Драйвер росту для беларускай эканомікі

Энергетыка стала драйверам росту для беларускай эканомікі. Такое меркаванне выказаў міністр энергетыкі Беларусі Уладзімір Патупчык на адкрыцці Беларускага энергетычнага і экалагічнага форуму.

“Сёння можна сказаць, што энергетыка стала драйверам росту для беларускай эканомікі, таму мы не можам дазволіць сабе спыніцца ў развіцці — неабходна шукаць новыя тэхналагічныя рашэнні, ствараць умовы для ўкаранення інавацыйных праектаў, развіваць айчынныя навуковыя даследаванні ў сферы энергетыкі, рыхтаваць кваліфікаваныя кадры”, — адзначыў Уладзімір Патупчык.

Больш за 20 гадоў форум з’яўляецца ўнікальнай пляцоўкай для абмеркавання актуальных пытанняў развіцця энергетыкі і экалогіі, павышэння энергаэфектыўнасці, вывучэння сусветнага вопыту. Гэтае мерапрыемства накіравана на ўкараненне інавацыйных тэхналогій, умацаванне ўзаемавыгаднага і доўгатэрміновага супрацоўніцтва беларускіх і замежных прадпрыемстваў і кампаній, прыцягненне ў краіну інвестыцый.

Уладзімір Патупчык звярнуў увагу, што для павышэння энергетычнай бяспекі краіны праводзіцца мэтанакіраваная палітыка па нарошчванні энергетычнага патэнцыялу. Па выніках рэалізацыі дзвюх дзяржаўных праграм мадэрнізацыі беларускай энергасістэмы ўведзены ў эксплуатацыю каля 2000 МВт высокаэфектыўных генерыруючых магутнасцей, значна павышана эфектыўнасць яе работы, зніжаны да 40 працэнтаў знос асноўных фондаў, скарочана залежнасць рэспублікі ад імпартуемых энергарэсурсаў.

Беларусь займае лідзіруючыя пазіцыі сярод краін СНД па развіцці газазабеспячэння. За апошнія 20 гадоў у краіне пабудавана ў 4 разы больш газаправодаў, чым было пракладзена да 1994 года.

Найважнейшым нацыянальным праектам Уладзімір Патупчык назваў узвядзенне ў краіне атамнай электрастанцыі. Паралельна з будаўніцтвам Беларускай АЭС праводзіцца работа па інтэграцыі яе ў энергасістэму.

Міністэрства прыродных рэсурсаў і аховы навакольнага асяроддзя чакае значны экалагічны эфект ад увядзення Беларускай атамнай электрастанцыі, заявіла першы намеснік міністра прыродных рэсурсаў і аховы навакольнага асяроддзя Ія Малкіна на пленарным пасяджэнні XXI Беларускага энергетычнага і экалагічнага форуму.

“Сёння мы сумесна з Міністэрствам энергетыкі рэалізоўваем даволі вялікую колькасць праектаў, якія даюць магчымасць гаварыць аб значным станоўчым, перспектыўным развіцці энергетычнай галіны ў цэлым. Мы, безумоўна, адзначаем значны экалагічны эфект ад увядзення ў строй Беларускай атамнай электрастанцыі”, — адзначыла Ія Малкіна.

Паводле яе слоў, эканоміка, энергетыка, экалогія — гэта тры кіты, якія пакладзены ў аснову ўстойлівага развіцця любой дзяржавы, і Беларусь не з’яўляецца выключэннем. “Спадзяёмся, што тыя новыя падыходы, якія будуць выпрацаваны і ўдзельнікамі гэтага форуму, і ў далейшым дзяржавамі, дадуць магчымасць стварыць тое ўстойлівае грамадства, пра якое мараць усе дзяржавы ў свеце”, — сказала Ія Малкіна.

Нацыянальны план дзеянняў па ўкараненні прынцыпаў зялёнай эканомікі будзе зацверджаны ў Беларусі да канца года, заявіла таксама першы намеснік міністра прыродных рэсурсаў і аховы навакольнага асяроддзя на пленарным пасяджэнні.

XXI Беларускі энергетычны і экалагічны форум прайшоў у Мінску 11—14 кастрычніка. Дзелавая праграма форуму ўключала пленарнае пасяджэнне, міжнародныя канферэнцыі, навукова-практычныя семінары, прэзентацыі кампаній — удзельніц выстаўкі, на якіх айчынныя і замежныя эксперты прадставілі сучасныя тэхналагічныя рашэнні ў галіне энергетыкі і экалогіі.

Мэта правядзення форуму — садзейнічанне інавацыйнаму развіццю паліўна-энергетычнага сектара Беларусі.

Пакінуць каментарый

Ваш электронны адрас не будзе апублікаваны. Абавязковыя палі пазначаны *