У Беларусі плануецца абмежаваць рэалізацыю алкагольных напіткаў у культурна-паркавых зонах. Аб гэтым паведаміў галоўны нарколаг Міністэрства аховы здароўя Іван Канаразаў.
“Падпраграма “Папярэджанне і пераадоленне п’янства і алкагалізму” на 2016—2020 гады ўключае 53 мерапрыемствы. Сярод іх асветныя і заканадаўчыя ініцыятывы, меры па абмежаванні даступнасці алкаголю. Адзін з прыкладаў — абмежаванне рэалізацыі алкаголю і тытуню ў культурна-паркавых зонах”, — сказаў Іван Канаразаў.
Таксама будзе прапрацавана пытанне абмежавання рэалізацыі алкаголю паблізу ўстаноў аховы здароўя, адукацыі, культуры і спорту. Упор плануецца зрабіць на прафілактычнай рабоце з мэтавымі групамі (напрыклад, працоўнымі калектывамі, непаўналетнімі, якія ўжываюць алкагольныя напіткі).
Галоўны нарколаг краіны таксама адзначыў, што Сусветная арганізацыя аховы здароўя, якая некалькі гадоў назад назвала Беларусь сярод лідараў па ўжыванні алкагольных напіткаў, істотна палепшыла сваё меркаванне пасля праведзенага паўторнага даследавання.
Новай падпраграмай “Папярэджанне і пераадоленне п’янства і алкагалізму” ў рэспубліцы да 2020 года прадугледжваецца забяспечыць змяншэнне смяротнасці ад выпадковых атручэнняў алкаголем, знізіць спажыванне алкаголю на душу насельніцтва ў год да 9,2 л.
