Лепшыя класныя кіраўнікі сталіцы вызначаны!

Напрыканцы сакавіка стартаваў адзін з самых вядомых конкурсаў сярод сталічных педагогаў — конкурс прафесійнага майстэрства “Сталічны настаўнік — сталічнай адукацыі”, які сёлета праводзіцца ў намінацыі “Класны кіраўнік (куратар)”. 4 мая ў Мінскім дзяржаўным палацы дзяцей і моладзі адбыўся яго фінал, падчас якога і вызначыліся самыя лепшыя класныя кіраўнікі горада.

Для таго каб апынуцца ў фінале, педагогі сталіцы прайшлі праз два туры, дзе змаглі ў поўнай меры прадэманстраваць свой талент і творчасць у такіх конкурсных выпрабаваннях, як самапрэзентацыя, стэндавая абарона калектыўнай творчай справы з вопыту работы класнага кіраўніка (куратара), сцэнарый правядзення класнай гадзіны “Мой горад”, а таксама адкрытае выхаваўчае мерапрыемства з незнаёмай аўдыторыяй. Усім давялося добра пастарацца, але ў трэцім туры аказалася толькі сем лепшых з лепшых канкурсантаў.

Апошнім выпрабаваннем конкурсу стала рэклама сацыяльна значнай акцыі “Недзіцячыя праблемы. Дарослыя рашэнні”, якое прайшло на сцэне Мінскага дзяржаўнага палаца дзяцей і моладзі ў фінальны дзень конкурсу “Сталічны настаўнік — сталічнай адукацыі”. І, трэба сказаць, праблемы, паднятыя класнымі кіраўнікамі і іх вучнямі, аказаліся сапраўды дастаткова сур’ёзнымі.

Настаўніца англійскай мовы гімназіі № 2 Першамайскага раёна Алена Леанідаўна Грышанава расказала аб тым, як дзеці сур’ёзна захапіліся праблемай назвы нашай дзяржавы. Яны былі занепакоены тым, што іншыя краіны па-рознаму называюць Рэспубліку Беларусь. Разам са сваім класным кіраўніком яны даследавалі гісторыю Радзімы, паходжанне назвы, зазірнулі ва ўсе магчымыя даведнікі і… стварылі петыцыю на сайце change.org, адрасаваную сродкам масавай інфармацыі, а таксама Міністэрству замежных спраў, каб нашу краіну называлі правільна — Рэспубліка Беларусь.

З акцыяй “Спяшайцеся рабіць дабро!” ўсіх прысутных пазнаёміла выкладчыца нямецкай мовы прафесійнага ліцэя № 10 будаўніцтва імя I.М.Жыжаля Марына Міхайлаўна Касмачова. Разам са сваімі выхаванцамі яна расказала аб усіх кірунках акцыі, сярод якіх “Майстэрня добрых спраў” (вытворчасць дзіцячых цацак з дрэва на ўроках вытворчага навучання), “Мы — за талерантнасць” (супрацоўніцтва з замежнымі студэнтамі, якія вучацца ў Беларускім дзяржаўным медыцынскім універсітэце і пражываюць у студэнцкай вёсцы), а таксама пра мост “Мы аддаём сваю цеплыню” (наведванне адзінокіх пажылых пацыентаў 9-й гарадской клінічнай бальніцы).

“Ці жыве ў доме шчасце?” — такім пытаннем задалася настаўніца рускай мовы і літаратуры гімназіі № 37 Фрунзенскага раёна Наталля Віктараўна Рослік і расказала аб сямейных каштоўнасцях і аб тым, як класныя кіраўнікі могуць дапамагчы дзецям вырашыць недзіцячыя праблемы.

Настаўніца англійскай мовы гімназіі № 36 Цэнтральнага раёна Дар’я Рыгораўна Дунаева расказала, як важна навучыць дзяцей прымаць тое, што нестандартна і незвычайна, упусціць у сэрца любоў і клопат, а таксама аб інтэрактыўным праекце гімназіі “Танцуй, дабро” — сацыяльнай акцыі з мэтай прывабіць увагу грамадскасці да праблем дзяцей з абмежаванымі магчымасцямі з дапамогай танцавальных флэшмобаў.

