Усё неабходнае для добрага старту ёсць: як ва ўстановах адукацыі Брагінскага раёна ўдаецца заматываваць і замацаваць маладых спецыялістаў, даведалася карэспандэнт “Настаўніцкай газеты”.
Каштоўныя кадры
Па словах кіраўніка аддзела адукацыі Брагінскага райвыканкама Наталлі Даўжанок, у раёне маладым і перспектыўным кадрам удзяляецца асаблівая ўвага, і замацаванне настаўнікаў на месцах — лепшае таму пацвярджэнне.
— Пасля абавязковага тэрміну адпрацоўкі педагогі застаюцца вернымі выбранай прафесіі, — гаворыць Наталля Міхайлаўна. — У гэтым годзе педагагічная сям’я раёна сардэчна прыняла 15 маладых спецыялістаў, з якімі раней быў заключаны мэтавы дагавор. Дарэчы, работа ў гэтым напрамку вядзецца сістэмна — яшчэ адзін мэтавы дагавор выдалі выпускніцы брагінскай школы, якая з гэтага года ўжо вучыцца ў Мазырскім дзяржаўным педагагічным універсітэце імя І.П.Шамякіна і праз чатыры гады прыйдзе да нас на работу.
Для ўчарашніх выпускнікоў настаў час магчымасцей і кар’ернага росту. Усё неабходнае для добрага старту ёсць. Так, пры размеркаванні і заключэнні кантракта на 5 гадоў ва ўстанове адукацыі, якая знаходзіцца ў зоне радыеактыўнага забруджвання з правам на адсяленне (са ступенню забруджвання 5—15 кюры), маладым спецыялістам аднаразова выплачваецца 200 базавых велічынь. Пасля адпрацоўкі першага пяцігадовага кантракта, калі педагог згаджаецца на другі пяцігадовы кантракт, ён атрымлівае 300 базавых велічынь.
— Ёсць педагогі, якія прыбылі да нас у раён, адпрацавалі першы пяцігадовы кантракт, стварылі сям’ю і заключылі кантракт паўторна, — працягвае кіраўнік аддзела адукацыі. — Акрамя таго, для педагогаў раёна прадугледжаны добры сацыяльны пакет, а яшчэ — высокі паказчык па ўстанаўленні кантрактнай надбаўкі, у сярэднім яна роўная 39% пры максімальнай 50%. Акрамя таго, па прыбыцці да нас у раён па размеркаванні прадастаўляецца бясплатнае арэнднае жыллё пад ключ за кошт сродкаў, накіраваных на ліквідацыю наступстваў катастрофы на ЧАЭС. Калі арыентавацца на статыстыку, то за апошнія тры гады ў раёне адзначаецца стапрацэнтная замацавальнасць маладых спецыялістаў, ад нас ніхто не з’ехаў. У цэлым, калі і здараецца, што педагог пакідае раён, то гэта звязана са зменай месца жыхарства пасля замужжа.
Прыярытэтная ўвага накіравана не толькі на маладых і перспектыўных педагогаў, але і на дасведчаных прадстаўнікоў прафесіі са шматгадовым стажам працы. Дарэчы, Брагіншчына славіцца сваімі педагагічнымі дынастыямі, і, несумненна, такія сем’і заслугоўваюць асобнай увагі на старонках ведамаснага выдання.
— У нас ёсць педагагічныя дынастыі, і не адна, — падкрэслівае Наталля Міхайлаўна. — Напрыклад, сям’я Шэін: мама — Марыя Уладзіміраўна, загадчык Іалчанскага дзіцячага сада, тата — Леанід Мiхайлавiч, настаўнік фізкультуры, уладальнік ганаровага звання “Выдатнік адукацыі Рэспублікі Беларусь”, іх дачка — Наталля Леанідаўна, настаўніца замежнай мовы ў гімназіі. Педагагічнай дзейнасцю займаюцца сем’і Прыходзька, Чарнабай, Шубянок і многія іншыя. Практычна ў кожнай установе адукацыі раёна працуюць прадстаўнікі сямейных дынастый, іх стаж ужо вылічваецца дзясяткамі гадоў.
У Брагінскім раёне сеюць разумнае, добрае, вечнае 458 педагагічных работнікаў, з іх 70% — спецыялісты з вышэйшай і першай кваліфікацыйнай катэгорыяй.
Належная ўвага
Ад педагагічных кадраў плаўна пераходзім непасрэдна да ўстаноў адукацыі, дзе школьнікам дапамагаюць удасканальваць крытычнае мысленне, логіку, раскрываюць творчы патэнцыял, а яшчэ вучаць працаваць у камандзе, развіваюць сацыяльныя навыкі і фарміруюць духоўна-маральныя каштоўнасці. Напрыклад, Камарынскай сярэдняй школе імя П.І.Шпетнага прысвоены ганаровы статус “Школа мiру”. Тут жа ў хуткім часе адкрыецца музей Вялікай Айчыннай вайны. Дарэчы, гэта адзіная школа, у якой ёсць алея ў памяць аб героях, якія абаранялі Радзіму ў гады ваеннага ліхалецця і вызвалялі Камарыншчыну.
— Брагінскі раён, мабыць, адзіны ў вобласці, дзе ў кожнай установе адукацыі створаны міратворчы атрад, — працягвае аповед Наталля Міхайлаўна. — Сёння налічваем 130 міратворцаў, з іх 20 — навучэнцы Школы мiру. Так, у Брагінскай сярэдняй школе 4-ы год функцыянуе атрад “Юныя міратворцы”. Работа з дзецьмі арганізавана па розных напрамках: хлопцы і дзяўчаты — актыўныя ўдзельнікі экалагічных, працоўных акцый, клапоцяцца пра пажылых людзей і ветэранаў, даглядаюць помнікі героям Вялікай Айчыннай вайны і магілы загінуўшых. Таксама для навучэнцаў школы актывісты атрада праводзяць экскурсіі ў школьным музеі “Культура і побыт нашых продкаў”. У бягучым годзе работа атрада будуецца па прынцыпе “роўны вучыць роўнага”. А яшчэ нашы выхаванцы вынікова выступаюць на спартыўных спаборніцтвах. Акрамя таго, навучэнцы ўжо не першы год праяўляюць сябе ў алімпіядным руху. Так, летась яны заваявалі 8 дыпломаў на абласным этапе (5 з якіх атрымалі вундэркінды з гімназіі), перамога чакала і на рэспубліканскім этапе прадметнай алімпіяды па беларускай мове.
Не толькі школьнікі могуць пахваліцца сваімі поспехамі і дасягненнямі, але і педагогі. Мабыць, самы яркі прарыў гэтага года — перамога дырэктара Хракавіцкай сярэдняй школы Андрэя Смаленчука на рэспубліканскім фестывалі “Педагагічны дэбют” у намінацыі “Малады дырэктар установы агульнай сярэдняй адукацыі”. Падтрымка педагагічнага калектыву і накіраванасць на поспех у выніку прывялі да доўгачаканай перамогі. Каласальны вопыт работы настаўнікаў раёна пераймаюць не толькі калегі з усёй Беларусі. Напрыклад, рэалізацыяй розных напрамкаў работы па патрыятычным выхаванні дзяцей і моладзі зацікавіліся прадстаўнікі маладзёжнага савета горада Чэхава Расійскай Федэрацыі, з якімі, дарэчы, наладжаны добрыя сувязі.
Алена КАСЬЯН-ПАЎЛЯНКОВА
Фота: “Маяк Палесся”
