Прэм’ер-міністр Беларусі Андрэй Кабякоў выказаў удзячнасць Латвіі за канструктыўную пазіцыю ў пытанні нармалізацыі адносін Беларусі і Еўрапейскага саюза. Аб гэтым кіраўнік беларускага ўрада заявіў на сустрэчы з міністрам замежных спраў Латвіі Эдгарсам Рынкевічсам.
“Хацеў бы падзякаваць нашым латвійскім партнёрам — перш за ўсё за вельмі канструктыўную пазіцыю ў частцы нармалізацыі, у вырашэнні праблем у адносінах Беларусі з Еўрапейскім саюзам, рэалізацыі нашых праектаў, наладжванні супрацоўніцтва з інвестыцыйнымі, крэдытна-фінансавымі інстытутамі Еўрасаюза. У гэтай справе ёсць даволі актыўны рух наперад не без удзелу нашых латвійскіх партнёраў, і мы вельмі ўдзячны за такую канструктыўную пазіцыю”, — адзначыў Андрэй Кабякоў. Паводле яго слоў, Беларусь зацікаўлена ў выкарыстанні інструментаў фінансава-тэхнічнай дапамогі Еўрасаюза, а таксама патэнцыялу “Усходняга партнёрства” для развіцця эканомікі.
У лістападзе 2016 года Андрэй Кабякоў прымаў удзел у саміце кіраўнікоў урадаў краін Цэнтральнай і Усходняй Еўропы і Кітая (“16+1”), на палях якога прайшла сустрэча з Прэм’ер-міністрам Латвіі Марысам Кучынскісам. “У нас адбылася падрабязная размова, перш за ўсё аб нашым гандлёва-эканамічным супрацоўніцтве. Мы запрасілі яго ў Беларусь. Я яшчэ раз хачу пацвердзіць запрашэнне. Мы чакаем, што Прэм’ер-міністр Латвіі скарыстаецца магчымасцю наведаць Беларусь”, — сказаў кіраўнік беларускага ўрада.
Андрэй Кабякоў выказаў гатоўнасць абмеркаваць на сустрэчы шырокі спектр пытанняў. “Мы шукаем магчымасці, як умацаваць дружбу з нашымі суседзямі, а не ствараць праблемы. Таму ваш візіт у Беларусь — гэта яшчэ адна магчымасць паглядзець, што мы можам зрабіць для развіцця двухбаковага супрацоўніцтва, як можам выкарыстоўваць магчымасці ўдзелу нашых краін у розных інтэграцыйных утварэннях”, — падкрэсліў ён.
“Латвія традыцыйна з’яўляецца для нас найважнейшым гандлёва-эканамічным партнёрам, нягледзячы на тое, што апошнім часам было адзначана некаторае запавольванне тэмпаў эканамічнага супрацоўніцтва. Тым не менш, што тычыцца стварэння новых прадпрыемстваў, рэалізацыі інвестыцыйных праектаў, у гэтым плане сітуацыя нядрэнная: у Беларусі зарэгістравана амаль тысяча прадпрыемстваў з удзелам латвійскага капіталу, у Латвіі колькасць арганізацый з беларускім капіталам перасягнула 2 тысячы. У нас ёсць усе перадумовы, каб наша гандлёва-эканамічнае супрацоўніцтва паспяхова развівалася”, — адзначыў Андрэй Кабякоў.
Стратэгічным напрамкам супрацоўніцтва прэм’ер-міністр назваў узаемадзеянне ў транспартна-лагістычнай сферы. “Мы вельмі разлічваем, што краіна здолее выкарыстаць свой найважнейшы транзітны патэнцыял: праз нас праходзяць дарогі з поўначы на поўдзень і з захаду на ўсход”, — заўважыў ён.
Перспектыўным бачыцца прадаўжэнне супрацоўніцтва ў галіне дрэваапрацоўкі, харчовай прамысловасці, фармацэўтыкі, сферы паслуг. Акрамя таго, латвійскія партнёры могуць выкарыстоўваць магчымасці Кітайска-беларускага індустрыяльнага парка “Вялікі камень”.
Эдгарс Рынкевічс, у сваю чаргу, выказаў удзячнасць за сустрэчу і магчымасць абмяняцца думкамі па ўсім комплексе двухбаковага ўзаемадзеяння Беларусі і Латвіі, а таксама па пытаннях развіцця адносін паміж Беларуссю і ЕС. “Што тычыцца двухбаковых адносін, абсалютна з вамі згодны, што ў нас адбываецца вельмі добры, вельмі інтэнсіўны палітычны дыялог”, — сказаў ён.
