У Мастацкім музеі мемарыяльнага комплексу “Брэсцкая крэпасцьгерой” адкрылася першая персанальная выстава скульптуры і керамікі Руслана Усманава, настаўніка сярэдняй школы № 10 Брэста.
На адкрыцці выставы майстар расказаў, што яго творчасць пачалася са школы. У сярэдняй школе № 10, якая раней мела архітэктурна-мастацкі ўхіл, яму прывілі любоў да дрэва і гліны. А потым была вучоба на радзіме, ва Узбекістане, у Ташкенцкім мастацкім вучылішчы і Ташкенцкім інстытуце мастацтваў. Многія сваякі Руслана — скульптары, што, вядома ж, аказала ўплыў і на яго творчасць.
Будучы маладым спецыялістам, ён вярнуўся ў Брэст і, як прызнаўся майстар, зоркі сышліся: ён зноў апынуўся ў сярэдняй школе № 10, але ўжо ў статусе педагога.
Руслан Усманаў у сваіх настаўнікаў вучыўся не толькі творчасці, але і мастацтву педагогікі, якое ўдасканальваў на свой лад. Ён працуе ў галіне станковай і манументальнай скульптуры, а з некаторых часоў захапіўся і керамікай, у тым ліку дзякуючы сваім калегам па школе.
У Брэсце вядомая перш за ўсё яго скульптура “Закаханыя каты”, якая знаходзіцца на скрыжаванні вуліц Савецкай і Пушкінскай. Скульптура ўяўляе сабой калону, стылізаваную пад дах дома з пячной трубой. А на гэтым даху знаходзіцца пара закаханых катоў, яшчэ адна кошка сядзіць ніжэй. Руслан — аўтар вядомай скульптуры “Бяздомныя”, якая знаходзіцца на ўчастку па адлове і ўтрыманні безнаглядных жывёл Брэсцкага смеццеперапрацоўчага завода.
З адкрыццём выставы майстра прыйшлі павіншаваць яго мама, жонка, педагогі, калегі, вучні. Педагогі Руслана Усманава адзначылі, што раней, калі не існавала гаджэтаў, дзеці былі больш занятыя творчасцю, у выніку якой і вырасталі такія майстры, як іх вучань. Калегі адзначылі, што Руслан па-ўсходняму шчодры і з адкрытай душой…
На выставе прадстаўлены як копіі вядомых работ аўтара, так і арыгінальныя творы. Як у скульптурах майстра, так і яго работах у галіне керамікі выразна прасочваюцца карані майстра, што надае яго работам непаўторны каларыт. Нават тыя педагогі, якія вучылі Руслана кераміцы, прызнаюцца, што не змаглі б паўтарыць працы майстра, паколькі яны выкананы і распісаны ў аўтарскай манеры, з вялікай дбайнасцю.
Асабіста для мяне наведванне выставы стала і сустрэчай з маім дзяцінствам і юнацтвам у Мастацкім музеі мемарыяльнага комплексу “Брэсцкая крэпасць-герой”, бо некалі мне пашчасціла скончыць дзве мастацкія школы. У мастацкім музеі я пабачыла работу “Бура” мастачкі Тамары Дзянісавай, якая выкладала ў мяне на працягу чатырох гадоў у Дзіцячай школе мастацтваў (зараз гэта Дзіцячая школа мастацтваў імя А.А.Алонцава), а таксама работу майго настаўніка з сярэдняй школы № 10 Брэста мастака Віктара Міхайлава “Півоні” (на жаль, ён нядаўна пайшоў з жыцця).
Выстава будзе працаваць па 8 мая. Шчыра раю яе наведаць, каб зрабіць адкрыцці для сваёй душы.
Святлана СЁМІНА,
настаўніца англійскай мовы
сярэдняй школы № 10 Брэста.
