Беларусь выбрана ў склад Выканаўчага савета ЮНЕСКА, паведамілі ў Пасольстве Беларусі ў Францыі.
39-я сесія Генеральнай канферэнцыі ЮНЕСКА праходзіць у Парыжы 30 кастрычніка — 14 лістапада. Беларусь атрымала шырокую падтрымку дзяржаў — членаў арганізацыі. Пасол Беларусі ў Францыі пастаянны прадстаўнік Беларусі пры ЮНЕСКА Павел Латушка ў сваім выступленні напярэдадні выбараў выказаў удзячнасць за садзейнічанне рэспубліцы ў захаванні і папулярызацыі матэрыяльнай і нематэрыяльнай спадчыны, культурнай разнастайнасці, за супрацоўніцтва па навуковых праграмах ЮНЕСКА.
Павел Латушка падкрэсліў, што, з’яўляючыся членам Выканаўчага савета, Беларусь мае намер прыкладаць актыўныя намаганні для павышэння ролі ЮНЕСКА, а таксама для развіцця супрацоўніцтва як з арганізацыяй у цэлым, так і з дзяржавамі-членамі.
ЮНЕСКА — вядучая міжнародная арганізацыя, якая ажыццяўляе сваю дзейнасць у галінах адукацыі, навукі і культуры. Выканаўчы савет ЮНЕСКА — кіруючы орган арганізацыі, які складаецца з 58 дзяржаў-членаў і выбіраецца тэрмінам на 4 гады. Беларусь, з’яўляючыся членам ЮНЕСКА з 1954 года, выбрана ў яе кіруючы орган пяты раз.
Па выніках выбараў Беларусь заняла 1-е месца па колькасці галасоў, аддадзеных за краіны, якія вылучылі свае кандыдатуры ў Выканаўчы савет ЮНЕСКА. За Беларусь прагаласавала 171 дзяржава са 184 дзяржаў, што прымаюць удзел у Генеральнай канферэнцыі.
“Выбранне ў склад Выканаўчага савета сведчыць аб высокім аўтарытэце Беларусі як у ЮНЕСКА, так і на міжнароднай арэне”, — адзначылі ў пасольстве.
