Урачыстым, творчым, тэхналагічным, надзвычай яркім і музычным стала адкрыццё фіналу Рэспубліканскага конкурсу прафесійнага майстэрства педагагічных работнікаў “Настаўнік года — 2020”, якое ўчора адбылося ў актавай зале Акадэміі паслядыпломнай адукацыі. З прывітальным словам да ўдзельнікаў звярнуўся намеснік міністра адукацыі Аляксандр Кадлубай.
“Рэспубліканскі конкурс “Настаўнік года” — гэта сапраўднае свята прафесійнага майстэрства педагогаў, свята прафесійнага гонару і прафесійнай садружнасці. Значэнне адукацыі для развіцця любой дзяржавы агульнавядома. Адукацыя непасрэдна фарміруе маладое пакаленне краіны. Настаўнік — прафесія ад Бога, усе астатнія — ад настаўніка. Менавіта з прычыны асаблівай значнасці педагагічнай працы для развіцця грамадства конкурс “Настаўнік года” заўсёды мае шырокі грамадскі рэзананс.
56 удзельнікаў чацвёртага этапу — настаўнікі ўсіх вучэбных прадметаў і выхавальнікі дашкольных устаноў, якія прадстаўляюць розныя гарады, раёны і вобласці — ад маленькай сельскай школы да буйной сталічнай гімназіі. Вас аб’ядноўвае адно: вы — лепшыя з лепшых, самаахвярна адданыя сваёй прафесіі, сваім вучням і выхаванцам. Менавіта вы з поспехам прайшлі тры першыя этапы самага маштабнага ў адукацыі конкурсу. І менавіта вам трэба будзе прадэманстраваць у найбліжэйшыя дні “найвышэйшы пілатаж” змястоўнага, цікавага, творчага, выхоўваючага навучання”, — звярнуўся да канкурсантаў Аляксандр Уладзіміравіч.
Ён адзначыў, што акцэнт на прадметную кампетэнтнасць удзельнікаў конкурсу не азначае зніжэння ўвагі да выхаваўчай функцыі настаўніка, выхаваўчай ролі ўрока. “Думаю, вы пагодзіцеся, што адукацыя з’яўляецца вызначальнай у станаўленні інтэлектуальнага, культурнага і духоўна-маральнага патэнцыялу маладога пакалення. На сённяшні дзень недастаткова проста даць якасную адукацыю, вельмі важна навучыць прымяняць атрыманыя веды на практыцы. Вы таленавітыя, высокапрафесійныя. Тысячы настаўнікаў, дзясяткі тысяч вучняў і іх бацькоў вераць у вас. Не можа не выклікаць гонар, што ў адукацыі ёсць такія творчыя, мэтанакіраваныя, неабыякавыя да сваёй справы людзі.
Конкурс “Настаўнік года — 2020” — дванаццаты па ліку. Няхай ён стане шчаслівым для кожнага з удзельнікаў, для адукацыі ў цэлым”, — пажадаў намеснік міністра.
Са словамі віншавання і наказу звярнуўся да канкурсантаў рэктар Беларускага дзяржаўнага педагагічнага ўніверсітэта імя Максіма Танка, доктар педагагічных навук, старшыня журы суперфіналу конкурсу, прафесар Аляксандр Іванавіч Жук: “Наш конкурс мае даўнія традыцыі. Разам з тым імклівае жыццё патрабуе ад педагогаў імгненнага ўключэння ва ўсё новае. Новае інфармацыйна-адукацыйнае асяроддзе патрабуе новых ведаў і ўменняў. Настаўнік сродкамі свайго прадмета павінен і выхоўваць, і развіваць сваіх вучняў — такіх розных. Сёння гаворка ідзе пра новы прафесіяналізм педагога. І я перакананы, што канкурсанты валодаюць такім прафесіяналізмам, таму мы ўбачым лепшыя педагагічныя практыкі лепшых педагогаў краіны.
Паважаныя канкурсанты! Вы, пераадолеўшы раённыя і абласныя этапы конкурсу, ужо з’яўляецеся пераможцамі. Тым не менш наперадзе вас чакаюць напружаныя конкурсныя дні. Я жадаю вам сабранасці, крэатыўнасці і ўдачы. І памятайце, сябры, словы Роберта Раждзественскага: “Настаўнік — гэта прафесія далёкага дзеяння, лепшая і галоўная на зямлі”. Поспехаў вам!”.
