Краінам з сярэднім узроўнем даходу неабходна прызнанне і большая падтрымка

Другі камітэт (эканамічныя і фінансавыя пытанні) Генеральнай Асамблеі ААН прыняў кансэнсусам рэзалюцыю “Супрацоўніцтва ў мэтах развіцця з краінамі з сярэднім узроўнем даходу”. Актыўны ўдзел у распрацоўцы рэзалюцыі прыняла беларуская дэлегацыя, паведамілі ў прэс-службе Міністэрства замежных спраў.

У дакуменце падкрэсліваецца неабходнасць належнага ўліку праблем і спецыфічных цяжкасцей краін з сярэднім узроўнем даходу і змяшчаецца заклік да сістэмы развіцця ААН падтрымліваць намаганні гэтай катэгорыі краін па дасягненні мэт у галіне ўстойлівага развіцця.

“У выступленні пры прыняцці рэзалюцыі дэлегацыя Беларусі падкрэсліла важнасць прызнання і падтрымкі гэтай катэгорыі краін, у якіх пражывае большасць насельніцтва свету і якія адыгрываюць важную сістэмную ролю ў дасягненні мэт устойлівага развіцця”, — праінфармавалі ў прэс-службе. Таксама адзначана гатоўнасць беларускага боку прыняць актыўны ўдзел у падрыхтоўцы пасяджэння высокага ўзроўню па тэматыцы краін з сярэднім узроўнем даходу восенню 2018 года.

Дзяржавы — члены ААН падтрымалі прапанову Беларусі аб скліканні пасяджэння высокага ўзроўню Генасамблеі ў пачатку яе 73-й сесіі для абмеркавання праблем, з якімі сутыкаюцца краіны з сярэднім узроўнем даходу ў ходзе ажыццяўлення парадку дня ў галіне ўстойлівага развіцця да 2030 года.

Пакінуць каментарый

Ваш электронны адрас не будзе апублікаваны. Абавязковыя палі пазначаны *