Гадавіна аварыі на ЧАЭС нагадвае аб каштоўнасці чалавечага жыцця

Такое меркаванне выказаў міністр замежных спраў Уладзімір Макей на адкрыцці ў штаб-кватэры ААН у Нью-Ёрку фотавыставы “Чарнобыль: трагедыя, урокі, надзея”, паведамілі ў прэс-службе беларускага МЗС.

Выстава арганізавана Беларуссю і прымеркавана да трыццатай гадавіны чарнобыльскай трагедыі. Звяртаючыся да прысутных, Уладзімір Макей назваў гадавіну трагедыі напамінам аб неабходнасці захавання ідэалаў, звязаных з каштоўнасцю чалавечага жыцця і з адказным стаўленнем да навакольнага асяроддзя. Такое стаўленне да памяці аб катастрофе патрабуе не толькі палітычных і эканамічных мер, але і простага чалавечага дыялогу, узаемаразумення, супрацоўніцтва і суперажывання, падкрэсліў міністр.

З прывітальным словам на адкрыцці выставы выступіла намеснік генеральнага сакратара ААН адміністратар Праграмы развіцця ААН Хелен Кларк. Яна падзякавала беларускаму боку за арганізацыю экспазіцыі. Як каардынатар міжнароднага ўзаемадзеяння па Чарнобылі Хелен Кларк адзначыла важнасць работы Беларусі, Расіі і Украіны па захаванні чарнобыльскага вопыту ў інтарэсах сусветнай супольнасці.

Партнёрамі Беларусі ў арганізацыі мерапрыемства сталі амерыканскія няўрадавыя арганізацыі. На выставе прадстаўлены работы амерыканскага фатографа Філіпа Гросмана, на якіх адлюстраваны сучасны стан зоны адчужэння вакол Чарнобыльскай АЭС. Цырымонію адкрыцця наведалі кіраўнікі і супрацоўнікі місій дзяржаў — членаў ААН у Нью-Ёрку, агенцтваў сістэмы ААН, прадстаўнікі няўрадавых арганізацый і амерыканскай грамадскасці.

У прэс-службе МЗС адзначылі, што фотаэкспазіцыя стала адным з цэлай серыі мерапрыемстваў у ААН, прымеркаваных да 30-годдзя чарнобыльскай катастрофы. Раней адбылося пасяджэнне Міжустаноўскай групы ААН па Чарнобылі з удзелам шэрага краін і міжнародных арганізацый. Генеральная асамблея ААН 26 красавіка правядзе ўрачыстае памятнае пасяджэнне, прысвечанае гадавіне трагедыі. Беларусь таксама плануе арганізаваць круглы стол для разгляду міжнароднага чарнобыльскага вопыту ў кантэксце дзейнасці ААН па рэагаванні на тэхнагенныя аварыі.

На гэтым тыдні міністр замежных спраў Беларусі знаходзіўся з рабочым візітам у Нью-Ёрку. Уладзімір Макей прыняў удзел у сустрэчы Усходнееўрапейскай рэгіянальнай групы ААН, старшынёй якой у красавіку выступае Беларусь. Удзельнікі сустрэчы адзначылі станоўчыя змяненні ў дзейнасці Генеральнай асамблеі ААН, а таксама важную ролю яе старшыні ў іх ініцыіраванні. Члены групы абмяняліся думкамі адносна шляхоў умацавання ролі і іміджу групы ў ААН, максімальнага выкарыстання яе патэнцыялу ў агульных інтарэсах дзяржаў — членаў ААН.

Пакінуць каментарый

Ваш электронны адрас не будзе апублікаваны. Абавязковыя палі пазначаны *