400 балаў з 400 магчымых. Абсалютны максімум на ўступнай кампаніі паказалі выпускнікі сярэдняй школы № 1 Хоцімска Павел Якушаў і Магілёўскага дзяржаўнага абласнога ліцэя № 3 Уладзіслава Шчадракова. Сёння маладыя людзі — гордасць сваіх навучальных устаноў, паведамляе карэспандэнт “Настаўніцкай газеты”.
– Дасягненнем Паўла неверагодна ганарымся. Яго вынік — выключная падзея, якая ўпершыню адбылася ў гісторыі не толькі нашай школы, але і сферы адукацыі Хоцімскага раёна. Поспех цалкам заслужаны. Хлопец — дысцыплінаваны, ініцыятыўны, мэтанакіраваны. І гэта прынесла адпаведны плён. Школу ён скончыў з залатым медалём, узяў 100 балаў на ЦЭ па рускай мове і фізіцы, а таксама на ЦТ па матэматыцы, — расказала дырэктар сярэдняй школы № 1 Хоцімска Галіна Белікава.
Як адзначае сам Павел Якушаў, адметна праявіць сябе дапамагла ўласная стараннасць і матывацыя ад педагогаў. Юнак ніколі не наведваў рэпетытараў, неабходныя веды яму далі школьныя настаўнікі.
— Атрымаць 100 балаў на ЦЭ і ЦТ рэальна, калі дбайна рыхтавацца. Я кожны дзень шмат працаваў самастойна, рашаў розныя задачы, набываў вопыт. Вельмі ўдзячны за падтрымку бацькам. А яшчэ ўсім сваім педагогам, асабліва настаўніцам фізікі Аксане Мікалаеўне Ларчанка, матэматыкі Валянціне Мікалаеўне Шкробавай і рускай мовы і літаратуры Святлане Барысаўне Касмачовай. Экзамены і тэсціраванне не выклікалі цяжкасцей. Цяжкай была адна задача па фізіцы, але паразважаў і справіўся. Разлічваў, што балы будуць даволі высокімі, аднак тры стабальныя сертыфікаты сталі прыемнасцю. Цяпер з нецярпеннем чакаю паступлення. Мару стаць студэнтам БДУІР, звязаць жыццё з праграмаваннем, — падзяліўся выпускнік.
Фокус на паступленне зараз робіць і Уладзіслава Шчадракова. У скарбонцы дзяўчыны залаты медаль, 100 балаў на ЦЭ па рускай мове і матэматыцы і стабальны сертыфікат на ЦТ па англійскай мове.
— Выдатніца, актывістка, алімпіядніца. Сярод іншых навучэнцаў Уладзіслава заўсёды вылучалася працавітасцю. Для ўсяго ліцэя вялікая радасць, што яна дасягнула такіх вучэбных вышынь. Дарэчы, па колькасці стабальных сертыфікатаў бягучы год для нашай установы стаў рэкордным. Выпускнікі паказалі 30 максімальных вынікаў. І гэта заслуга настаўнікаў, іх прафесіяналізму, душэўных і адказных адносін да дзяцей. Фенаменальны паказчык прадэманстравала настаўніца англійскай мовы Марына Любімава: па 100 балаў набралі сямёра яе вучняў. Па чатыры стабальныя сертыфікаты ў навучэнцаў настаўніцы беларускай мовы і літаратуры Наталлі Радзьковай і настаўніцы рускай мовы і літаратуры Алены Чудоўскай, — адзначыў дырэктар МДАЛ № 3 Канстанцін Грыгаровіч.
Усяго на Магілёўшчыне сёлета больш за 150 уладальнікаў запаветных 100 балаў на ЦЭ і ЦТ. Звыш 440 выпускнікам за выдатную вучобу ўручаны залатыя медалі і атэстаты з адзнакай.
Ганна СІНЬКЕВІЧ
Фота з архіва Паўла Якушава і Уладзіславы Шчадраковай
