Новы, прыгожы, сучасны

Менавіта такі яслі-сад атрымалі юныя жыхары мікрараёна Індустрыяльны ў Лідзе. А назва ў яго яшчэ і смачная — “Карамелька”.

Яслі-сад разлічаны на 230 дзетак. Яго агульная плошча —  амаль пяць тысяч квадратных метраў. Будуць працаваць 12 груп, у тым ліку і група для дзяцей з цяжкімі парушэннямі маўлення. У новым яслях-садзе ёсць гімнастычная, трэнажорная, музычная і ўніверсальная залы, па-сучаснаму абсталяваны медпункт, кабінеты эстэтычнага развіцця і інфармацыйна-камунікацыйных тэхналогій з мультыбордам, у музычнай і актавай залах ёсць аўдыясістэмы, абсталяваны сенсорны пакой. Заняткі фізічнай культурай будуць праводзіць і ў басейне, дзе ёсць месца ў тым ліку для сухога плавання, што дазволіць дзецям хутка атрымаць першыя навыкі.

Удзел у адкрыцці новай дашкольнай установы прынялі старшыня Камітэта дзяржаўнага кантролю Леанід Анфімаў, намеснік кіраўніка Адміністрацыі прэзідэнта Рэспублікі Беларусь Валерый Міцкевіч, старшыня Гро­дзенскага аблвыканкама Уладзімір Краўцоў, памочнік прэзідэнта — інспектар па Гро­дзенскай вобласці Іван Лаўрыновіч, старшыня Камітэта дзяр­жаўнага кантролю Гродзенскай вобласці Анатоль Дарожка, старшыня Лідскага райвыканкама Сяргей Ложачнік. Яны перадалі загадчыцы садка Тамары Дрывіцкай сертыфікаты на набыццё развіццёвых гульняў, камп’ютарнага класа, мультымедыйнай сэнсарнай устаноўкі, гукавой апаратуры і электронных піяніна.

Пасля ўрачыстага пераразання чырвонай стужкі госці і бацькі з дзецьмі пабывалі на экскурсіі ў новым яслях-садзе.

— Добрыя ўмовы створаны і для здаровага харчавання дзетак, арганізацыі іх прагулак на свежым паветры, — расказвае Тамара Дры­віцкая. — Харчаблок абсталяваны ў адпаведнасці з сучаснымі тэхналагічнымі патрабаваннямі, набыта пра­грама “Меню”. На тэрыторыі, акрамя групавых пляцовак, створана кальцавая дарожка, на якой дзеці будуць вучыцца правілам дарожнага руху, летам — ездзіць на веласіпедах, а зімой — катацца на лыжах.

А нядаўна каля ясляў-сада № 41 у Лідзе пасадзілі ліпавыя прысады, каб дзецям у “Карамельцы” было яшчэ ўтульней.

Падрыхтавала Надзея ВАШКЕЛЕВІЧ.
Фота Вольгі КАПЦЭВІЧ.