Сваімі матывацыйнымі ўражаннямі ад удзелу ў конкурсе падзялілася пераможца мінулага конкурсу (“Настаўнік года — 2017”) настаўніца беларускай мовы і літаратуры Баравухскай сярэдняй школы № 15 Наваполацка Святлана Румянцава: “Дарагія ўдзельнікі конкурсу! З радасцю і хваляваннем вітаю вас і віншую з такой значнай падзеяй у вашым жыцці — фіналам конкурсу! Я ўзгадваю свой фінал і хачу адзначыць, што агонь, запалены ім у маёй душы, не згасае. Як і не прытупляюцца пачуцці, перажытыя падчас конкурсных мерапрыемстваў, зносін з іншымі канкурсантамі-фіналістамі. Безумоўна, гэта было складанае выпрабаванне, якое патрабавала душэўных і разумовых сіл, самааддачы, але гэта і выдатная пляцоўка для абмену вопытам, месца асобаснага і прафесійнага росту, сапраўдная педагагічная майстэрня.
Дарагія канкурсанты, я жадаю вам годна прайсці конкурсныя выпрабаванні, паспяхова прадэманстраваць свае таленты і ўменні! Жадаю атрымаць толькі станоўчыя эмоцыі, радасць ад зносін з калегамі. Знайсці новыя і самыя нечаканыя ідэі, раскрыць творчы патэнцыял сваёй душы, павысіць педагагічнае майстэрства. Няхай кожнаму ўдзельніку спадарожнічае поспех, а атмасфера конкурсу стане сапраўдным святам прафесійных зносін!
Навукоўцы кажуць, што не існуе “вечнага рухавіка”. Не верце гэтаму. Наш з вамі “вечны рухавік” — гэта дзеці! Як бы ні склаліся балы ў пратаколах членаў журы, памятайце, што самыя галоўныя суддзі нашай працы — вучні і іх бацькі. А для іх, не сумняваюся, вы пераможцы. У гэтым конкурсе не бывае пераможаных! Бо перамагае ўсё лепшае, што ёсць у настаўніка! Смела распроствайце свае крылы, сябры. Набірайце разгон і ўзлятайце. Няхай ваш палёт будзе высокім!”
Трэба адзначыць, што старт палёту — самапрадстаўленне каманд, якое пачалося адразу пасля ўрачыстага адкрыцця, — быў даволі моцным. Музыкальнасць, яркасць і тэхналагічнасць на адкрыцці былі ад самага пачатку і да канца. Спачатку танцамі і спевамі ганаравалі канкурсантаў і гасцей, а затым ужо самі канкурсанты дэманстравалі свае бязмежныя творчыя здольнасці.
Але конкурс прафесійнага майстэрства “Настаўнік года” — гэта ў першую чаргу парад педагагічных дасягненняў, якія канкурсанты пачалі дэманстраваць падчас самапрадстаўлення. Сёлета, як і мінулы раз, задача была няпростая, бо трэба было паказаць дасягненні кожнага канкурсанта асобна і ў камандзе адначасова. Да таго ж усе імкнуліся прадэманстраваць сістэму адукацыі свайго рэгіёна.
Адразу хочацца адзначыць, што ўсе каманды справіліся. Усё было зроблена на самым высокім узроўні. Усе канкурсанты і каманды стараліся быць адметнымі, сучаснымі і арыгінальнымі. Многія разрывалі шаблоны пра сваю прафесію, што насамрэч гэта выдатна, бо адкрывае ўсё новыя і новыя грані педагагічнай прафесіі, каб мы чарговы раз пераканаліся, што яна самая лепшая на зямлі.
Прысутных у глядзельнай зале перапаўняла адчуванне гордасці. Было шмат музыкі, крэатыву і роздумаў аб прафесіі педагога. Зноў уразіў падыход каманд да касцюмаў, якія таксама сімвалізавалі іх еднасць. Было не проста цікава — было эмацыянальна і захапляюча. Хацелася сядзець і глядзець. На настаўнікаў, на іх вучняў, якія прыйшлі не толькі падтрымаць, але і з поўнай адказнасцю заявіць, што іх настаўнік самы лепшы ў свеце. Думаю, журы ў гэтым годзе працаваць будзе няпроста. Сярод канкурсантаў шмат харызматычных і вельмі яркіх асоб.
Праграма конкурсу традыцыйна насычаная: самапрадстаўленне ўдзельнікаў, урокі ў незнаёмым класе, тэсціраванне і майстар-класы. Асноўныя конкурсныя выпрабаванні стартуюць з сённяшняга дня. 30 верасня вызначацца 8 суперфіналістаў. Імя пераможцы стане вядома 2 кастрычніка.
Вольга ДУБОЎСКАЯ.
Фота Алега ІГНАТОВІЧА.
P.S. Больш падрабязна пра ход конкурсу і яго адметнасці чытайце ў наступным нумары газеты.