Неверагодна цёплую і творчую атмасферу ствараюць педагогі Рагачоўшчыны для развіцця дзяцей у садах і школах. У цэнтры іх увагі — патрыятычнае выхаванне, работа з адоранымі і матываванымі дзецьмі, з навучэнцамі аграрных класаў. Асаблівае значэнне таксама надаецца развіццю музейнай педагогікі, перспектыўным праектам, дзейсным аўтарскім педагагічным практыкам. Падрабязнасці — у матэрыяле карэспандэнта “Настаўніцкай газеты”.
Настаўніца хіміі Святлана Калугіна з вучнямі
У Гарадзецкім дзіцячым садзе функцыянуюць дзве рознаўзроставыя групы інтэграванага навучання і выхавання. Дарэчы, тут з’явілася першае на Рагачоўшчыне дашкольнае лясніцтва “Ляснічка”. Дзеці разам з выхавальнікамі і работнікамі лясгаса высадзілі памятную алею туй і самшытаў. Цікава, што дрэвы назвалі ў гонар маленькіх выхаванцаў. Дашкольнікі не толькі ведаюць вершы аб прыродзе, правілы паводзін у лесе, але і абяцаюць абараняць прыроднае багацце беларускай зямлі. Юныя лесаводы ў прыгожай бела-зялёнай форме трапятліва даглядаюць свае дрэвы і ведаюць, як працаваць з рыдлёўкай і палівачкай.
Як адзначыла загадчыца Гарадзецкага дзіцячага сада Вераніка Шусцер, прывіццё беражлівых адносін да прыроды, любові да роднага краю, папулярызацыя прафесій лясной галіны — асноўныя мэты стварэння дашкольнага лясніцтва. Маленькія чамучкі робяць першыя паспяховыя крокі ў вывучэнні прыроды, знаёмяцца з раслінным і жывёльным светам беларускіх лясоў, вучацца берагчы лясныя багацці.
— Як паказвае вопыт, многія дзеці, якія наведваюць аб’яднанні дашкольнага лясніцтва, у далейшым звязваюць свой лёс з лясной гаспадаркай, — адзначае Вераніка Рыгораўна. — Праводзіцца вялікая работа ў гэтым напрамку. Напрыклад, экскурсія ў Рагачоўскі лясгас дазволіла азнаёміць хлопчыкаў і дзяўчынак з прафесіямі лясной галіны. Акрамя таго, у рамках акцыі былі пасаджаны дрэвы ў лесе — рыхтуем дастойную змену нашым лесаводам. Акрамя таго, у планах стварыць на тэрыторыі сада ўласны куток лесу. Гэтая падзея будзе прымеркавана да 80-годдзя вызвалення Беларусі ад нямецка-фашысцкіх захопнікаў.
У сельскім садзе імкнуцца ўносіць свой пасільны ўклад у азеляненне і добраўпарадкаванне тэрыторыі дашкольнай установы. Пасадзіць вечназялёныя туі падрастаючыя лесаводы прапанавалі дэлегацыі Выдавецкага дома “Педагагічная прэса”. Дзеці паабяцалі назіраць за ростам высаджаных маленькіх туй.
Захоўваючы памяць
Настаўніца пачатковых класаў Ларыса Балашова
Гарадзецкая сярэдняя школа ўразіла вучэбнай прасторай і сучасным абсталяваннем кабінета абслуговай працы. Настаўнікі расказалі пра дзейнасць груп аграрнай накіраванасці, а яшчэ пра школьную музейную педагогіку. Тут выхоўваюцца сапраўдныя патрыёты Беларусі. Да сімвалаў і традыцый школы, раёна і краіны ў іх трапяткое стаўленне. Як прызнаюцца самі навучэнцы, быць у складзе сцяганоснай групы ганарова. Гэтае права заслугоўваецца выдатнымі дасягненнямі ў вучобе, удзелам у грамадскім жыцці школы, адказнасцю і надзейнасцю.
