Прэтэнзій да выбарчага працэсу няма

- 11:44Інфармацыйная гадзіна, Рознае

Да выбарчай кампаніі, якая праводзіцца ў Беларусі, прэтэнзій няма. Аб гэтым паведаміў кіраўнік штаба місіі наглядальнікаў ад СНД Яўген Слабада на сустрэчы з першым намеснікам старшыні Вярхоўнага Суда Валерыем Калінковічам.

Як адзначыў Яўген Слабада, мэта наглядальнікаў ад СНД — даць усебаковую ацэнку выбарчаму працэсу і падрыхтаваць аб’ектыўнае заключэнне аб выніках маніторынгу выбараў акрэдытаванымі членамі місіі. Ён адзначыў, што, паводле яго назіранняў, на гэты момант да выбарчай кампаніі, якая праводзіцца, прэтэнзій няма. Усе працэсы праходзяць галосна, адкрыта, у прысутнасці наглядальнікаў, з прадастаўленнем роўных умоў усім удзельнікам.

Кіраўнік штаба місіі наглядальнікаў ад СНД падзякаваў таксама за прадастаўленне Вярхоўным Судом інфармацыі па скаргах, што паступілі ў суды і датычацца выбарчага працэсу па выбарах дэпутатаў Палаты прадстаўнікоў Нацыянальнага сходу.

Валерый Калінковіч, у сваю чаргу, адзначыў гатоўнасць судоў да аб’ектыўнага і непрадузятага разгляду ўсіх скаргаў, якія паступаюць у ходзе выбарчай кампаніі. “Такія працэсы з’яўляюцца галоснымі, адкрытымі. Інфармацыя аб выніках разгляду будзе аператыўна размяшчацца на афіцыйным інтэрнэт-партале Вярхоўнага Суда. Такі падыход садзейнічае правядзенню свабодных, дэмакратычных выбараў. Мы разлічваем на тое, што выбарчая кампанія пройдзе ў спакойным рэжыме”, — сказаў ён.