Праблемай прываблівання турыстаў у нашу краіну зацікавіліся выхаванцы Яўгеніі Георгіеўны Сухарукавай, настаўніцы матэматыкі гімназіі № 22 Савецкага раёна сталіцы. Разам з ёй і іншымі настаўнікамі школы яны стварылі сапраўдны падарунак роднаму гораду да юбілею — бясплатны аўдыятур па Мінску Welcome to Belarus адразу на некалькіх мовах, якім, дарэчы, ужо актыўна карыстаюцца турысты.

“Паспрабуй будучыню сёння!” — такую назву носіць прафарыентацыйны праект настаўніцы беларускай мовы і літаратуры школы № 83 імя Г.К.Жукава Маскоўскага раёна Таццяны Уладзіміраўны Барысевіч, якая прапануе сваім выхаванцам паспрабаваць сябе ў будучай прафесіі менавіта зараз, у школьныя гады.

Апошнім у фінале конкурсу стала выступленне настаўніцы гісторыі школы № 60 Маскоўскага раёна Аксаны Георгіеўны Хахловай, якая разам з дзецьмі прапанавала прысутным пазнаёміцца з іх школьнай акцыяй “Адзін дзень без мабільнага тэлефона” і ўбачыць цудоўны і прыгожы свет рэальнага жыцця з фарбамі і пахамі прыроды, асэнсаваць, што на самай справе з’яўляецца галоўным у жыцці.

“Напэўна, наш конкурс ужо даўно прыжыўся, бо мы не толькі выяўляем пераможцаў, але і даём ім магчымасць вынесці на суд грамадскасці тыя лепшыя практыкі і напрацоўкі, якія ёсць у нас. Гэты конкурс з’яўляецца сапраўдным экзаменам для нашых удзельнікаў. Ён дазваляе стварыць тую сур’ёзную метадычную скарбонку і платформу, на аснове якой потым і будуецца ўся наша работа. Гэты конкурс дазваляе падняць статус класнага кіраўніка”, — адзначыў намеснік старшыні камітэта па адукацыі Мінгарвыканкама старшыня журы Віталь Аляксандравіч Прыгодзіч. Ён пажадаў усім фіналістам творчага гарэння, аптымізму і пастаяннага крэатыву. — Сёння нам вельмі важна разумець і асэнсоўваць, што ў горадзе сфарміравана армія прафесіяналаў, якія гатовы ісці да сваіх мэт і бачаць перспектыву свайго развіцця”.

Напрыканцы мерапрыемства прарэктар па міжнародным супрацоўніцтве і інфармацыйна-ідэалагічнай рабоце МГІРА сустаршыня журы Таццяна Якаўлеўна Янушкевіч падвяла вынікі конкурсу прафесійнага майстэрства “Сталічны настаўнік — сталічнай адукацыі”. Дыпломамі І ступені за ўдзел у фінале конкурсу былі ўзнагароджаны Марына Міхайлаўна Касмачова, Наталля Віктараўна Рослік, Алена Леанідаўна Грышанава і Таццяна Уладзіміраўна Барысевіч. Лаўрэатам конкурсу стала Яўгенія Георгіеўна Сухарукава (гімназія № 22 Савецкага раёна), якая заняла трэцяе месца і атрымала дыплом І ступені, а таксама была прадстаўлена да ўзнагароджання Ганаровай граматай камітэта па адукацыі Мінгарвыканкама. Наступным лаўрэатам конкурсу, якому было прысуджана другое месца, стала Дар’я Рыгораўна Дунаева (гімназія № 36 Цэнтральнага раёна), якая таксама прадстаўлена да ўзнагароджання Ганаровай граматай камітэта па адукацыі Мінгарвыканкама. Абсалютнай пераможцай конкурсу стала настаўніца гісторыі школы № 60 Маскоўскага раёна Аксана Георгіеўна Хахлова, якая атрымала дыплом лаўрэата конкурсу І ступені, а таксама хадайніцтва аб узнагароджанні Ганаровай граматай Мінскага гарадскога Савета дэпутатаў і рэкамендавана да прысуджэння прэміі Мінгарвыканкама ў памеры 50 базавых велічынь. Акрамя таго, усе ўдзельнікі конкурсу атрымалі ганаровыя граматы Мінскага гарадскога камітэта Беларускага прафесійнага саюза работнікаў адукацыі і навукі.

Людміла ГУРСКАЯ.
Фота Аляксандра КАМЕНЧУКОВА.