Вызначана Сусветная сталіца кнігі 2018 года

Афіны аб’яўлены Сусветнай сталіцай кнігі 2018 года, паведамілі ў прэс-службе ЮНЕСКА.

Генеральны дырэктар ЮНЕСКА Ірына Бокава аб’явіла Афіны (Грэцыя) Сусветнай сталіцай кнігі 2018 года па рэкамендацыі Кансультатыўнага камітэта. Горад быў выбраны ў сувязі з выключнай якасцю яго праграмы мерапрыемстваў, якая атрымала падтрымку ўсіх дзеячаў кніжнай індустрыі. Сярод мерапрыемстваў, якія прапаноўваюцца, — правядзенне сустрэч з пісьменнікамі, перакладчыкамі і ілюстратарамі, арганізацыя канцэртаў, тэматычных выстаў, паэтычных чытанняў і семінараў для спецыялістаў у галіне выдавецкай справы. Ідэя заключаецца ў тым, каб зрабіць кнігі даступнымі для ўсяго насельніцтва, уключаючы мігрантаў і бежанцаў. Таксама былі адзначаны развітасць культурнай інфраструктуры і вопыт горада ў арганізацыі міжнародных мерапрыемстваў.

Кожны год горад, аб’яўлены Сусветнай сталіцай кнігі, абавязваецца садзейнічаць папулярызацыі кніг і чытання, рэалізоўваць праграму мерапрыемстваў на працягу ўсяго года (стартам з’яўляецца святкаванне Сусветнага дня кнігі і аўтарскага права 23 красавіка).

У склад Кансультатыўнага камітэта ўваходзяць прадстаўнікі ЮНЕСКА, Міжнароднай асацыяцыі выдаўцоў і Міжнароднай федэрацыі бібліятэчных асацыяцый і ўстаноў. Колькасць заявак у гэтым годзе была рэкордна вялікай.