У Нацыянальным акадэмічным тэатры імя Янкі Купалы 4 сакавіка прайшло ўрачыстае мерапрыемства, прымеркаванае да Дня жанчын. Прагучалі самыя шчырыя віншавальныя словы ў адрас жанчын-педагогаў, настаўніц і выхавальніц, выкладчыц і навуковых работніц — усіх тых, хто вядзе па дарозе адкрыццяў і дасягненняў, развівае талент і паказвае шлях да першых перамог, вучыць любіць сваю краіну, думаць пра будучыню і шанаваць кожнае імгненне мінулага і сучаснасці.
Нагрудныя знакі Міністэрства адукацыі “Выдатнік адукацыі” і ганаровыя граматы прысутным педагогам уручыў намеснік міністра адукацыі А.У.Кадлубай. “Ужо стала добрай традыцыяй напярэдадні ўсімі любімага вясновага свята збірацца для таго, каб выказаць шчырыя словы ўдзячнасці прыгожай палове нашай сістэмы адукацыі і ўручыць заслужаныя ўзнагароды, — сказаў ён. — Ні для каго не сакрэт, што жанчыны — гэта цэнтр сусвету, але жанчыны, якія працуюць у сістэме адукацыі, унікальныя, таму што спалучаюць у сабе прыродную прыгажосць, прывабнасць, пяшчотнасць, паспяваюць развівацца прафесійна, ствараць утульнасць на працоўных месцах, наладжваць хатні побыт, захоўваць цяпло сямейнага ачага, выхоўваць не толькі сваіх дзяцей, а і многіх дзяцей нашых устаноў адукацыі”.
Аляксандр Уладзіміравіч таксама зачытаў віншаванне міністра адукацыі Ігара Васільевіча Карпенкі, у якім было падкрэслена, што вясновае свята — “даніна ўдзячнасці і павагі матулям, жонкам, дочкам, сяброўкам і калегам”. “У сістэме адукацыі Рэспублікі Беларусь больш за 70% складаюць жанчыны, і сёння цудоўная нагода выказаць вам словы шчырага захаплення і ўдзячнасці за вашу штодзённую працу, адказныя адносіны да сваіх прафесійных абавязкаў, педагагічнае майстэрства, мудрасць і цярпенне, — гаворыцца ў віншаванні. — Мы ганарымся вашымі поспехамі і поспехамі вашых вучняў. Вы не проста даяце ім веды — вы вырошчваеце будучыню нашай дзяржавы, выхоўваючы юных грамадзян нашай Беларусі на асабістым прыкладзе сапраўднага патрыятызму і цвёрдай жыццёвай пазіцыі. Неацэнны ваш уклад у выхаванне падрастаючага пакалення, захаванне сямейных традыцый і маральных каштоўнасцей беларускага грамадства. Дзякуй вам за вернасць прафесіі, высокі прафесіяналізм і выдатныя чалавечыя якасці”.
Да віншаванняў далучылася і старшыня Беларускага прафесійнага саюза работнікаў адукацыі і навукі Таццяна Раманаўна Якубовіч, якая пераканана, што беларускія жанчыны паспяхова рэалізоўваюць сябе ва ўсіх сферах: “Часам на нашы плечы кладуцца зусім не жаночыя клопаты, але мы паспяхова з імі спраўляемся. Дзякуй вам, дарагія педагогі, за вашу працу, за грамадзянскую і жыццёвую пазіцыю, ваш талент, а самае галоўнае — за вялікую працавітасць”.
Завяршылася святочнае мерапрыемства прэм’ерным паказам спектакля “Паўлінка”.
Вольга АНТОНЕНКАВА.
Фота Алега ІГНАТОВІЧА.