— Грамадзянска-патрыятычнае выхаванне моладзі — асноўны акцэнт, на якім будуецца дзейнасць нашай установы, — падкрэслівае дырэктар Гарадзецкай сярэдняй школы Святлана Ткачова. — Вучні з гордасцю могуць сказаць, што ведаюць і берагуць гісторыю сваёй малой радзімы. У нашым школьным гісторыка-краязнаўчым музеі яны падрабязна раскажуць пра кожную прадстаўленую фатаграфію або экспануемы прадмет, якія звязаны з жыццём іх роднай вёскі. Музей стаў тым месцам, дзе былі ўвасоблены многія задумы настаўнікаў. Гэта сапраўды важны рэсурс пры правядзенні ўрокаў мужнасці, класных, інфармацыйных гадзін і прадметных тыдняў. Музей наведваюць навучэнцы іншых устаноў адукацыі, а таксама госці школы. Матэрыялы прасторы ўвекавечваюць памяць аб настаўніках — ветэранах Вялікай Айчыннай вайны, жыхарах вёскі, якія змагаліся на франтах і вялі партызанскую барацьбу супраць фашыстаў. Тут ёсць звесткі аб першых калгасніках, перадавіках сельскай гаспадаркі мінулага стагоддзя і цяперашняга часу. Назапашана нямала матэрыялу аб гісторыі навучальнай установы.
— Будучы настаўнікам пачатковых класаў, імкнуся расказваць маленькім выхаванцам пра подзвігі аднавяскоўцаў, простых людзей, якія ў складанай для краіны сітуацыі аддалі Радзіме ўсе сілы, каб мы і нашы дзеці маглі жыць пад мірным небам, — падсумоўвае настаўніца пачатковых класаў Ларыса Віктараўна Балашова.
Талентамі ззяюць
Дырэктар Рагачоўскага раённага цэнтра творчасці дзяцей і моладзі Анжаліка Драбкова расказала пра фішкі цэнтра — новы напрамак аб’яднання па інтарэсах “Юны міратворац”, дзе ў цесным супрацоўніцтве з Гомельскім абласным аддзяленнем Беларускага фонду міру працягваюцца міратворчыя добрыя справы. Акрамя таго, больш за 200 падлеткаў з Расіі і Беларусі штогод вось ужо 32-і раз адпачываюць у міжнародным палатачным лагеры сяброўства дзяцей брацкіх народаў “Крынiчка”. Галоўная яго мэта — выхаванне лідарскіх і міратворчых якасцей.
— Нашу ўстанову наведваюць больш за 1450 дзяцей, якія займаюцца ў 120 аб’яднаннях па інтарэсах, працуюць гурткі не толькі на базе нашага цэнтра, але і ў школах горада і раёна, — тлумачыць Анжаліка Яўгенаўна. — Шматпрофільная ўстанова рэалізуе адукацыйныя праграмы мастацкага, тэхнічнага, экалагічнага і іншых напрамкаў. На занятках дзеці вучацца свабодна і гарманічна паводзіць сябе на сцэне, развіваюць акцёрскае майстэрства, пачуццё рытму, музыкальнасць, слых, уважлівасць. Юныя таленты ўдзельнічаюць у розных конкурсах і дасягаюць высокіх вынікаў. Так, ганаровага звання “ўзорны” ўдастоены адразу некалькі калектываў — вакальная студыя “Дзіцячы час”, ансамбль эстраднага танца “Чароўны свет”, харэаграфічная студыя “Мілата” і тэатр моды “МиЛеди”.
На занятках у аб’яднанні па інтарэсах “ПаZітыў ТБ” юнакі вучацца быць смелымі, актыўнымі і пазітыўнымі, вывучаюць асновы акцёрскага майстэрства, асвойваюць мастацкае чытанне і сцэнічную культуру, праходзяць школу вядучых і школу гульнятэхнікаў. Больш за тое, яны самі пішуць сцэнарыі, рыхтуюць рэпартажы. Іх смелая спроба пяра на слыху не толькі ў родным горадзе і на Гомельшчыне — выпускнік гуртка паступіў на акцёрскае аддзяленне Беларускай дзяржаўнай акадэміі мастацтваў. Дарэчы, героем аднаго з сюжэтаў юных карэспандэнтаў стаў міністр адукацыі Андрэй Іванец. Цэнтр творчасці актыўна ўключыўся ў інавацыйны праект “Укараненне мадэлі ваенна-патрыятычнага выхавання ў адкрытай адукацыйнай прасторы”. Адкрыты чатыры аб’яднанні ваенна-патрыятычнай накіраванасці, наладжана цеснае супрацоўніцтва з прадстаўнікамі ваенкамата, гарадской дэсантнай арганізацыяй у Бабруйску. Дзеці горада і раёна творчыя, таленавітыя і захопленыя, педагогі вучаць іх раскрываць уласны талент у атмасферы камфорту і крэатыву.
Алена КАСЬЯН-ПАЎЛЯНКОВА
Фота аўтара