Парламент падтрымаў папраўкі ў Канстытуцыю

- 9:56Інфармацыйная гадзіна

Дэпутаты парламента Казахстана на сумесным пасяджэнні палат прынялі Закон “Аб унясенні змяненняў і дапаўненняў у Канстытуцыю Рэспублікі Казахстан” у другім чытанні.

Папраўкі ў Канстытуцыю, якія прапануюцца, накіраваны на ўзмацненне ролі парламента, павышэнне самастойнасці і адказнасці ўрада.

Як адзначыў на пасяджэнні дэпутат Мажыліса (ніжняй палаты) парламента Нурлан Абдзіраў, згодна з папраўкамі, на канстытуцыйным узроўні замацоўваюцца гарантыі нязменнасці незалежнасці Казахстана, унітарнасці, тэрытарыяльнай цэласнасці рэспублікі і формы праўлення.

У папраўках таксама прапісана, што парламент з’яўляецца вышэйшым прадстаўнічым органам рэспублікі, які ажыццяўляе не проста заканадаўчыя функцыі, а заканадаўчую ўладу.

Істотнае змяненне прапануецца ў пункт 1 арт. 70, у адпаведнасці з якім урад складае свае паўнамоцтвы перад нававыбраным Мажылісам. “Гэтая норма павышае адказнасць дэпутатаў, а таксама ўзмацняе партыйны прынцып выбарнай сістэмы краіны”, — адзначыў Нурлан Абдзіраў.

Канстытуцыйныя змяненні, якія прадугледжваюць перадачу шэрага паўнамоцтваў ад прэзідэнта да ўрада і парламента, былі ініцыіраваны Прэзідэнтам Казахстана Нурсултанам Назарбаевым. У сувязі з гэтым быў падрыхтаваны праект закона, які на працягу месяца ўсенародна абмяркоўваўся. Па выніках абмеркавання паступіла больш за 6 тысяч прапаноў, якія закранаюць 63 артыкулы Канстытуцыі з 98 і ахопліваюць усе раздзелы асноўнага закона.