Як мага больш інтэграцыі, ні ў якім разе не менш

- 11:07Інфармацыйная гадзіна

Мінск прадэманстраваў, што можа ўнесці ўклад у гарантаванне стабільнасці і бяспекі ў Еўропе. Аб гэтым у інтэрв’ю газеце “СБ. Беларусь сегодня” заявіў маршалак сената Польшчы Станіслаў Карчэўскі.

“Мінск у апошнія гады прадэманстраваў, што ён можа ўнесці ўклад у гарантаванне стабільнасці і бяспекі ў гэтай частцы Еўропы. Я асабіста шкадую, што не ўсе дамоўленасці мінскіх пагадненняў, якія датычацца канфлікту ва Украіне, выконваюцца, але я ўпэўнены, што калі б такіх дамоўленасцей не было наогул, то было б намнога горш”, — лічыць Станіслаў Карчэўскі.

Паводле яго слоў, Беларусь паказвае, што пэўная мадэль стыку культур, сустрэчы Усходу і Захаду, можа рэалізоўвацца гарманічна і без канфліктаў. “Беларусі важна ўмела карыстацца гэтымі козырамі ў сваёй міжнароднай і рэгіянальнай дзейнасці”, — дадаў маршалак сената Польшчы.

Адказваючы на пытанне аб сваім стаўленні да ідэі “інтэграцыі інтэграцый”, ён сказаў, што супрацоўніцтва і інтэграцыя з’яўляюцца каштоўнасцямі. “У ЕС да гэтага часу прытрымліваліся прынцыпу: як мага больш інтэграцыі, ні ў якім разе не менш, але ў такіх умовах, як цяпер, трэба быць гібкім, — лічыць Станіслаў Карчэўскі. — Я аддаю перавагу такому падыходу: супрацоўнічаць там, дзе гэта магчыма і карысна, але не лічыць гэтае пытанне догмай. Самым важным з’яўляецца чалавек, што, дарэчы, наколькі я ведаю, часта паўтарае прэзідэнт Аляксандр Лукашэнка. Мне таксама такі падыход вельмі блізкі”.

На думку Станіслава Карчэўскага, патрэбны гісторыі поспеху, якія пакажуць, што беларуска-польскія сустрэчы — гэта не толькі кантакты і візіты, але і рэальныя выгады і вынікі для грамадзян дзвюх краін. “Галоўным пунктам майго візіту ў Мінск з’яўляецца ратыфікацыя Саветам Рэспублікі падпісанага летам пагаднення аб супрацоўніцтве ў сферы адукацыі, — расказаў ён. — Яно прыносіць рэальную карысць і адкрывае магчымасці для абодвух бакоў. У ім рэгулюецца, напрыклад, пытанне прыбыцця польскіх настаўнікаў у Беларусь, але і даецца шанс стварэння маладзёжнага абмену паміж нашымі краінамі або паглыблення супрацоўніцтва паміж ВНУ. Мы думаем таксама аб сумесных эканамічных праектах”.

Нагадаем, што 5 снежня сенатары прагаласавалі за ратыфікацыю беларуска-польскага пагаднення аб супрацоўніцтве ў адукацыі. Дакумент будзе садзейнічаць развіццю прамых кантактаў паміж установамі адукацыі, узаемаабмену студэнтамі, аспірантамі і педагагічнымі работнікамі. Пагадненне прадугледжвае арганізацыю павышэння кваліфікацыі і перападрыхтоўку педагагічных работнікаў у галіне беларускай і польскай філалогіі, удзел у сумесных адукацыйных мерапрыемствах.

Кожны навучальны год краіны змогуць на пяць месяцаў накіроўваць адна адной на навучанне па дзесяць студэнтаў, аспірантаў, дактарантаў. Штогод на ўмовах парытэту Беларусь і Польшча могуць прымаць на навучанне ў ВНУ да 20 чалавек, якія належаць да нацыянальных меншасцей. Што датычыцца педработнікаў, то бакі гатовы прымаць на стажыроўкі кожны год па 12 чалавек тэрмінам на адзін месяц.

Маршалак сената Польшчы таксама дадаў, што ў сучасным свеце асновай любой інтэграцыі з’яўляецца перш за ўсё эканоміка. “Некалькі сумесных паспяховых дзелавых праектаў зблізяць нашы краіны больш, чым сотні слоў. Такая логіка сучасных міжнародных адносін. Патрэбна толькі паслядоўна ўвасабляць яе ў жыццё”, — рэзюмаваў ён.