“Вялікі камень” лічыцца адным з буйнейшых праектаў КНР за мяжой

Для Кітайска-беларускага індустрыяльнага парка “Вялікі камень” 2017 год павінен стаць прарыўным. Аб гэтым заявіў кіраўнік адміністрацыі парка Аляксандр Ярашэнка.

Паводле слоў Аляксандра Ярашэнкі, у адміністрацыі парка разлічваюць, што гэты год стане для яго прарыўным у частцы прыцягнення інвестараў. “Вялікі камень” будзе развівацца па формуле “20—10—5”, у якой 20 — гэта новыя зарэгістраваныя кампаніі. “Мы ставім перад сабой задачу, каб па выніках 2017 года ў парку зарэгістравалася не менш за 20 рэзідэнтаў”, — растлумачыў ён. 10 рэзідэнтаў пачнуць будаваць свае вытворчыя аб’екты. Акрамя таго, у парку чакаюць, што 5 аб’ектаў у гэтым годзе ўжо будуць пабудаваны і ўведзены ў эксплуатацыю.

Цяпер у “Вялікім камені” 9 рэзідэнтаў. Аляксандр Ярашэнка расказаў, што чарговага зарэгістравалі літаральна гэтымі днямі. Гэта даччыная кампанія аўстрыйскай карпарацыі “Кранаспан”, якая плануе ўкласці каля 27 млн еўра ў свой праект у парку.

Кіраўнік адміністрацыі парка нагадаў, што “Вялікі камень” лічыцца адным з буйнейшых праектаў КНР за мяжой. Кітайскія кампаніі ўкладаюць у яго даволі сур’ёзныя інвестыцыі, аказваюць значную тэхніка-эканамічную дапамогу. Так, у парку з іх дапамогай пабудавалі электрастанцыю магутнасцю 110 кВ, рэканструявалі рэчышча ракі Ушы. Аляксандр Ярашэнка ў сувязі з гэтым падкрэсліў, што Кітайска-беларускі парк пазіцыянуе сябе не толькі як індустрыяльны, але і як экалагічны праект з адпаведна высокімі стандартамі ў гэтай сферы.

Пакінуць каментарый

Ваш электронны адрас не будзе апублікаваны. Абавязковыя палі пазначаны *