Прэзідэнт Беларусі Аляксандр Лукашэнка правёў рабочую сустрэчу з міністрам аховы здароўя Уладзімірам Каранікам.
“Пры назначэнні мы дамовіліся, што праз пэўны прамежак часу, калі вы будзеце гатовы, даложыце, па-першае, аб удасканаленні сістэмы аховы здароўя па ўсіх напрамках. Што больш за ўсё хвалюе не толькі мяне, але і грамадства з-за апошніх падзей у сістэме, пытанні закупак медыцынскага абсталявання і цэнаўтварэння”, — сказаў Аляксандр Лукашэнка.
Прэзідэнт падкрэсліў, што справядлівае цэнаўтварэнне на лякарствы і работа без пасрэднікаў пры закупцы абсталявання — адны з найважнейшых пытанняў. “Зразумела, што пасрэднікі да 30 працэнтаў, а часам і больш, павялічваюць цэны на абсталяванне. Тое ж самае тычыцца і лекавых сродкаў, прэпаратаў, субстанцый і г.д., — дадаў ён. — Словам, вы, працуючы ў асноўным звяне нашай аховы здароўя, ведаеце вострыя праблемы і “хваробу” нашай аховы здароўя. І ў гэтых адносінах нам трэба было б прыкласці сур’ёзныя намаганні. Цягнуць нельга”.
Аляксандр Лукашэнка таксама ўзняў пытанне вытворчасці лекавых сродкаў у Беларусі і імпартазамяшчэння.
Паводле яго слоў, краіна траціць на закупку лякарстваў за мяжой да $500 млн. “Недапушчальна шмат. Тым больш мы можам вырабляць свае лякарствы”, — адзначыў прэзідэнт. Раней, нагадаў ён, была пастаўлена задача наладзіць у краіне вытворчасць паловы аб’ёму лекавых сродкаў, якія закупляюцца. Даручэнне было выканана.
“Цяпер трэба звярнуць сур’ёзную ўвагу на субстанцыі і, як гавораць у прамысловасці, камплектуючыя гэтых лякарстваў. Трэба глыбей займацца распрацоўкай, вытворчасцю лекавых сродкаў”, — сказаў Аляксандр Лукашэнка.
Ён таксама звярнуў увагу на ўдасканаленне сістэмы аховы здароўя ў частцы аказання першаснай і спецыялізаванай дапамогі. “Ламаць нічога не трэба. Гэта поўнае глупства. І вы, і ўсе мы выраслі на гэтай сістэме. Але нічога не бывае дадзенага раз і назаўсёды, трэба ўдасканальваць гэтую сістэму. Калі ў вас па гэтым і іншых пытаннях ёсць прапановы, я гатовы іх выслухаць. Калі яны прымальныя, мы зробім усё для таго, каб іх рэалізаваць ужо ў гэтым годзе”, — заявіў прэзідэнт.
Уладзімір Каранік далажыў кіраўніку дзяржавы аб выкананні яго даручэнняў, праінфармаваў аб бягучым стане спраў і існуючых праблемах у сістэме аховы здароўя, магчымых шляхах іх вырашэння.
