Учора міністр адукацыі Ігар Васільевіч Карпенка прыняў удзел у датэрміновым галасаванні на выбарах дэпутатаў Палаты прадстаўнікоў Нацыянальнага сходу Рэспублікі Беларусь. На выбарчы ўчастак кіраўнік ведамства прыехаў разам з сям’ёй.
Сістэма адукацыі традыцыйна прымае самы актыўны ўдзел у выбарах. І гэта невыпадкова. Па словах Ігара Васільевіча, школа заўсёды была сацыякультурным цэнтрам любога мікрараёна, пасёлка, аграгарадка, раённага цэнтра. Размяшчэнне выбарчых участкаў на базе ўстаноў адукацыі стварае грамадзянам зручныя ўмовы для волевыяўлення. Настаўнікі ўваходзяць у склад выбарчых камісій, якія фарміруюцца зыходзячы з прапаноў, што паступаюць ад палітычных партый, грамадскіх аб’яднанняў. Як адзначыў міністр адукацыі, настаўніцтва не знаходзіцца ў баку ад тых грамадскапалітычных падзей, якія адбываюцца ў краіне. Настаўнікі — актыўныя грамадзяне, якія таксама ўдзельнічаюць у працэсе выхавання будучых грамадзян.
Па словах Ігара Васільевіча, вызначыцца з выбарам, праграмай кандыдатаў было нескладана. Вядзецца актыўная агітацыя, інфармацыя аператыўна даносіцца да насельніцтва праз СМІ. “Для мяне як міністра адукацыі вельмі важна, якім будзе парламент, паколькі ў нас на выхадзе новая рэдакцыя Кодэкса аб адукацыі і адпаведна з новым складам парламента давядзецца вельмі актыўна працаваць, каб яго разгледзець і прыняць. Гэта, сапраўды, вельмі сур’ёзная работа”, — падзяліўся Ігар Васільевіч, адзначыўшы, што годны кандыдат павінен валодаць адпаведным узроўнем ведаў, дасягнуць пэўных вынікаў і ў прафесіі, і ў жыцці, быць кампетэнтным у пытаннях жыццядзейнасці як Мінска, так і ў цэлым дзяржавы.
Нагадаем, сёння завяршаецца датэрміновае галасаванне, якое праходзіць з 12 па 16 лістапада. Права прыняць у ім удзел маюць выбаршчыкі, якія заўтра, 17 лістапада, у асноўны дзень галасавання, не змогуць знаходзіцца па месцы жыхарства.
Ігар ГРЭЧКА.
Фота Алега ІГНАТОВІЧА.