Сапраўдным падарункам для школьнікаў і іх бацькоў на Уздзеншчыне стане адкрыццё фізкультурнааздараўленчага комплексу “Брыз” з басейнам. Вучыцца плаваць тут будуць навучэнцы не толькі горада, але і навакольных вёсак, з якіх плануецца арганізаваць падвоз. Пра гэта карэспандэнту “Настаўніцкай газеты” расказала начальнік упраўлення па адукацыі, спорце і турызме Уздзенскага райвыканкама Вольга Кароль.
— Вольга Аляксандраўна, як школьнікі аздаравіліся за летнія месяцы?
— Летняя аздараўленчая кампанія прайшла на добрым узроўні. У раёне была арганізавана работа 23 аздараўленчых лагераў, з якіх 17 — з дзённым знаходжаннем і 6 — з кругласутачным. Аздараўленнем было ахоплена 1395 навучэнцаў, што склала 53% ад агульнай колькасці навучэнцаў раёна. План летняга аздараўлення непаўналетніх выкананы на 106%. У лагерах з дзённым знаходжаннем аздаравіліся 690 навучэнцаў, а з кругласутачным — 705 навучэнцаў. У раёне працавалі тры лагеры працы і адпачынку з дзённым знаходжаннем, дзе аздаравіліся 50 навучэнцаў, і адзін лагер з кругласутачным знаходжаннем, дзе правялі час 10 школьнікаў.
Другі год запар на базе Уздзенскай раённай гімназіі быў арганізаваны лагер абаронна-спартыўнага профілю з кругласутачным знаходжаннем, дзе 9 дзён жылі 19 дзяцей.
У летні перыяд значная ўвага ўдзялялася дзецям, якія знаходзяцца ў сацыяльна небяспечным становішчы, непаўналетнім, з якімі праводзіцца індывідуальная прафілактычная работа, дзецям з мнагадзетных сем’яў, дзецям-сіротам, дзецям-інвалідам.
Трэці год на базе гімназіі працаваў лагер з дзённым знаходжаннем для адораных дзяцей (на працягу 18 дзён). Сёлета ў ім аздаравілася 67 дзяцей. Дзеці займаліся рускай і беларускай мовамі, матэматыкай, гісторыяй, замежнай мовай. Кожны дзень праходзілі заняткі і выхаваўчыя мерапрыемствы. Гэты лагер карыстаецца вялікай папулярнасцю. Вельмі многа жадаючых туды трапіць. На наступны год думаем павялічыць план аздараўлення ў ім.
— Раскажыце, калі ласка, як падрыхтаваліся школы да новага навучальнага года.
— Установы адукацыі раёна да 20 жніўня атрымалі сертыфікаты гатоўнасці да новага навучальнага года. За летнія месяцы яны абнавіліся, папрыгажэлі, тут былі праведзены касметычныя і бягучыя рамонты, пафарбаваны сцены, столь, заменена вучэбная мэбля (Суткаўская базавая школа), вокны (Уздзенская раённая гімназія), праведзены рамонт электраабсталявання, эвакуацыйнай лесвіцы ў адным з дзіцячых садоў, закуплены камп’ютарныя класы (гімназія, сярэднія школы № 1 і № 2 Узды, Дзешчанская сярэдняя школа, Зенькавіцкая базавая школа). На гэтыя мэты было выдзелена каля 357 тысяч рублёў з абласнога і раённага бюджэту. З абласнога бюджэту былі таксама выдзелены сродкі на набыццё школьнага аўтобуса ва ўздзенскую сярэднюю школу № 1 для арганізацыі падвозу дзяцей.
У новым навучальным годзе гасцінна расчынілі дзверы 12 устаноў агульнай сярэдняй адукацыі раёна. За парты селі 193 першакласнікі. У гэтым годзе адбылася рэарганізацыя Нёманскага дзіцячага сада шляхам далучэння да Нёманскай сярэдняй школы.
З 1 верасня на базе Уздзенскай раённай гімназіі быў адкрыты спартыўны клас, у якім вучні будуць займацца футболам і баскетболам. Адкрыты таксама група ваенна-патрыятычнай накіраванасці, а таксама
група педагагічнай накіраванасці, якую, дарэчы, наведваюць навучэнцы іншых устаноў адукацыі. Акрамя арганізацыі ва ўстановах адукацыі па запытах навучэнцаў і бацькоў профільнага навучання на старшай ступені, у некаторых школах з новага навучальнага года вядзецца і дапрофільная падрыхтоўка: у 9 класе сярэдняй школы № 1 Узды на павышаным узроўні вывучаюцца беларуская мова і матэматыка, у гімназіі — хімія, біялогія (у 8 класе), англійская мова, хімія і біялогія (у 9 класе). У Озерскай сярэдняй школе ў 5 класе на павышаным узроўні арганізавана вывучэнне англійскай мовы.
Палова школ раёна следам за Дзешчанскай сярэдняй школай, якая летась прыняла ўдзел у пілотным праекце, сёння працуе па новых прынцыпах арганізацыі харчавання. 18 новых страў уведзена ў школьнае меню, і яны вельмі падабаюцца дзецям.
— Ці папоўніліся педагагічныя калектывы маладымі спецыялістамі?
— У педагагічную сям’ю раёна сёлета ўліліся 10 маладых спецыялістаў — настаўнікі пачатковых класаў (Озерская сярэдняя школа і Сямёнавіцкая базавая школа), біялогіі і хіміі (Хатлянская сярэдняя школа), фізічнай культуры і здароўя (Озерская сярэдняя школа і ўздзенская сярэдняя школа № 2), замежнай мовы (сярэдняя школа № 1 Узды), тэхнічнай працы, гісторыі (Уздзенская раённая гімназія), выхавальнік дашкольнай адукацыі (Цэнтр развіцця дзіцяці “Вясёлка”) і педагог дадатковай адукацыі (Цэнтр творчасці дзяцей і моладзі). Маладыя спецыялісты, якія прыходзяць да нас, маюць добры запас тэарэтычных ведаў, а вось практычныя навыкі набываюць на месцах. Мы вельмі зацікаўлены ў тым, каб маладыя педагогі заставаліся працаваць, таму аказваем ім усемагчымую дапамогу. Для знаёмства і згуртавання маладых педагогаў былі арганізаваны сустрэча са старшынёй райвыканкама, турыстычны злёт. Падбіраем ім жыллё, у тым ліку і арэнднае. Ва ўстановах за моладдзю замацоўваюцца вопытныя настаўнікі (а ў гімназіі яшчэ і вопытныя класныя кіраўнікі). Зараз прапрацоўваецца пытанне пераводу маладых спецыялістаў на кантрактную форму работы, што дасць магчымасць павялічыць ім заработную плату.
Сёння, дарэчы, раён адчувае патрэбу ў педагогах-псіхолагах і педагогах сацыяльных. Сёлета нашым выпускнікам было выдадзена 8 мэтавых накіраванняў у БДПУ. Думаю, гэта дапаможа вырашыць сітуацыю. Свой вынік дае і дзейнасць групы педагагічнай накіраванасці, якая працуе ў якасці міжшкольнага факультатыву.
Наталля КАЛЯДЗІЧ
Фота аўтара
