Навучанне было нацэлена на развіццё прафесійнай кампетэнтнасці педагогаў ва ўмовах падрыхтоўкі навучэнцаў да інжынернай дзейнасці і праходзіла ў змешаным фармаце, паведаміў карэспандэнту “Настаўніцкай газеты” метадыст ВАІРА Аляксандр Кандратовіч.
У першай палове дня на тэарэтычных занятках удзельнікі павышэння кваліфікацыі пад кіраўніцтвам выкладчыкаў інстытута абменьваліся вопытам, сістэматызавалі напрацоўкі, удасканальвалі навыкі і набывалі новыя веды па псіхолага-педагагічнай падрыхтоўцы будучых інжынераў. Другая палова дня адводзілася практыка-арыентаваным заняткам на прамысловых прадпрыемствах і ва ўстановах вышэйшай адукацыі, што дазволіла паглыбіцца ў рэальныя інжынерныя працэсы. Прыярытэтная ўвага ўдзялялася сучасным тэхналогіям, праектнай дзейнасці, міждысцыплінарнаму падыходу і інтэграцыі інжынернага мыслення ў вучэбны працэс.
— Для эфектыўнай арганізацыі інжынернай адукацыі ў школе ключавое значэнне мае фарміраванне адпаведных ведаў і практычных навыкаў у педагогаў-практыкаў, — падкрэсліў Аляксандр Кандратовіч. — Менавіта спалучэнне тэарэтычных ведаў, практычных заняткаў і жывога ўзаемадзеяння з індустрыяй дапамагае па-новаму паглядзець на падрыхтоўку навучэнцаў да інжынернай дзейнасці. Гэта яскравы прыклад таго, як педагогіка, тэхналогіі і прамысловасць могуць аб’яднацца дзеля будучыні, дзе ў кожнага школьніка ёсць прывабная магчымасць стаць інжынерам новага пакалення. Мы разам не толькі ўмацоўваем прафесійныя кампетэнцыі педагогаў, але і задаём вектар развіцця інжынернай адукацыі ў рэгіёне.
У Віцебскім дзяржаўным універсітэце імя П.М.Машэрава педагогі азнаёміліся з асновамі 3D-мадэлявання, асвоілі работу ў праграмных асяроддзях TinkerCAD і Fusion 360, а таксама абмеркавалі магчымасці ўкаранення лічбавага канструявання ў школьныя праекты. Удзельнікі самастойна стваралі простыя мадэлі, аналізавалі іх структуру і функцыянальнасць, што дазволіла ім зразумець сутнасць інжынернага падыходу “ад ідэі — да прататыпа”. Выразны акцэнт быў зроблены на пытаннях візуалізацыі, прасторавага мыслення і фарміравання ў навучэнцаў навыкаў лічбавага праектавання.
На ўнітарным прадпрыемстве “Віцебскаблгаз” адбыліся практыка-арыентаваныя заняткі па тэме “Інжынерныя тэхналогіі ў газавай прамысловасці”. Педагогам прадэманстравалі перадавыя метады дыягностыкі і тэхнічнага абслугоўвання газавых аб’ектаў, уключаючы мабільныя лічбавыя комплексы, цеплавізары, газааналізатары і сістэмы маніторынгу. Значная ўвага ўдзялялася лічбаваму мадэляванню тэхналагічных працэсаў і магчымасцям яго ўжывання ў адукацыйным асяроддзі. На базе машынабудаўнічай кампаніі “Віцебскія пад’ёмнікі” ўдзельнікам павышэння кваліфікацыі паказалі поўны цыкл вытворчасці — ад праектавання да зборкі пад’ёмных механізмаў. Педагогі ўбачылі ў дзеянні шэраг інавацыйных інжынерных рашэнняў, азнаёміліся з вытворчай культурай і сучаснымі тэхналогіямі, дзе вядучая роля належыць эрганоміцы, бяспецы і аўтаматызацыі.
Чацвёрты дзень павышэння кваліфікацыі быў прысвечаны праектнай дзейнасці і энергетыцы рэгіёна. На практычных занятках пад кіраўніцтвам кандыдата педагагічных навук дацэнта кафедры ВАІРА Алы Мільман удзельнікі прымяралі на сябе ролі даследчыкаў і канструктараў, ствараючы ўласныя міні-праекты. Затым быў арганізаваны выезд на Віцебскую гідраэлектрастанцыю. Знаёмства з прынцыпамі аўтаматызацыі, устойлівасці і экалагічнай бяспекі перарасло ў абмеркаванне, якія вучэбныя кейсы і практычныя заданні можна стварыць на аснове ўбачанага.
— Праведзеныя заняткі служаць мадэллю адукацыйнага падыходу, заснаванага на рэальных кейсах, жывым узаемадзеянні і матывацыі да прафесійнага росту, — пракаменціраваў Аляксандр Кандратовіч. — Настаўнік можа натхніць вучняў на атрыманне тэхнічных прафесій толькі тады, калі ён знаёмы з сучаснымі тэхналогіямі і рэальнай вытворчасцю. У сваю чаргу прадпрыемствы зацікаўлены ў тым, каб будучыя спецыялісты прыходзілі да іх з разуменнем вытворчых працэсаў. Між тым інжынернае мысленне фарміруецца з ранняга ўзросту, таму заказчыкі кадраў гатовы актыўна супрацоўнічаць з установамі адукацыі. Кожны дзень навучання быў паўнацэннай педагагічнай падзеяй, якая аб’ядноўвала тэорыю, практыку і інавацыі. Набытыя педагогамі веды і вопыт стануць асновай для распрацоўкі новых вучэбных модуляў, міжпрадметных праектаў і лічбавых трэнажораў, адаптаваных пад рэаліі сучаснай школы. Гэта добрая інвестыцыя ў будучыню.
Таццяна БОНДАРАВА
Фота прадастаўлена ВАІРА
