Педагогі Міншчыны ўнеслі значны ўклад у развіццё сістэмы адукацыі краіны. Пра гэта падчас пасяджэння выніковай калегіі галоўнага ўпраўлення па адукацыі Мінаблвыканкама, якая прайшла ў сеніцкай сярэдняй школе № 2 Мінскага раёна, сказаў міністр адукацыі, паведамляе карэспандэнт “Настаўніцкай газеты”.
— Бягучы год аб’яўлены Годам якасці. Мінская вобласць па колькасці педагагічных работнікаў, якія маюць вышэйшую адукацыю, у сістэме дашкольнай адукацыі займае лідзіруючыя пазіцыі. Але ў гэтым кірунку таксама трэба рухацца наперад. Сёння мы працуем на перадачу педагагічнага вопыту, а на Міншчыне патэнцыял для прыцягнення маладых спецыялістаў, амаладжэння кадравага складу вялікі, — адзначыў Андрэй Іванец.
Міністр адукацыі звярнуў увагу на тое, што ў цэнтральным рэгіёне вядзецца вялікая работа з профільнымі класамі, і нагадаў, што магчымасці для адораных і таленавітых выпускнікоў пашырыліся: яны ўпершыню атрымалі магчымасць паступаць без экзаменаў на запатрабаваныя эканомікай спецыяльнасці, у тым ліку на педагагічныя. Дарэчы, з кожным годам колькасць вучняў 10—11 класаў, якія вучацца ў педагагічных класах Міншчыны, павялічваецца, а кожны трэці выпускнік паступае па выбраным профілі.
— Мы павінны не проста забяспечыць набор на педагагічныя спецыяльнасці, а прыцягнуць адораных і матываваных навучэнцаў, якія з гонарам будуць несці званне настаўніка, — акцэнтаваў Андрэй Іванец.
Падчас дыялогу з педагогамі Міншчыны міністр адукацыі закрануў пытанні патрыятычнага выхавання і нагадаў, што ў гэтым кірунку цэнтральны рэгіён — лідар у краіне. Прычым гэта вызначаецца не колькасцю ваенна-патрыятычных клубаў (хоць вобласць лідзіруе па іх колькасці), а якасцю і ўзроўнем той работы, якая праводзіцца.
Міністр адзначыў, што на выніковай калегіі галіновага ведамства чатыры ўстановы адукацыі Мінскай вобласці атрымалі званне лепшых.
— Упэўнены, што ў Год якасці гэты паказчык будзе толькі павялічвацца, — рэзюмаваў Андрэй Іванец.
Сістэма адукацыі Міншчыны ганарыцца сваімі вучнямі і педагогамі. Так, у мінулым годзе 248 навучэнцаў атрымалі 100-бальныя вынікі на ЦЭ і ЦТ. У скарбонцы навучэнцаў 28 узнагарод міжнародных конкурсаў. На ўзроўні прафесійнай адукацыі былі заваяваны 40 медалёў і 71 дыплом па выніках удзелу ў рэспубліканскіх і міжнародных конкурсах прафесійнага майстэрства.
— У 2023 годзе сістэма адукацыі працавала над выкананнем найважнейшых задач, сярод якіх павышэнне якасці адукацыі, захаванне яе даступнасці, стварэнне бяспечных умоў адукацыйнага працэсу, падрыхтоўка кваліфікаваных кадраў для рэальнага сектара эканомікі, — звярнуў увагу начальнік галоўнага ўпраўлення па адукацыі Мінаблвыканкама Мікалай Башко. — Важным напрамкам у сістэме адукацыі была і застаецца выхаваўчая работа.
Брэндам дашкольнай адукацыі вобласці сталі дашкольныя лясніцтвы. Менавіта таму ў Год якасці асаблівая ўвага будзе ўдзелена якаснай рабоце з дзецьмі па эколага-адукацыйным кірунку з удзелам не толькі педагогаў, але і спецыялістаў лясной гаспадаркі.
У сістэме агульнай сярэдняй адукацыі працягнецца работа над павышэннем яе якасці.
— Галоўная задача педагога — пры дапамозе ўменняў і ведаў, розных тэхналогій і методык арганізоўваць навучанне кожнага навучэнца ў адпаведнасці з яго здольнасцямі і магчымасцямі, — акцэнтаваў Мікалай Башко. — Флагманам павінен выступіць абласны інстытут развіцця адукацыі і метадычныя службы, а агульнай задачай павінна стаць фарміраванне адзінай метадычнай прасторы, якая будзе спрыяць росту прафесійнага майстэрства. Акрамя гэтага, неабходна ўдасканальваць сістэму падрыхтоўкі вучняў да рэспубліканскай алімпіяды па вучэбных прадметах, забяспечыць дзейсны кантроль за яе рэалізацыяй.
Штогод на Міншчыне павялічваецца колькасць навучэнцаў, якія выбіраюць для далейшага навучання класы прафесійнага кірунку. Так, у бягучым навучальным годзе пачалі працаваць 44 інжынерныя класы.
— Сфарміравана дарожная карта па рэалізацыі комплексу мер па фарміраванні інжынернага мыслення, — адзначыў начальнік галоўнага ўпраўлення. — Адным з кірункаў рэалізацыі бачым узаемадзеянне школ з цэнтрамі дадатковай адукацыі па адкрыцці аб’яднанняў па інтарэсах па канструяванні, робататэхніцы і 3D-мадэляванні, узаемадзеянне з БДТУ, БНТУ.
Падчас пасяджэння калегіі Мікалай Башко звярнуў увагу на неабходнасць узмацнення прафарыентацыйнай работы з навучэнцамі, адзначыўшы, што варта ўкараняць новыя тэхналогіі. Начальнік галоўнага ўпраўлення сказаў, што ў мінулым годзе каледжы вобласці падрыхтавалі для эканомікі і сацыяльнай сферы больш за 3,4 тысячы рабочых і спецыялістаў. Усім ім прадастаўлена першае працоўнае месца.
— У 2024 годзе перад сістэмай прафесійнай адукацыі стаяць сур’ёзныя задачы, — акрэсліў планы Мікалай Башко, — у першую чаргу па павышэнні якасці практыка-арыентаванай падрыхтоўкі высокакваліфікаваных кадраў у цесным узаемадзеянні з установамі агульнай сярэдняй адукацыі, арганізацыямі — заказчыкамі кадраў. Таксама неабходна працаваць над рэалізацыяй комплексу мер, накіраваных на скарачэнне дэфіцыту кадраў рабочых прафесій і павышэнне прэстыжу прафесійнай адукацыі.
Завяршальнай часткай калегіі стала традыцыйнае ўзнагароджанне пераможцаў абласнога конкурсу “За дасягненне высокіх паказчыкаў у развіцці адукацыі” па выніках мінулага года ў розных намінацыях, а таксама лепшых педагогаў Міншчыны.
Наталля САХНО
Фота аўтара
