Педагогі брэсцкай сярэдняй школы № 20 імя Героя Савецкага Саюза Д.М.Карбышава фарміруюць актыўную грамадзянскую пазіцыю ў вучняў з дапамогай лічбавых тэхналогій і сацыяльнай творчасці. Падрабязнасці — у матэрыяле карэспандэнта “Настаўніцкай газеты”.
— Лічбавыя тэхналогіі сталі неад’емнай часткай нашага жыцця, — гаворыць кіраўнік па ваенна-патрыятычным выхаванні настаўнік гісторыі Аляксандр Філіповіч. — Сучасныя падлеткі актыўна карыстаюцца сацыяльнымі сеткамі, мабільнымі дадаткамі і інтэрнэт-платформамі, дзякуючы якім можна паспяхова развіваць сацыяльную творчасць. Так, лічбавыя тэхналогіі дазваляюць моладзі ствараць і распаўсюджваць пэўны кантэнт, прапаноўваць цікавыя ідэі, ініцыятывы, удзельнічаць у грамадскай дзейнасці праз розныя анлайн-пляцоўкі і рэалізоўваць на іх базе розныя праекты, асвятляць сацыяльна значныя падзеі і прыцягваць увагу да праблем грамадства.
У канцы 2022 года педагогі і вучні 20-й школы пачалі праект “Мабільная старонка памяці”, актуальнасць якога абумоўлена спробамі некаторых дзяржаў фальсіфікаваць гісторыю Вялікай Айчыннай вайны: перапісаць яе вынікі, наўмысна прынізіўшы ўклад СССР у перамогу над фашызмам.
— У рамках праекта вучні збіралі і сістэматызавалі інфармацыю пра ветэранаў Вялікай Айчыннай вайны, якія пражываюць у мікрараёне школы, і стварылі тэматычны лічбавы рэсурс, — расказвае Аляксандр Філіповіч. — Але пошукавая работа ў гэтым кірунку пачалася яшчэ ў 2005 годзе, калі назапашваліся анкеты пра жыццёвы і баявы шлях мясцовых ветэранаў. Дзякуючы сучасным тэхнічным сродкам, гэтую інфармацыю вырашылі пазней сістэматызаваць для мемарыялізацыі гісторыі.
Першай спробай абагульнення сабранага матэрыялу стала даследчая работа, на аснове якой быў створаны Telegram-канал з адпаведнымі хэштэгамі. Скарыстаўшыся імі, можна хутка знайсці актуальную інфармацыю.
— На мабільнай старонцы памяці публікуюцца анкеты ветэранаў Вялікай Айчыннай вайны з біяграфічнымі данымі, успамінамі і ўзнагародамі, а таксама галасавыя паведамленні, якія дазваляюць людзям з абмежаванымі магчымасцямі пачуць гэтую інфармацыю, — працягвае педагог. — Асаблівую ўвагу прыцягваюць рубрыкі “Мой прадзядуля”, “Гісторыя ў карцінках” і “Без вестак”, відэаролікі пра ветэранаў і электронныя кнігі. Акрамя таго, Telegram-канал знаёміць з падзеямі, якія адбыліся ў пэўны дзень вайны, сюжэтамі і трэйлерамі мастацкіх фільмаў на ваенную тэматыку. А дзякуючы боту, можна падзяліцца гісторыямі пра іншых ветэранаў. Пасля праверкі гэтая інфармацыя таксама размяшчаецца на мабільнай старонцы памяці.
Мінулай восенню Telegram-канал пашырыў фармат кантэнту. Школьнікі пачалі даследаваць розныя пытанні айчыннай гісторыі і рыхтаваць тэматычныя відэаролікі, якія адразу знайшлі водгук у аўдыторыі. Так, выпуск, прысвечаны Герою Савецкага Саюза Д.М.Карбышаву, набраў больш за 1000 праглядаў.
— Наш праект адзначаны дыпломамі раённых канферэнцый, а таксама дыпломам І ступені гарадскога і абласнога этапаў рэспубліканскага маладзёжнага праекта “100 ідэй для Беларусі”, — заўважае Аляксандр Філіповіч.
Па словах педагога, лічбавыя інструменты дазваляюць школьнікам ствараць уласныя сацыяльныя праекты, укладваючы ў іх ідэі і меркаванні наконт важных грамадскіх пытанняў, даведвацца пра розныя сацыяльныя і культурныя ініцыятывы. У сваю чаргу сацыяльная творчасць развівае ў школьнікаў камунікатыўныя і лідарскія ўменні і навыкі, што вельмі важна для фарміравання актыўнай грамадзянскай пазіцыі і ўсведамлення сваёй адказнасці за будучыню Радзімы.
— Але пры гэтым неабходна забяспечыць доступ да якасных адукацыйных рэсурсаў і навучыць дзяцей асэнсаванаму і адказнаму выкарыстанню лічбавых інструментаў, — падагульняе настаўнік.
Сяргей ГРЫШКЕВІЧ
