Укараненне прынцыпу “аднаго акна” ўдасканаліць узаемадзеянне членаў арганізацыі

Пастаянны прадстаўнік Беларусі пры ААН Андрэй Дапкюнас на нефармальным пасяджэнні Генеральнай асамблеі ААН 15 сакавіка заклікаў сакратарыят ААН разгледзець магчымасць рэалізацыі ва ўзаемадзеянні з місіямі дзяржаў — членаў арганізацыі прынцыпу “аднаго акна”.

Нефармальнае пасяджэнне, якое адбылося ў штаб-кватэры ААН у Нью-Ёрку, прысвячалася ўдасканаленню ўзаемадзеяння пастаянных прадстаўніцтваў дзяржаў ААН з сакратарыятам арганізацыі. Як і многія іншыя, хто выступіў на пасяджэнні, прадстаўнік Беларусі заклікаў сакратарыят ААН разгледзець магчымасць рэалізацыі ва ўзаемадзеянні з місіямі дзяржаў-членаў прынцыпу “аднаго акна”, выкарыстанне якога распаўсюджана і шырока заахвочваецца ў нацыянальнай практыцы дзяржаўнага кіравання ў Беларусі. Андрэй Дапкюнас адзначыў важнасць таго, каб сакратарыят прыцягваў пастаянныя прадстаўніцтвы пры ААН да распрацоўкі правіл і рэгламентаў арганізацыі па лагістычных пытаннях яшчэ на пачатковым этапе гэтай работы.
Андрэй Дапкюнас прыцягнуў увагу ўдзельнікаў мерапрыемства да неабходнасці рэалізацыі і арганізацыі прынцыпаў так званага добрага кіравання і прывёў шэраг прыкладаў нелагічнай і няўмелай арганізацыі сакратарыятам ААН рабочага асяроддзя для супрацоўнікаў дыпламатычных місій. “Пры гэтым асноўны акцэнт кіраўнік беларускай місіі ў Нью-Ёрку зрабіў на магчымых шляхах выпраўлення сітуацыі, заснаваных на добразычлівым узаемадзеянні дыпламатычных місій і сакратарыята ААН”, — адзначылі ў прэс-службе беларускага МЗС.
“Галоўны сэнс прапаноў Беларусі тычыўся важнасці забеспячэння пастаяннага і бесперашкоднага канала штодзённай сувязі і ўзаемадзеяння паміж пастаяннымі прадстаўніцтвамі дзяржаў — членаў ААН і службамі сакратарыята па канферэнцыйным абслугоўванні, грамадскай інфармацыі, пратаколе, бяспецы, фінансавых разліках і іншых пытаннях”, — дадалі ў прэс-службе.
Асаблівую ўвагу ў сваім выступленні пастаянны прадстаўнік Беларусі ўдзяліў праблеме належнага і своечасовага выканання сакратарыятам мандатаў, узгодненых Ген-асамблеяй ААН. Ён таксама зрабіў акцэнт на неабходнасці папярэджваць крокі і ініцыятывы выканаўчых устаноў сістэмы ААН, якія заснаваны на недакладнай інтэрпрэтацыі даручэнняў галоўнага дарадчага органа ААН і з-за гэтага здольны нанесці шкоду атмасферы даверу і ўзаемаразумення ў арганізацыі.
Пасяджэнне па ўдасканаленні ўзаемадзеяння пастаянных прадстаўніцтваў дзяржаў — членаў ААН з сакратарыятам арганізацыі было ініцыіравана дэлегацыяй Беларусі пры падтрымцы “Руху недалучэння”. Гэтае пытанне ў Генасамблеі ААН абмяркоўвалася ўпершыню.

Пакінуць каментарый

Ваш электронны адрас не будзе апублікаваны. Абавязковыя палі пазначаны *