Магілёўскі абласны ліцэй № 3 пачаў функцыянаваць 25 гадоў назад. Для навучальнай установы — не вельмі вялікі тэрмін. Але за такі непрацяглы час 3-ці ліцэй змог стаць сапраўдным флагманам у сферы агульнай і вобласці. Гэтая ўстанова даўно з’яўляецца нязменным лідарам адпаведнага абласнога працоўнага спаборніцтва. Некалькі разоў ліцэй уваходзіў ва ўмоўны рэйтынг лепшых устаноў адукацыі рэспублікі. За забеспячэнне якаснага адукацыйнага працэсу быў узнагароджаны Ганаровай граматай Міністэрства адукацыі.
— Станоўчых вынікаў у працы нашага педагагічнага калектыву нямала. А між тым, калі ліцэй быў толькі створаны, адукацыйны працэс арганізоўваўся амаль з нуля. Але дзякуючы энтузіязму настаўнікаў, іх пастаяннаму імкненню да павышэння якасці адукацыі, ліцэй змог заняць годнае месца сярод навучальных устаноў свайго тыпу, па шэрагу паказчыкаў быць першым у рэгіёне, — расказаў дырэктар установы заслужаны работнік адукацыі Канстанцін Грыгаровіч.
Сёння ліцэй — навучальная ўстанова, якая аснашчана сучасным абсталяваннем. У распараджэнні вучняў і педагогаў спадарожнікавае тэлебачанне, факсімільная сувязь, персанальныя камп’ютары, прынтары, размнажальная тэхніка, лінгафонныя кабінеты, разнастайныя вучэбныя лабараторыі. Спектр напрамкаў адукацыйнай дзейнасці тут вельмі шырокі. Але галоўнае, на што робяць упор, — дасягненне паспяховасці кожнага вучня. Ліцэй арыентаваны на працу з адоранымі дзецьмі, таму прынцыпы работы заснаваны на прымяненні асобаснага падыходу да ўсіх навучэнцаў. Педагагічны калектыў мэтанакіравана працуе над стварэннем умоў для самаразвіцця дзяцей, прыцягнення іх да творчай, навукова-даследчай дзесярэдняй адукацыйнасці, алімпіяднага руху і, адпаведна, падрыхтоўкай да паступлення ў вышэйшыя навучальныя ўстановы.
Паколькі вывучэнне прадметаў у ліцэі вядзецца на павышаным узроўні, то вялікая ўвага ўдзяляецца якасці адукацыі. Настаўнікі бесперапынна працуюць над удасканаленнем вучэбнага працэсу. Перыядычна ўстанова займаецца рэалізацыяй інавацыйных праектаў. Так, менавіта ў 3-м ліцэі на працягу двух гадоў праводзілі эксперыментальную работу па апрабацыі вучэбных планаў для профільнага навучання. Пад кіраўніцтвам намесніка міністра адукацыі Раісы Сідарэнка мясцовыя педагогі распрацавалі і апрабавалі розныя варыянты ажыццяўлення профільнага навучання. Вынікі праведзенай работы ўвайшлі ў агульныя рэкамендацыі аб укараненні інавацыі ў масавую практыку.
Непасрэдна ў ліцэі зараз арганізавана навучанне па пяці напрамках: фізіка-матэматычным, хіміка-біялагічным, грамадазнаўчым, хіміка-матэматычным, матэматычна-філалагічным. Важна, што навучэнцы прыходзяць сюды ўжо скіраванымі на канкрэтны профіль. А ўсё таму, што ў ліцэі добра наладжана дапрофільная падрыхтоўка. Школьнікі могуць наведваць курсы “Юнага ліцэіста”, класы сумеснага навучання пры сярэдняй школе № 21 горада.
— Усе дзеці, якія прыходзяць на навучанне ў ліцэй, — адораныя. Таму сваёй асноўнай мэтай мы бачым далейшае раскрыццё іх здольнасцей. На гэта кансалідаваны ўсе настаўнікі, і агульнымі намаганнямі мы дасягаем даволі добрых вынікаў у гэтым кірунку. На працягу многіх гадоў нашы вучні дэманструюць лепшыя паказчыкі па вобласці ў алімпіядным руху і цэнтралізаваным тэсціраванні. Сапраўдным нашым гонарам з’яўляюцца 20 перамог ліцэістаў на розных міжнародных алімпіядах, а таксама звыш 200 хлопцаў і дзяўчат, якія сталі стыпендыятамі спецыяльнага фонду прэзідэнта па сацыяльнай падтрымцы адораных навучэнцаў і студэнтаў. За высокія дасягненні ў падрыхтоўцы пераможцаў прадметных алімпіяд і інтэлектуальных конкурсаў наш калектыў у свой час быў узнагароджаны Ганаровай граматай Міністэрства адукацыі, — паведаміў Канстанцін Міхайлавіч.
