Кацярына Шахалевіч пасля заканчэння ўніверсітэта прыйшла працаваць у родную сярэднюю школу № 3 Жабінкі. Малады педагог сябе добра зарэкамендавала, і зараз яна ўжо намеснік дырэктара па вучэбнай рабоце. Падрабязнасці — у матэрыяле карэспандэнта “Настаўніцкай газеты”.
Бацькі Кацярыны Шахалевіч заўсёды гаварылі, што іх дачка будзе настаўніцай. Так урэшце і атрымалася.
— Усвядомленае жаданне прысвяціць сваё жыццё настаўніцтву з’явілася ў 9 класе, калі дапамагала малодшым у вучобе, — успамінае Кацярына Аляксандраўна. — А паколькі вызначыцца з пэўным профілем так і не змагла, выбрала прафесію настаўніцы пачатковых класаў, якая сумяшчае розныя прадметы.
Настаўніца абслуговай працы Ганна Кулагіна да апошняга спадзявалася, што яе здольная выхаванка, актыўная ўдзельніца алімпіяднага руху з 8 класа, будзе, як і яна, вучыць дзяўчат рукадзельнічаць і кухарыць. І няхай мара педагога не ажыццявілася, але атрыманыя веды спатрэбіліся Кацярыне Шахалевіч не толькі ў побыце, але і ў сённяшняй рабоце.
— Кацярына з дзяцінства вылучалася арганізатарскімі здольнасцямі, — гаворыць дырэктар ліцэя Жабінкі Ганна Кулагіна. — Мы шмат часу праводзілі разам, калі рыхтаваліся да алімпіяд. Валявая, мэтанакіраваная, адказная… Была ўпэўнена, што з яе атрымаецца цудоўная настаўніца працоўнага навучання, бо педагагічная прафесія — гэта штодзённая творчасць. А Кацярына — натура творчая.
Пасля заканчэння псіхолага-педагагічнага факультэта БрДУ імя А.С.Пушкіна былую вучаніцу з радасцю сустрэла родная сярэдняя школа № 3 Жабінкі з любімымі педагогамі.
— Вельмі ўзрадавалася, калі вярнулася туды, — заўважае Кацярына Аляксандраўна. — Родныя сцены дапамаглі хутчэй адаптавацца, ды і ўніверсітэт даў належную метадычную падрыхтоўку.
Важную ролю ў прафесійным станаўленні маладога спецыяліста адыгралі яе куратар Алена Міхайлаўна Кузьміч і тагачасны намеснік дырэктара па вучэбнай рабоце Алена Анатольеўна Кузьміч.
У школе педагог працуе пяты год. За гэты час Кацярына Шахалевіч добра зарэкамендавала сябе, таму ёй нядаўна прапанавалі стаць намеснікам дырэктара па вучэбнай рабоце.
— Пагадзілася, бо хацелася паспрабаваць сябе ў чымсьці новым, тым больш заўсёды магу разлічваць на моцную падрымку калектыву, — падкрэслівае Кацярына Аляксандраўна. — Асаблівых цяжкасцей не адчуваю, усе пытанні вырашаюцца ў рабочым парадку.
Нягледзячы на адміністрацыйную пасаду, настаўніца не пакінула сваіх любімых чамучак. Працуючы з імі, яна актыўна звяртаецца да праектнай дзейнасці, напрыклад, у галіне краіназнаўства і бацькоўскіх прафесій.
Мамы і таты задаволены маладым педагогам, бо лічаць яе прафесіяналам, які любіць дзяцей і сваю справу. Гэта пацвярджае і шматгадовы вопыт работы Кацярыны Шахалевіч у летні час выхавальніцай у загарадным лагеры “Арляня”, што ў Жабінкаўскім раёне. Але там педагог наўмысна працуе толькі ў старшых атрадах, каб чаргаваць розныя віды дзейнасці.
Кацярына Аляксандраўна сыходзіць з прафесіі не толькі не збіраецца, але і плануе рэалізавацца ў сістэме адукацыі па максімуме. У тым, што гэта маладому педагогу па плячы, сумнявацца не даводзіцца, ведаючы яе настойлівы і мэтанакіраваны характар.
Сяргей ГРЫШКЕВІЧ
Фота аўтара
