворцы ў краіне пачынаюць выходзіць з той цяжкай сітуацыі, у якой яны апынуліся ў сувязі з сітуацыяй на знешніх рынках. “Нам складана, за год гэта не зробіш, але мы пачынаем паднімацца”, — сказаў Аляксандр Лукашэнка.
Адначасова ён падкрэсліў недапушчальнасць цэнаснага перакосу ў краіне. “Галоўнае, каб не было цэнаснага перакосу: калі няма магчымасці падняць зарплату, важна, каб цэны ў гэты час не раслі. Калі гэта ёсць — гэта вялікі недахоп. Цэны расці не павінны цяпер”, — сказаў прэзідэнт.
Аляксандр Лукашэнка лічыць, што адна з самых галоўных задач для дзяржавы — забяспечыць людзей работай. “Сваё шчасце трэба шукаць на сваёй зямлі, — упэўнены беларускі лідар. — Мы павінны зрабіць так, каб і пасля нас людзі жылі нармальна і працавалі — гэта галоўная мая задача”.