Па яго словах, дасягаць такой выніковасці дазваляе адпаведны падыход да працы. Педагогі ліцэя імкнуцца акрыліць, падтрымаць кожнага вучня, патлумачыць яму карысць удасканалення сваіх ведаў, але ні ў якім разе не навязваць абавязковасць удзелу ў конкурсе або алімпіядзе. Настаўнікі аказваюць вучням максімальную дапамогу ў падрыхтоўцы, але кантроль з іх боку ненадакучлівы і праходзіць хутчэй у форме кансультацый, якія накіроўваюць самападрыхтоўку дзяцей у патрэбнае рэчышча.
Дзеля дасягнення гэтай мэты педагагічны калектыў ліцэя знаходзіцца ў пастаянным прафесійным развіцці. Настаўнікі нястомна распрацоўваюць і ўкараняюць новыя перадавыя методыкі навучання.
— Я магу з упэўненасцю сказаць, што кожны педагог у ліцэі — прафесіянал. Прычым прафесіянал, які штодзень праяўляе добрасумленнасць і максімальную аддачу ў працы. Большая частка калектыву мае вышэйшую кваліфікацыйную катэгорыю. Усе нашы настаўнікі валодаюць сапраўдным талентам да педагогікі, а большасць з іх — перадавікі ў сістэме адукацыі. Так, намеснік дырэктара Тамара Вінаградава была адзначана медалём “За працоўныя заслугі”, а таксама з’яўляецца выдатнікам адукацыі, як і педагогі Ала Рошаль, Валянціна Філімоненка, Генадзь Селядцоў, Тамара Кавалёва, Вольга Даніленка, Святлана Фралова, Таццяна Казакова, Валянціна Чыж, Сяргей Касаковіч. Настаўніца біялогіі Наталля Колчына была прызнана “Чалавекам года” ў рэгіёне. Шматлікія нашы педагогі ўзнагароджваліся спецыяльнай прэміяй аблвыканкама ў галіне адукацыі. 65 разоў настаўнікі нашай установы станавіліся лаўрэатамі спецыяльнага фонду прэзідэнта па сацыяльнай падтрымцы адоранай моладзі, — адзначыў Канстанцін Грыгаровіч.
Па меркаванні дырэктара, эфектыўнасць арганізацыі вучэбнага працэсу напрамую залежыць і ад спрыяльнасці ўзаемаадносін паміж настаўнікамі і вучнямі. Тут склалася пэўная выхаваўчая сістэма, накіраваная на фарміраванне самадастатковай асобы. Над яе максімальнай рэалізацыяй плённа працуе калектыў прафесійных класных кіраўнікоў і выхавальнікаў, актыўна далучаюцца да гэтай работы і настаўнікі.
— Разам мы змаглі стварыць у ліцэі адукацыйнае асяроддзе з даволі высокай матывацыяй да вучобы. На навучанне да нас з’язджаюцца дзеці з розных куткоў вобласці. Усіх іх, розных і непадобных адно на аднаго, мы імкнёмся аб’яднаць духам ліцэйскага братэрства. Робім гэта, абапіраючыся на нашы разнастайныя традыцыі. Цэнтральнае месца сярод іх займаюць фізкультурна-аздараўленчыя і культурныя мерапрыемствы, творчыя конкурсы, масавыя святы. Такі падыход да выхавання дазваляе дасягаць фарміравання гарманічнай, рознабаковай асобы кожнага вучня, — падкрэсліў Канстанцін Міхайлавіч.
…За 25 гадоў свайго існавання 3-ці абласны ліцэй змог стаць своеасаблівым вучэбна-даследчым і адукацыйна-культурным цэнтрам у сістэме ўстаноў адукацыі Магілёўскай вобласці. У такім ключы тут плануюць працаваць і далей. Педагагічны калектыў установы скіраваны на захаванне станоўчых напрацовак у рабоце, на дасягненне яшчэ больш высокага ўзроўню якасці навучання, удасканаленне ўмоў для ўсебаковага развіцця вучняў, іх падрыхтоўкі да паўнавартаснага жыцця ў грамадстве.
Ганна СІНЬКЕВІЧ.
Фота аўтара.
