Такія спаборніцтвы арганізоўваюць на Магілёўшчыне не ўпершыню. Яны набіраюць папулярнасць сярод моладзі, расказаў карэспандэнту «Настаўніцкай газеты» першы намеснік начальніка галоўнага ўпраўлення па адукацыі Магілёўскага аблвыканкама Ігар Лашкевіч.
— Зараз колькасць удзельнікаў значна большая, чым раней. Гэта сведчыць аб тым, што ва ўстановах прафесійнай адукацыі якасна праводзіцца фізкультурна-аздараўленчая работа. Навучэнцы сапраўды зацікаўлены рэгулярным займаннем спортам. Адметна, што для гэтага створаны ўсе ўмовы: у кожным каледжы належная спартыўная база, — паведаміў суразмоўнік.
Перад пачаткам стартаў І. Лашкевіч сумесна з сярэбраным прызёрам Алімпійскіх гульняў па цяжкай атлетыцы Андрэем Рыбаковым павітаў спартсменаў. А пасля разам з сынамі падтрымаў моладзь уласным прыкладам. У практыкаванні жым штангі лежачы на лаве І. Лашкевіч узяў вагу 95 кг. Добра выступілі і хлопчыкі: у дзевяцігадовага Ігара вынік 35 кг, у васьмігадовага Антона — 20 кг.
Непасрэдна ў ходзе турніру маладыя людзі спаборнічалі ў 13 вагавых катэгорыях ад 50 да плюс 85 кг. Удзельнікі выконвалі тры падыходы ў трох практыкаваннях спартыўнай праграмы. Яны прысядалі са штангай на плячах, рабілі жым штангі лежачы на лаве і станавую цягу.
Юныя аматары сілавога трохбор’я паказалі выдатную спартыўную падрыхтоўку. Былі нават пэўныя рэкорды. Напрыклад, навучэнка Магілёўскага дзяржаўнага каледжа сферы абслугоўвання здолела ўзяць вагу ў станавой цязе ў 132,5 кг! Аляксей Ганькоў і Аляксандр Мірымбаеў з Магілёўскага дзяржаўнага політэхнічнага каледжа, Уладзіслаў Звягінцаў з Бабруйскага дзяржаўнага механіка-тэхналагічнага каледжа і Аляксей Рымар з Бабруйскага дзяржаўнага каледжа імя А.Я. Ларына ў станавой цязе паднялі вагу у 190 кг.
Па агульнакамандных выніках сярод навучэнцаў устаноў ССА пераможцамі сталі прадстаўнікі Магілёўскага дзяржаўнага політэхнічнага каледжа. Другое месца заваявалі навучэнцы Архітэктурна-будаўнічага каледжа БРУ, трэцяе — Магілёўскага дзяржаўнага тэхналагічнага каледжа. Сярод зборных каманд устаноў ПТА па групе дзяўчат лідарамі сталі навучэнкі Магілёўскага дзяржаўнага каледжа сферы абслугоўвання, Бабруйскага дзяржаўнага гандлёва-эканамічнага каледжа і Магілёўскага дзяржаўнага каледжа будаўніцтва імя А.П. Старавойтава. У групе юнакоў не было роўных прадстаўнікам Магілёўскага дзяржаўнага агралесатэхнічнага каледжа імя К.П. Арлоўскага, Магілёўскага дзяржаўнага эканамічнага прамыслова-тэхнічнага каледжа і Магілёўскага дзяржаўнага электратэхнічнага каледжа.
Ганна СІНЬКЕВІЧ
Фота Магілёўскага абласнога цэнтра
фізічнага выхавання навучэнцаў і студэнтаў
