Нацыянальная акадэмія навук Беларусі становіцца рэальнай навукова-вытворчай карпарацыяй. Такое меркаванне выказаў старшыня Савета Рэспублікі Нацыянальнага сходу Міхаіл Мясніковіч пасля цырымоніі адкрыцця ў Мінску эксперыментальнага ўчастка па выдзяленні чалавечага лактаферыну з малака трансгенных коз у інстытуце мікрабіялогіі НАН Беларусі.
“Нацыянальная акадэмія навук становіцца рэальнай навукова-вытворчай карпарацыяй, вучоныя атрымліваюць прадукты ў лабараторных умовах, выходзяць на серыйную вытворчасць таварнай прадукцыі”, — сказаў Міхаіл Мясніковіч.
Спікер верхняй палаты парламента адзначыў, што работа вучоных у біятэхналагічным напрамку не абмяжуецца праектам па выдзяленні чалавечага лактаферыну з малака трансгенных коз. Ёсць шэраг напрамкаў біятэхналагічнага профілю. “Гэта канкрэтныя тавары, якія вырабляюцца для патрэб эканомікі краіны і нашых партнёраў з замежных кампаній, зацікаўленых у гэтых таварах. Напрыклад, ёсць папярэдняя дамоўленасць, сур’ёзнае прапанаванне па турэцкіх інвестыцыях: выкарыстоўваць вытворчасць асобных тавараў біялагічнага профілю для рэалізацыі сумесна на замежных рынках”, — адзначыў Міхаіл Мясніковіч.
Выказваючы меркаванне адносна ідэі стварэння рэальнага біятэхналагічнага парка, спікер сказаў, што яна мае права на жыццё. “Белбіяград” як праект змяшчае тры ключавыя напрамкі — біятэхналогіі, фармацэўтычная прадукцыя і нанатэхналогіі. Гэта актуальна для нашай эканомікі, таму што тут вельмі высокая ўдзельная вага дабаўленай вартасці, нізкая матэрыялаёмістасць, нізкая энергаёмістасць, але высокая дабаўленая вартасць за кошт інтэлектуальнага ўкладу”, — падкрэсліў старшыня Савета Рэспублікі.
Лактаферын — унікальны поліфункцыянальны бялок, які прысутнічае ў малацэ чалавека і іншых млекакормячых. Мае перспектыўныя ў біяфармацэўтычных адносінах уласцівасці: антыбактэрыяльныя, антывірусныя, антымікробныя, антыканцэрагенныя, супрацьзапаленчыя, імунамадулюючыя, антыаксідантныя і рэгенератыўныя. Гэты бялок запатрабаваны пры вытворчасці біялагічна актыўных дабавак, дзіцячага і дыетычнага харчавання, фармацэўтычнай і парфумерна-касметычнай прадукцыі. Сусветная патрэба ў лактаферыне дасягае 90 т штогод. Кошт аднаго грама рэкамбінантнага чалавечага бялку складае каля $900.
