Пакет бюджэтных дакументаў на 2018 год унесены ў беларускі парламент, паведаміў спікер Уладзімір Андрэйчанка на пасяджэнні Палаты прадстаўнікоў.
У пакет дакументаў, акрамя самога бюджэту, уваходзяць папраўкі ў некаторыя законы па пытаннях падаткаабкладання, праекты фарміравання дзяржаўных пазабюджэтных фондаў — ФСАН, грамадзянскай авіяцыі і дэпартамента выканання пакаранняў МУС.
Паводле слоў Уладзіміра Андрэйчанкі, наступнае пасяджэнне Палаты прадстаўнікоў плануецца правесці 18 снежня. Бюджэтны пакет будзе разгледжаны ў першым чытанні.
Як паведамлялася, у якасці асноўных параметраў для разліку праекта бюджэту на 2018 год прыняты кансерватыўны сцэнарый знешніх умоў, пры якім тэмп росту ВУП Беларусі — 101,2 працэнта, сярэднегадавыя параметры: інфляцыя — 107,4 працэнта, стаўка рэфінансавання — 11 працэнтаў гадавых, цана на нафту — $43 за бараль, курс долара — Br2,038 і 62,3 расійскага рубля.
Аб’ём даходаў рэспубліканскага бюджэту прагназуецца ў суме Br20,5 млрд, або 107,5—107,8 працэнта да ацэнкі даходаў 2017 года. Расходы запланаваны ў суме Br19,8 млрд, што складае каля 107 працэнтаў да ацэнкі 2017 года. Прафіцыт рэспубліканскага бюджэту сфарміраваны ў суме Br718,3 млн (0,64 працэнта ВУП) і будзе накіраваны на пагашэнне часткі дзяржаўнага доўгу.
Прыярытэтнымі задачамі пры фарміраванні праекта бюджэту з’яўляюцца своечасовыя і ў поўным аб’ёме выплаты па знешніх дзяржаўных абавязацельствах без нарошчвання доўгу, а таксама забеспячэнне ў поўным аб’ёме ўсіх расходаў па сацыяльных выплатах і заработнай плаце ў бюджэтным сектары і сферы дзяржаўнага кіравання, захаванне не ніжэй за 2017 год дзяржаўнай падтрымкі экспарту тавараў беларускай вытворчасці.
