На парозе Козенскага дашкольнага цэнтра развіцця дзіцяці Мазырскага раёна карэспандэнтаў “Настаўніцкай газеты” з усмешкай сустракала загадчыца Галіна Алесіч. Вельмі хутка стала зразумела, што ў гэтай навучальнай установе пануе атмасфера пазітыву і ўзаемапавагі.
— А як жа інакш? — здзіўляецца агучанай думцы Галіна Міхайлаўна. — Мы ж працуем з дзеткамі!
І сапраўды. Але заўсёды хочацца зрабіць камплімент, калі трапляеш ва ўстанову адукацыі, дзе прафесіяналізм педагогаў спалучаецца з чалавечай цеплынёй і неабыякавасцю.
Загадчыца Галіна Алесіч з выхаванцамі
— У цэнтры выхоўваюцца 95 дзяцей — наша радасць і гордасць. Функцыянуюць 6 груп. Дзейнасць педагагічнага калектыву найперш накіравана на ўмацаванне здароўя малых. Канечне, мы актыўна працуем над тым, каб даць ім веды, навучыць любіць Радзіму. Упэўнены, што нашы выхаванцы стануць разумнымі, добрымі, інтэлектуальна развітымі людзьмі і сапраўднымі патрыётамі, — адзначыла загадчыца, паказваючы, як абсталяваны групы.
Кожнае дзіця мае магчымасць займацца любімай справай. Выхавальнікі стварылі творчае асяроддзе, якое прадастаўляе магчымасці варыятыўнасці заняткаў — лёгкія пераносныя шырмы, поліфункцыянальныя атрыбуты, неабходныя для ролевых гульняў, зручныя скрыні для дробнага гульнявога матэрыялу, столікі і канапы, модульная мэбля.
Пазнавальная актыўнасць дзяцей фарміруецца пры дапамозе розных метадаў, сродкаў і матэрыялаў. Гаворка ідзе пра дзіцячыя энцыклапедыі, ілюстраваныя выданні пра жывёльны і раслінны свет планеты, пра жыццё людзей розных краін, дзіцячыя часопісы, альбомы. Ёсць вялікая колькасць гульняў на развіццё логіка-матэматычнага мыслення. Арганізаваны куток прыроды, дзе прадстаўлены розныя хатнія расліны. Акрамя таго, дзеці могуць вырошчваць расліны самі.
— Адным з кірункаў адукацыйнага працэсу ў дашкольным цэнтры з’яўляецца фарміраванне асноў грамадзянска-патрыятычнай культуры выхаванцаў. Для гэтага ў групах створаны адпаведныя цэнтры, дзейнасць якіх накіравана на фарміраванне ў выхаванцаў грамадзянскасці, павагі да памяці абаронцаў Айчыны, чалавека працы і старэйшага пакалення. Мы вучым беражліва ставіцца да гісторыка-культурнай спадчыны нашага народа. У гэтым вельмі дапамагае тэматычны куток “Беларуская сядзіба”. Тут дзеці даведваюцца, што такое печка, бойка, калаўрот, вілы, чыгуны, калыска, і ўмеюць усім гэтым карыстацца. Яны з задавальненнем адкрываюць куфар, каб дастаць адтуль традыцыйнае беларускае адзенне, ручнікі, абрусы, пакрывалы. Усё гэта выкарыстоўваецца як пры арганізацыі тэматычных гульняў, так і на святах, падчас сустрэчы гасцей, — расказала загадчыца цэнтра.
Яшчэ для выхаванцаў Козенскага дашкольнага цэнтра развіцця дзіцяці створаны ўмовы для правядзення эксперыментаў. Гэта адбываецца ў спецыяльных лабараторыях, дзе сабрана ўсё неабходнае: шалі, мікраскоп, ёмістасці з сыпучымі, вадкімі, цвёрдымі рэчывамі, мерныя лыжачкі, посуд для правядзення доследаў. Ёсць вялікі выбар прыродных матэрыялаў для вывучэння, інструкцыі, памяткі, алгарытм догляду хатніх раслін, розныя схемы і мадэлі.
Развіццёвае прадметна-прасторавае асяроддзе арганізавана так, што дазваляе малым рабіць самастойны выбар: з кім, як, дзе і ў што гуляць.
Творчай актыўнасці і самавыяўленню дзяцей сродкамі мастацтва спрыяюць арганізаваныя ў групах цэнтры выяўленчай дзейнасці. У доступе — алоўкі і папера, васковыя крэйды, гуаш, пастэль, формачкі для лепкі, трафарэты, шаблоны. Прадугледжана навучанне розным тэхнікам малявання. А цэнтр музычна-тэатральнай дзейнасці прадстаўлены наборам дзіцячых музычных інструментаў, атрыбутамі, неабходнымі для арганізацыі пальчыкавага, настольнага, лялечнага, тэатра з цацкамі Бібабо, з выкарыстаннем малюнкаў. Групы аснашчаны аўдыятэхнікай, фанатэкай.
Усе гэтыя цэнтры ўваходзяць у адзіны цэнтр сюжэтна-ролевых гульняў. У выніку створанае прадметна-прасторавае асяроддзе забяспечвае рэалізацыю вучэбнай праграмы дашкольнай адукацыі, дапамагае ствараць спецыяльныя ўмовы для навучання дзяцей з асаблівасцямі псіхафізічнага развіцця, улічвае ўзроставыя і індывідуальныя асаблівасці выхаванцаў, нацыянальныя і культурныя традыцыі і каштоўнасці, матэрыяльныя і архітэктурна-прасторавыя асаблівасці тэрыторыі.
Вольга ДУБОЎСКАЯ
Фота Алега ІГНАТОВІЧА
