Беспрацоўныя для працаўладкавання не да канца выкарыстоўваюць усе формы дапамогі і садзейнічання службаў занятасці па месцы пражывання. Такое меркаванне выказаў першы намеснік міністра працы і сацыяльнай абароны Андрэй Лабовіч па выніках прыёму грамадзян у Саўміне.
На прыём запісаліся грамадзяне, чые пытанні былі звязаны з пенсійным забеспячэннем, атрыманнем дапамог, накіраваннем у дамы-інтэрнаты і пераглядам раней атрыманых адказаў. Гучала нямала прапаноў і заўваг, якія не адносяцца да кампетэнцыі Міністэрства працы і сацыяльнай абароны, усе яны будуць перададзены адпаведным адрасатам. “Асноўная тэма, па якой звычайна шмат людзей звяртаецца, хоць сёння і не было, — гэта пытанні занятасці і рынку працы. Людзі просяць дапамогі ў пошуку работы. У нас у кожным раёне існуе служба занятасці, дзе можна атрымаць садзейнічанне і працаўладкавацца на вакансіі, якія ёсць, прайсці перанавучанне па запатрабаваных спецыяльнасцях. Але некаторыя, нават не скарыстаўшыся такой магчымасцю, адразу звяртаюцца ў міністэрства”, — адзначыў Андрэй Лабовіч.
Тым не менш намаганні службаў занятасці, а таксама ў цэлым паляпшэнне эканамічнай сітуацыі пазітыўна паўплывалі на рынак працы Беларусі. “Знізіўся ўзровень беспрацоўя, на 1 студзеня ён склаў 0,5 працэнта. Вакансій стала значна больш. Гэта значыць сітуацыю ў мінулым годзе ўдалося змяніць”, — сказаў першы намеснік міністра.
Таксама, паводле слоў Андрэя Лабовіча, у час прыёмаў грамадзян і правядзення прамых тэлефонных ліній застаюцца актуальнымі пытанні пенсійнага забеспячэння, сацыяльнай абароны, атрымання адраснай сацыяльнай дапамогі. “Нярэдка людзі не згодны з вызначэннем індывідуальнага каэфіцыента пры разліку іх пенсіі, шукаюць дапамогі ва ўстанаўленні памеру заработку для назначэння пенсіі. Кожны выпадак разбіраецца індывідуальна, і выносіцца рашэнне. Калі высвятляюцца акалічнасці, якія, напрыклад, пацвярджаюць стаж і даход за нейкі перыяд, то, вядома, памер пенсіі пераглядаецца”, — адзначыў першы намеснік міністра. Пры гэтым ён падкрэсліў, што калі чалавек легальна працаваў, то з ім афіцыйна афармляліся дагаворныя адносіны, з зарплаты выплачваліся страхавыя ўзносы ў ФСАН, што дазваляе разлічваць індывідуальны каэфіцыент і, адпаведна, памер пенсіі. “А калі людзі ў час працоўнай дзейнасці не задумваюцца пра будучыню, што некалі ім давядзецца выходзіць на пенсію, і працуюць часам без афіцыйнага афармлення, то гэтыя перыяды не будуць улічвацца”, — дадаў Андрэй Лабовіч.
