У Нацыянальным банку прайшоў заключны этап Рэспубліканскай алімпіяды па фінансавай дасведчанасці, паведамляе карэспандэнт “Настаўніцкай газеты”.
Алімпіяда праводзілася дзясяты раз. Яе арганізацыя — гэта сумесная ініцыятыва Нацыянальнага банка і Міністэрства адукацыі. Сёлета ва ўсіх этапах алімпіяды свае веды праверылі 25 000 навучэнцаў і толькі 21 вучань трапіў у фінал.
“Алімпіяда па фінансавай дасведчанасці — гэта спаборніцтва, якое дазваляе вызначыць самага фінансава адукаванага школьніка ў краіне, — расказала начальнік аддзела фінансавай дасведчанасці ўпраўлення інфармацыі і грамадскіх сувязей Нацыянальнага банка Юлія Саковіч. — Менавіта алімпіяда з’яўляецца адным з найбольш маштабных нацыянальных мерапрыемстваў па павышэнні фінансавай дасведчанасці”.
Асноўная мэта алімпіяды — папулярызацыя ведаў у галіне фінансаў, фарміраванне ў вучняў практычных навыкаў карыстання фінансавымі інструментамі, развіццё фінансавай культуры моладзі.
“Алімпіяда ўжо стала добрай традыцыяй, — падкрэсліла Ю.Саковіч. — Да нас прыехалі па тры прадстаўнікі кожнай вобласці і Мінска. Гэта лепшыя з лепшых, хто прайшоў шматэтапны адбор сярод тысяч навучэнцаў”.
Планаванне асабістага і сямейнага бюджэту, зберажэнні і запазычанні, лічбавы банкінг, бяспека ў фінансавай сферы і абарона ад махлярства, страхаванне, падаткі — усе гэтыя тэмы знайшлі адлюстраванне ў пытаннях тэстаў, якія выконвалі фіналісты. Таксама ў пералік заданняў былі ўключаны задачы на разлікі і вылічэнні, якія тычацца фінансаў. Да таго ж на кожным этапе было творчае заданне — напісанне эсэ, у якім навучэнцы разважалі на тэму фінансавай дасведчанасці.
“За апошнія дзесяць гадоў сітуацыя ў сферы фінансавай дасведчанасці істотна змянілася, — заўважыла прадстаўнік Нацбанка. — Агульны ўзровень фінансавай дасведчанасці насельніцтва павысіўся. І мы бачым, як узрасла цікавасць дзяцей да гэтай тэмы. Да таго ж многае зроблена на ўзроўні Міністэрства адукацыі, каб укараніць розныя модулі фінансавай дасведчанасці ў такія прадметы, як матэматыка, грамадазнаўства, гісторыя, інфарматыка і іншыя, на розных этапах адукацыі. Нацыянальны банк са свайго боку дапамагае ў тым, каб наша маладое пакаленне вырасла фінансава дасведчаным”.
Некалькі гадоў назад Нацыянальны банк і Міністэрства адукацыі выпусцілі падручнікі па фінансавай дасведчанасці для 5—7-х і 8—9-х класаў, а таксама для педагогаў. Гэтыя дапаможнікі маюць практычную накіраванасць і дапамагаюць настаўнікам у падрыхтоўцы і правядзенні факультатыўных заняткаў па адпаведным кірунку. Акрамя гэтага, у краіне праводзіцца праект па павышэнні фінансавай дасведчанасці педагогаў.
“Апошні этап алімпіяды — самы складаны, бо ўзровень канкурэнцыі паміж школьнікамі вельмі высокі, — адзначыла Ю.Саковіч. — Да таго ж адказаць трэба было на самыя складаныя пытанні двух узроўняў”.
Пасля праверкі заданняў і падліку балаў былі вызначаны пераможцы. Самым фінансава дасведчаным школьнікам краіны стаў навучэнец 11 класа Дабрынскай сярэдняй школы Ельскага раёна Іван Ляўчышын. Да алімпіяды яго рыхтавала настаўніца фізікі Лідзія Лаварэнка. Пераможца ўзнагароджаны дыпломам I ступені і грашовым прызам у памеры 1500 рублёў.
“Да алімпіяды я рыхтаваўся па матэрыялах адзінага партала фінансавай дасведчанасці Нацыянальнага банка, — падзяліўся пераможца. — Акрамя гэтага, займаліся з Лідзіяй Аляксандраўнай. Паступаць планую ў БДУ на спецыяльнасць “Кібербяспека” на факультэт прыкладной матэматыкі і інфарматыкі”.
Дыплом ІІ ступені і грашовы прыз у памеры 1 250 рублёў атрымаў навучэнец сярэдняй школы № 11 імя генерала арміі А.І.Антонава Гродна Аляксандр Жук, а дыплом III ступені і грашовы прыз у памеры 1 000 рублёў дасталіся навучэнцу сярэдняй школы № 87 Мінска Міхаілу Клокелю.
“Удзельнікі заключнага этапу алімпіяды, якія не занялі прызавых месцаў, узнагароджаны грашовымі прэміямі ў памеры 300 рублёў і дыпломамі фіналістаў, — падсумавала Юлія Саковіч. — Таксама грашовымі прэміямі ў памеры 300 рублёў адзначаны настаўнікі, якія падрыхтавалі пераможцу і прызёраў”.
Рэспубліканская алімпіяда па фінансавай дасведчанасці сярод навучэнцаў праводзілася ў верасні — снежні. У чатырох этапах свае веды праверылі навучэнцы 2270 устаноў агульнай сярэдняй адукацыі ўсіх рэгіёнаў краіны.
Наталля САХНО
Фота Алега ІГНАТОВІЧА
