Пагадненне па клімаце прызнана несправядлівым

Прэзідэнт Злучаных Штатаў Дональд Трамп аб’явіў аб выхадзе ЗША з Парыжскага пагаднення па клімаце.

“Мы пачнём перагаворы па ўваходжанні зноў альбо ў Парыжскае пагадненне, альбо ў абсалютна іншую здзелку на справядлівых умовах для амерыканскага бізнесу, рабочых, людзей і падаткаплацельшчыкаў”, — сказаў Дональд Трамп на прэс-канферэнцыі. На яго думку, Парыжскае пагадненне па клімаце ставіць ЗША ў нявыгаднае становішча, а іншыя краіны — у выгаднае. ЗША маглі страціць 2,7 млн рабочых месцаў да 2025 года з-за гэтага пагаднення.

Рашэнне ЗША выйсці з Парыжскага пагаднення па клімаце падрывае намаганні міжнароднай супольнасці па скарачэнні аб’ёму выкідаў парніковых газаў і гарантаванні глабальнай бяспекі. Аб гэтым гаворыцца ў заяве Генеральнага сакратара ААН Антоніу Гутэрыша. У 2015 годзе Парыжскае пагадненне адобрылі ўсе дзяржавы свету, паколькі яны прызналі пагрозу, якую ўяўляюць сабой наступствы змянення клімату. У заяве гаворыцца, што краіны свету ўжо гатовы пачаць рэалізацыю мер, прадугледжаных пагадненнем. Кіраўнік ААН выказаў упэўненасць у тым, што гарады, штаты і прыватныя прадпрыемствы ЗША, а таксама іншыя дзяржавы планеты будуць працаваць у напрамку нізкавугляродзістай і ўстойлівай эканомікі.